SURAT NI SI PAULUS TU PARLAGUTAN ROM 15:14 - BIBEL JAMITA NA DENGGAN

¹⁴ Hamu ale angka dongan! Pos do rohangku angkon bahat do angka pangalaho na denggan di hamu. Sasude do diboto hamu jana tarbaen hamu muse do marsiajar-ajaran na sada tu na sada nari.

SURAT NI SI PAULUS TU PARLAGUTAN ROM 15:14 ပူးပေါင်းရင်းမြစ်များ

1 KORINTUS 1:5

Gabe mamora do hamu taringot tu sudena pangalaho, dung Kristus nampuna hamu. Parbinotoanmunu pe madung bagas situtu taringot tu sude pangalaho jana malo muse do hamu mangajarkon parbinotoan i.

1 KORINTUS 12:8

Tu na sada dilehen Tondi i do hamaloon mandok hata di bagasan habisuhon, jana tu na asing, dilehen Tondi i do hamaloon mandok hata di bagasan parbinotoan.

1 KORINTUS 13:2

Sugari malo au manyurirangi, jana huboto sude na buni dohot sude parbinotoan, jana adong di au haporsayaan jabat tarpaorot au angka dolok, tapi nada adong di au holong ni roha, songon na soada do au.

1 KORINTUS 8:1

Taringot tu sipanganon na nihaulkon tu gana-ganaan ma saonnari. Jadi tutu do songon na nidok ni halak, “Na dung marparbinotoan do hita sude.” Tapi hamaloan laho mambaen anso pagodang diri do halak, hape nian anggo holong ni roha i laho padenggankon parrohaon ni halak do i.

1 KORINTUS 8:10

Harana muda adong halak na gale panggora ni rohana mangaligi ho na “marparbinotoan” topet juguk mangan di bagas parsombaan tu gana-ganaan, nada he gabe tartarik rohania gabe puluk ia mangankon sipanganon na dihaulkon tu gana-ganaan i?

1 KORINTUS 8:7

Tapi nada sude halak umboto i. Adong dope halak na tarihot tu gana-ganaan, mangankon juhut songon na nihaulkon tu gana-ganaan, jana na gale dope panggora ni roha ni halahi. Hara ni i gabe dihodari ma panggora ni roha i.

2 KORINTUS 8:7

Burju do hamu di sude pangalaho. Denggan do hamu di na mangkaporsayai, di na paboahon pandapot, di parbinotoan, di ragam-ragam ni karejo, dohot di bagasan holong ni rohamunu maradopkon hami. Jadi hara ni i, angkon laing umburju muse ma hamu nian di karejo na denggan on.

EPESUS 5:9

Angke sian na torang i do haroroan ni sasude ragam ni parange na denggan jana na bonar di panatapan ni Debata.

PILIPPI 1:11

Angka pambaenan na denggan noma mardapot-dapot sian ngolumunu, hum sian Jesus Kristus sajo do na tarbaen pataridahon suha na songon i; gabe nipasangap jana nipuji-puji ma Debata.

PILIPPI 1:7

Sai tongtong do di bagasan rohangku hamu sude. I do tutu tamana muda pe songon i pangkilalaanku taringot tu hamu. Angke na rap maruli do hamu sudena dohot au di silehen-lehen na nipasahat ni Debata di au; bope saonnari dompak tarhurung au sanga pe hatiha di ruar au laho mambela dohot mampartahankon Jamita Na Denggan i.

KOLOSSE 3:16

Sai mur maringan ma angka pangajaran ni Kristus tu bagasan rohamunu jana dilehen ma pasupasuNa di hamu mardapot-dapot. Marsiajar-ajaran ma hamu jana marsipaingotan samalomunu. Endehon hamu ma Masmur dohot puji-pujian bope angka ende partondion tu Tuhan. Mardongan hatarimakasion sian bagasan rohamunu, marende ma hamu tu Debata.

1 TESSALONIKA 5:11

Hara ni i, marsipaingotan ma hamu jana marsipatoguan di haporsayaan, laing songon na nibaenmunu saonnari.

1 TESSALONIKA 5:14

Laing hami pangido dope, hamu ale angka dongan, anso gorahon hamu angka halak na so maraturan. Apoi hamu ma angka na menek roha; urupi hamu ma angka na gale jana sobar ma hamu maradopkon halak sudena.

2 TESSALONIKA 1:11

Hara ni i ma dibaen na tongtong hami tangiangkon hamu. Hami tangiangkon do anso nian halak na tumbuk hamu di pamioon ni Debata. Sai diurupi Debata ma hamu hara ni kuasoNa i, anso tarpatulus hamu sudena na denggan na nihalungunkonmunu hombar tu haporsayaan i. Laing hami tangiangkon do, anso nian hara ni kuaso ni Debata, laing dipaujung Ia ma angka karejo na nikarejohonmunu hombar tu haporsayaanmunu i.

2 TIMOTEUS 1:5

Taringot do tu rohangku situtu ni haporsayaanmu tu Kristus, sarupa tu haporsayaan ni ompungmu si Lois dohot inanta si Eunike. Jana au pe pos do rohangku, laing songon i muse haporsayaanmu.

PILEMON 1:21

Pos do rohangku na mambaen surat on, patulusonmu do sanga aha na hupangido on tu ho. Jana huboto lobi sian i dope patupaonmu.

IBRANI 5:12

Satutuna nian, madung hatihana gabe guru hamu, hape angkon laing porlu dope hamu marsiajar tu halak na asing taringot tu ojahan ni angka pangajaran ni Debata. Laing na so tarpangan hamu dope panganon na pir; angkon laing minum susu sajo dope hamu.

IBRANI 6:9

Tapi hamu angka dongan na nihaholongan, haru pe hami dok songon i, anggo taringot tu hamu pos do rohanami adong do angka na dumenggan ditiop hamu satontang tu haluaanmunu.

2 PETRUS 1:12

Hara ni i, angkon laing pupuonku do paingotkon na songon i tu hamu, haru pe nian madung tangkas i di hamu jana na dung situtu hamu porsaya tu hatigoran na sian Debata na nijagitmunu i.

1 JOHANNES 2:21

Jadi hubaen pe surat on tu hamu nada hara ni na so nibotomunu hasintongan i, tapi hara ni na dung nibotomunu i do jana diboto hamu muse do na so adong do gabus di hasintongan i.