SURAT NI SI PAULUS TU PARLAGUTAN ROM 2:29 - BIBEL JAMITA NA DENGGAN

²⁹ Sabalikna do. Anggo halak Jahudi na tutu, i ma halak na marroha Jahudi; jana sunat na tutu, i ma sunat na di roha i na nibaen ni Tondi i, nada na nibaen marguru tu Tona na tarsurat i sajo. Sian Debata do ro pamujian tu halak na songon i nada sian jolma.

SURAT NI SI PAULUS TU PARLAGUTAN ROM 2:29 ပူးပေါင်းရင်းမြစ်များ

1 JUJUR TAON 29:17

Huboto do, na niujimu roha ni ganop halak jana dihalomohon rohamu do halak parroha na ias. Sian sada ni rohangku, di bagasan jop ni roha huhaulkon ma sudena on tu Ho. Madung tangkas huida sanga songon dia bangsoMu na marlagut dison marjop ni roha marsioban haulna be tu Ho.

MASMUR 45:13

Boru ni raja na jogi i masuk tu bagasan bagas godang, dohot baju na marsulam bonang sere.

JEREMIA 4:14

O Jerusalem, ambungkon ma hajahatan sian bagasan rohamu anso dipalua ho. Sadia honok nari angka pikiran na jahat i sai simpan-simpanonmu di bagasan rohamu?

JEREMIA 4:4

Tiop ma janjimu dohot Au Tuhanmu, jana hapunjungkon ma dirimu di Au, ale halak Juda dohot Jerusalem. Muda nada, gilap ma murukKu jana manutungi songon api na so haintopan sanga na ise pe, hara ni sude angka parbuatanmunu na jahat i.”

JEREMIA 9:25

Didok Tuhan ma, “Dapot do i hatihana, uhumanKu halak Mesir, Juda, Edom, Amon, Moab dohot halak na mangingani padang halongonan na manggusting pendek obukna. Na dung marsunat do sude angka jolma i, hape halahi sandiri bope halak Israel nada maniop parjanjianKu na nigambarkon ni sunat i.”

LUKAS 11:39

Gabe didok Jesus ma tusia, “Tutu do i anggo halak Parise somal do dipaias hamu mangkuk dohot pingganmunu sian duru sajo tapi anggo di bagasan dirimunu sandiri gok dohot na nisamun dohot hajahatan do.

LUKAS 17:21

Nada tarbaen halak mandokkon, “Ligi ma, dison do i sanga disi do i, harana di bagasan hamu do Harajaan Ni Debata.”

JOHANNES 12:43

Harana holongan do roha ni halahi di hasangapan na sian jolma, ulang pado hasangapan na sian Debata.

JOHANNES 4:23

Tapi na giot ro do hatihana, jana madung ro saonnari, marsomba ma angka parsomba na tutu tu Ama i di bagasan Tondi dohot hasintongan; angke jop do roha ni Debata marnida halak na songon i.

JOHANNES 5:44

Tarbia muse ma pambaenmunu porsaya, harana na manjalahi sangap do hamu sama hamu, anggo sangap sian Debata na sasada i nada dijalahi hamu.

SURAT NI SI PAULUS TU PARLAGUTAN ROM 14:17

Harana anggo di Harajaan Ni Debata, nada sipanganon sanga siinumon na porlu disi, tapi hatigoran dohot hadamean dohot jop ni roha na nilehen ni Tondi Parbadia do.

SURAT NI SI PAULUS TU PARLAGUTAN ROM 2:27

Jana salahonon ni angka na so marsunat humani i ma hamu halak Jahudi, angke haru pe adong tarsurat aturan di hamu jana marsunat do hamu, hape dilanggar hamu do aturan i. Anggo halahi nada nisunat, hape halahi do na mangoloi aturan i.

SURAT NI SI PAULUS TU PARLAGUTAN ROM 3:1

Antong, aha dehe hasurungan ni halak Jahudi sanga aha guna ni sunat?

SURAT NI SI PAULUS TU PARLAGUTAN ROM 7:6

Tapi anggo saonnari madung dipalua hita sian Tona i na maniopi hita, angke madung mate hita disia, gabe mangoloi do hita di bagasan haimbaruan mangihutkon Tondi, jana nada di bagasan habuburuk ni surat i.

1 KORINTUS 4:5

Antong, anggo so dapot dope hatihana, ulang ma matibutu tontuhon hamu marsala sada-sada halak sanga nada. Painte hamu ma lopus tu haroro ni Tuhan i. BukaonNia do sude angka rahasia na buni di na golap. RungkaranNia ma sudena rahasia na buni na di bagasan roha ni jolma. Di hatiha i pe anso jagiton ni halak ganop pujian na patut jagitonna sian Debata.

1 KORINTUS 7:19

Rap na so marguna do na mangoloi aturan ni sunat dohot na so mangoloi. Mangoloi parenta ni Debata do na porlu.

2 KORINTUS 10:18

Dibaen nada haposan dope na mamuji dirina, tapi na nipuji ni Tuhan i do.

2 KORINTUS 3:6

Ia do na mambaen hami sanggup gabe pangoloi di sada parjanjian na imbaru; i ma parjanjian na marguru tu Tondi Parbadia, nada marguru tu angka aturan na tarsurat. Angke mamatehon do anggo na tarsurat i, hape na sian Tondi Parbadia i, na pangoluhon do.

PANGARATAION 10:16

Jadi mamungka sian saonnari, sai marpangoloion ma hamu tu Tuhan jana ulang be marjogal ni roha hamu.

PANGARATAION 30:6

LehenonNa ma di hamu roha na burju mangoloi, jadi gabe holong ma rohamunu di Tuhan Debatamunu sian sandok rohamunu, jana bolas ma hamu torus maringanan di tano i.

PILIPPI 3:3

Hape hita do angka na dung manjagit sunat na tutu, nada halahi. Hombar tu panogu-noguon ni Tondi Ni Debata sandiri do tasomba Debata, jana mandok tarimakasi do hita hara ni na dung mardomu i hita dohot Jesus Kristus. Nada marguru tu angka upacara na tarida hita.

1 TESSALONIKA 2:4

Nada! Nada na giot pasonang-sonang roha ni jolma hami manghatai. Na giot pasonang roha ni Debata do hami muda manghatai. Debata do na dung manguji rohanami jana na dung mangangkat hami laho manjamitahon Jamita Na Denggan i.

1 PETRUS 3:4

Tapi na sian roha ma nian hajegesonmunu; umpamana halambohon dohot hadameon ni pangalaho; i do hajegeson na manongtong na mararga situtu di parnidaan ni Debata.

1 SAMUEL 16:7

Tapi didok Tuhan ma tu si Samuel, “Ulang marguru ho di ginjang ni pamatang dohot di jogi ni rupana; nada i por ni rohangKu. Nada songon parsuhat ni jolma parsuhatKu. Anggo jolma siida rupa do, tapi anggo Au marnida roha do.”