SURAT NI SI PAULUS TU PARLAGUTAN ROM 8:37 - BIBEL JAMITA NA DENGGAN

³⁷ Tapi di bagasan sasudena i, na monang situtu do hita markite-hite Ia na dung mangkaholongi hita!

SURAT NI SI PAULUS TU PARLAGUTAN ROM 8:37 ပူးပေါင်းရင်းမြစ်များ

JESAYA 25:8

AbiskononNia ma hamatean ro di salolot-lolotna! Apusan ni Tuhan Debata ma ilu-ilu sian ganop mata, jana padaoonNa habilean na nitanggung ni halakNia di sude portibi on. Madung didok Tuhan i songon i, angkon tulus do i tarjadi.

JOHANNES 16:33

Hudok pe i sudena anso marhasonangan do hamu harana di bagasan Au do hamu. Marhancit ma hamu baenon ni portibi on. Tapi sobar ma hamu! Madung Hutaluhon portibi on!”

SURAT NI SI PAULUS TU PARLAGUTAN ROM 8:35

Ise ma he na ra manyirang hita sian holong ni roha ni Kristus i? Parkancitan, sanga hagogotan, sanga pangayak-ayakan, sanga tangkuraparon, sanga parsaemaraan, sanga parmaraan, sanga podang lakna?

1 KORINTUS 15:54

Muda dung dipake pamatang na ra mate do pamatang na so ra mate i jana pamatang na sian portibi on mamake pamatang na sian banua ginjang i, baru ma anso tarjadi disi na tarsurat di bagasan Buku Na Badia i na mandok, “Madung dipangabis hamatean; madung dapot hamonangan!”

1 KORINTUS 15:57

Tapi tarimakasi ma di Debata, dilehen Ia do antong hamonangan di hita markite-hite Jesus Kristus Tuhanta i!

2 KORINTUS 12:19

Betak na dipikir rohamunu do na laho mangabarahon dirinami sandiri hami maradopkon hamu sahonokna on. Di adopan ni Debata dohot Kristus hami dokkon ma: Sasudena i dikarejohon laho patoguhon haporsayaanmunu.

2 KORINTUS 12:9

Hape dialusi Tuhan ma, “Tuk ma asi ni rohangKu mida ho, harana di bagasan hagaleon do kuasongKu gabe singkop.” Hara ni i ma umbaen na sai por rohangku mamuji hagaleanku, angke muda gale au, topet ma disi huhilala diondihon hagogoan ni Kristus au.

2 KORINTUS 2:14

Tapi tarimakasi ma di Debata, tongtong do diuluhon Ia hami mangihutkon uduran ni hamonangan ni Kristus. Dipake Debata do hami anso songon uap na huskus jamita taringot tu Kristus i.

GALATIA 2:20

Anggo na mangolu saonnari on, nada au be i, tapi Kristus noma na mangolu di bagasan diringku. Anggo ngolu ni pamatangkon saonnari, na mangolu sian na mangkaporsayai Anak Ni Debata na manghaholongi au noma i, jana na mangalehen diriNa manghopkop au.

EPESUS 5:2

Angkon mardai holong ni roha ma nian ngolumunu, laing songon pangkaholongi ni Kristus di hita. Dihaulkon Ia do diriNia hara ni hita, gabe songon silehen-lehen dohot haul na huskus na pasonangkon roha ni Debata.

2 TESSALONIKA 2:16

Sai diapoi jana dipatogu Tuhanta Jesus Kristus sandiri bope Debata Amanta i ma rohamunu, anso tarpatulus jana tarjamitahon hamu sanga aha na denggan. Angke dihaholongi Debata Amanta i do hita, jadi hara ni denggan ni rohaNia, diapoi Ia do rohanta dohot apo-apo na manongtong jana dilehen Ia do tu hita arop ni roha na denggan.

1 JOHANNES 4:10

On do holong ni roha i: Nada hita parjolo mangkaholongi Debata tapi Debata do na mangkaholongi hita jana na marsuru AnakNia tu portibi on anso dapotan pardengganan hita taringot tu angka dosanta.

1 JOHANNES 4:19

Marholong ni roha pe hita, hara ni na dung parjolo do Debata mangkaholongi hita.

1 JOHANNES 4:4

Tapi ale dakdanakku, anggo hamu dakdanak ni Debata do. Madung ditaluhon hamu angka panurirang pargabus i, angke gumogoan dope Tondi na adong di hamu sian tondi na adong di angka jolma na ro sian portibi on.

JUDAS 1:24

Debata do na margogo manjagohon hamu, anso ulang tinggang, jana na pajongjongkon hamu di adopan ni hasangapanNia di bagasan jop ni roha, jana nada martihas.

HALUMBAAN 1:5

dohot sian Jesus Kristus saksi na bonar roha i. Ia do na parjolo dipangolu mangulahi sian hamatean jana Ia muse ma parkuaso di ginjang ni angka raja na di tano on. Dihaholongi Jesus do hita jana hara ni hamateanNia i dipalua Ia do hita sian angka dosanta.

HALUMBAAN 12:11

Madung ditaluhon angka donganta i ia dohot mudar ni Anak Ni Biri-biri i bope dohot hasaksian ni halahi. Angke nada dihaholongi halahi hosa ni halahi lopus tu hamatean.

HALUMBAAN 17:14

Na giot marporang do halahi mangalo Anak Ni Biri-biri i. Tapi taluhonon ni Anak Ni Biri-biri i ma halahi, angke Ia do Tuhan ni angka tuan jana Raja ni angka raja. Dung i monang ma na rap dohot Ia, i ma angka na nipiohon dohot na nipili dohot na setia.”

HALUMBAAN 21:7

Sanga ise halak na monang, jagitonnia ma sudena on sian Au. Au ma gabe Debatana jana ia ma gabe anakKu.

HALUMBAAN 3:9

Ligi ma! Huboan ma tu hamu angka halak sian punguan ni Sibolis, angka na manggoari dirina halak Jahudi, hape nada tutu nian, pargabus do halahi. Baenonku ma halahi marsinggang di jolo ni patmu, jana botoon ni halahi ma na holong do rohangKu mida hamu.