SURAT NI SI PAULUS TU PARLAGUTAN ROM 16:27 - BIBEL JAMITA NA DENGGAN

²⁷ Hum sasada Ia sajo do Debata na sun pistar. Sai marsangap situtu ma Ia salolot-lolotna markite-hite Jesus Kristus i! Amen.

SURAT NI SI PAULUS TU PARLAGUTAN ROM 16:27 ပူးပေါင်းရင်းမြစ်များ

MASMUR 147:5

Na godang ma da Tuhanta jana na sumurung habisuhonNia nada tarsuhat.

JESAYA 31:2

Na pistar do Tuhan jana diboto Ia do sanga aha na nibaenNia. Diparo Ia do parmaraan jana didalankon Ia do ancamanNia laho manguhumi halak na jahat dohot halak na mangampini halahi.

SURAT NI SI PAULUS TU PARLAGUTAN ROM 11:36

Angke sian Ia, jana markite-hite Ia, jana tuSia do sudena na adong. DiSia ma hasangapan ro di salolot ni lolotna! Amen.

EPESUS 3:10

On do maksud ni Debata disi: anso saonnari, sude na maniop kuaso di awang-awang i mamboto hamaloon ni Debata di sude ragam rupa ni pangalaho markite-hite parlagutan i.

PILIPPI 4:20

Sai tapuji ma Debata Amanta i salolot-lolotna! Amen.

1 TIMOTEUS 1:17

Debata do Raja ni sude hatiha, patut nipasangap jana pujion tongtong, angke Ia do na manongtong, na so tarida jana sasadaSa! Amen.

1 TIMOTEUS 6:16

Hum Ia sajo do na so tarkuasoi hamatean; di bagasan sinondang na so hadonohan sanga ise pe. Nada adong sahalak jolma pe na jungada marnida Ia, sanga na tarbaen marnida Ia. Angkon lehenon ma nian tuSia sangap dohot kuaso salolot-lolotna! Amen.

2 TIMOTEUS 4:18

Sai paluaon ni Tuhan Jesus do au tongtong sian sude usaho na jat maradopkon au. BoanonNia do au lopus tu bagasan HarajaanNia di banua ginjang. Sipasangapon do Ia salolot-lolotna! Amen.

IBRANI 13:15

Hara ni i, sai tapuji-puji ma Debata markite-hite Jesus; i ma haul haluaan tuSia, na tahaulkon sian pandohan na tapajojor dohot pamanganta laho pasangapkon goarNia.

IBRANI 13:21

Sai dipasingkop Debata mual ni hasonangan i ma hamu di sasude na denggan i na porlu di hamu laho patuluskon hagiot ni rohaNia. Sai dibaen Debata ma di hita sanga aha giot ni rohaNia markite-hite Jesus Kristus. Tarpuji ma Jesus salolot-lolotna! Amen.

1 PETRUS 2:5

Songon angka batu na mangolu do hamu. Antong ra ma hamu dipake laho pajongjong bagas ni Debata di pangalaho partondion. Jadi gabe angka malim na badia ma hamu jana na mangalehen haul tu Debata markite-hite Jesus Kristus, i ma haul partondion jana na tumbuk di roha ni Debata.

2 PETRUS 3:18

Sai mur pangkilalahon hamu ma hadengganan ni roha ni Tuhan, Sipaluanta i, i ma Jesus Kristus, jana sai mur tangkas ma nian ditanda hamu Ia. Tarpuji ma Ia saonnari bope ro di salolot-lolotna. Amen.

JUDAS 1:25

Di Debata na sasada i, Sipalua hita markite-hite Jesus Kristus, Tuhanta i, diSia ma hasangapan, hagodangan, hagogoan dohot kuaso sian mula ni mulana, saonnari ro di salolot ni lolotna! Amen.