SURAT NI SI PAULUS TU PARLAGUTAN ROM 8:24 - BIBEL JAMITA NA DENGGAN

²⁴ Angke madung dipalua hita, haru pe laing di bagasan arop ni roha. Tapi muda dung taida na niarop ni rohanta i, nada arop ni roha be na songon i. Harana, ise ma he na sai mararop ni roha tu na dung niidana?

SURAT NI SI PAULUS TU PARLAGUTAN ROM 8:24 ပူးပေါင်းရင်းမြစ်များ

MASMUR 146:5

Martua ma halak na mangasahon Tuhan Debatana, jana na mardebatahon Debata ni si Jakob, gabe pangurupina.

MASMUR 33:18

Dijagohon Tuhan do sanga ise halak na burju mangoloi Ia, halak na mararop roha di holong ni rohaNa sapanjang.

MASMUR 33:22

Sai hot ma nian holong ni rohaMu tu hami, ale Tuhan, angke tu Ho do hami marhaposan.

PODA 14:32

Mate do halak na jahat hara ni jahat ni parbuatanna; tapi malua do halak na burju hara ni hadenggananna.

JEREMIA 17:7

Tapi anggo halak na marpos ni roha tu Au sai na pasupasuonKu do i marpupu.

ZAKARIA 9:12

Mulak ma hamu ale angka halak buangan, saonnari madung adong di hamu harapan. Mulak ma hamu tu inganan parondinganmunu. Di ari sadari on Au mandok: Silompit dua do paulahonKu pasupasungKu tu ho.

SURAT NI SI PAULUS TU PARLAGUTAN ROM 12:12

Jop ma rohamunu mararop roha tu Tuhan i, sobar ma hamu muda ro hasusaan, jana haburjuhon hamu ma na martangiang.

SURAT NI SI PAULUS TU PARLAGUTAN ROM 15:13

Debata do arop ni rohamunu. Sai digohi Ia ma rohamunu dohot jop ni roha bope dohot hasonangan di bagasan haporsayaanmunu tuSia, anso mur mararop roha hamu tu Debata baenon ni gogo ni Tondi Parbadia.

SURAT NI SI PAULUS TU PARLAGUTAN ROM 15:4

Harana sanga aha na dung tarsurat na jolo, gabe parsiajaran do i di hita, anso togu hita di panghirimon i, markite-hite hapohomon dohot pangapoion sian Buku Na Badia i.

SURAT NI SI PAULUS TU PARLAGUTAN ROM 4:18

Porsaya do si Abraham jana mararop ni roha, haru pe so adong ojahan laho mararop ni roha, anso gabe “Ompu ni bahat bangso” ia, songon na nidok, “Songon i ma bahat ni pomparanmu sogot.”

SURAT NI SI PAULUS TU PARLAGUTAN ROM 5:2

Markite haporsayaan tuSia muse do hita dapotan dalan masuk tu asi ni roha ni Debata. Di bagasan asi ni roha i do hita mangolu, jana marmoga-moga di bagasan arop ni roha tu hamuliaan ni Debata!

SURAT NI SI PAULUS TU PARLAGUTAN ROM 8:20

Harana madung dipatunduk sude na nitompa i tu na so hasaya, nada nian hara ni por ni rohana, tapi hara ni hagiot ni Debata na patundukkon i do. Tapi laing adong dope arop ni roha on:

1 KORINTUS 13:13

Jadi tinggal ma na tolu on: Haporsayaan, arop ni roha, dohot holong ni roha; tapi na gumodang sian na tolu i, holong ni roha do.

2 KORINTUS 4:18

Angke anggo rohanami, tu angka pangalaho na so tarida do hami tujuhon, nada tu angka na tarida. Anggo na tarida, hum santongkin do i tahan, tapi anggo na so tarida i manongtong do i salolot-lolotna.

2 KORINTUS 5:7

Harana anggo ngolunta marojahan di haporsayaan do, nada marojahan tu na tarida,

GALATIA 5:5

Hara ni Tondi dohot haporsayaanta, arop do rohanta di hatigoran i.

KOLOSSE 1:23

Hara ni i angkon ojak jana togu do hamu di bagasan haporsayaan i, jana nada ra be hamu nipaorot sian arop ni roha ni Jamita Na Denggan na dung binegemunu. Madung dijamitahon jamita i tu sude na nitompa di tano on, jana na dung gabe naposo ni i do au si Paulus.

KOLOSSE 1:27

Anggo tu bangsoNia i ra do Debata paboahon sanga na bia dengganna dohot godangna rahasiaNia i di sudena jolma manusia. On do rahasia i: Di bagasan dirimunu do Kristus, jadi gabe dohot ma hamu maruli di hagodangan ni Debata.

KOLOSSE 1:5

Hara ni angka na niarop ni rohamunu tu na niparade ni Debata di hamu di banua ginjang i, gabe porsaya jana marholong ni roha do hamu. Madung dibege hamu taringot tusi di na nipasahat tu hamu hatatangkas ni barita taringot tu Jamita Na Denggan i na sian Debata.

1 TESSALONIKA 5:8

Tapi anggo hita on, angka halak na sian arian do, jadi angkon torang do rohanta. Angkon pakeonta do haporsayaan dohot holong ni roha songon baju bosi tu parporangan. Jana kupia bajanta, i ma arop ni rohanta di haluaanta i.

2 TESSALONIKA 2:16

Sai diapoi jana dipatogu Tuhanta Jesus Kristus sandiri bope Debata Amanta i ma rohamunu, anso tarpatulus jana tarjamitahon hamu sanga aha na denggan. Angke dihaholongi Debata Amanta i do hita, jadi hara ni denggan ni rohaNia, diapoi Ia do rohanta dohot apo-apo na manongtong jana dilehen Ia do tu hita arop ni roha na denggan.

TITUS 3:7

anso mardenggan hita mangulahi tu Debata hara ni ibo ni roha ni Jesus jana tola ma hita maruli hangoluan na so mantak na sai tapainte-inte i.

IBRANI 11:1

Haporsayaan i ma jojahan ni roha taringot tu angka na niarop ni roha dohot hapastian taringot tu na so niida dope.

1 PETRUS 1:21

Markite-hite Ia do porsaya hamu tu Debata na pangoluhon Ia mangulahi sian hamatean dohot na pasangapkon Ia. Jadi Debata do na nihaporsayaanmunu jana laing tu Debata muse ma hamu mararop ni roha.

1 PETRUS 1:3

Mandok tarimakasi ma hita tu Debata bope Ama ni Tuhanta Jesus Kristus! Hara ni denggan ni rohaNia, dibaen Ia do hita gabe jolma na imbaru na maruli arop ni roha na tongtong mangolu, angke madung dipangolu Kristus mangulahi sian hamatean.

1 JOHANNES 3:3

Sude halak na mararop ni roha tuSia, dipaias ia ma dirina songon Ia na badia i.