SURAT NI SI PAULUS TU PARLAGUTAN ROM 1:16 - BIBEL JAMITA NA DENGGAN

¹⁶ Dibaen nada maila au hara ni Jamita Na Denggan i, angke i do hagogoon ni Debata na markarejo laho paluahon sudena halak na porsaya; na parjolo i ma halak Jahudi, dung i muse angka bangso na asing.

SURAT NI SI PAULUS TU PARLAGUTAN ROM 1:16 ပူးပေါင်းရင်းမြစ်များ

MASMUR 110:2

Sian Sion pabidangon ni Tuhan ma harajaanmu, markuaso ma ho di tonga-tonga ni angka musumu.

MASMUR 119:46

Baritahononku ma aturanMi tu angka raja, jana nada au gabe marhahaila.

JESAYA 53:1

“Ise ma porsaya tu barita na hami bege? Tu ise ma na dung dipataridahon kuaso ni Tuhan na gok sahala?

JEREMIA 23:29

Songon api do hatangKu jana songon toko na manapor batu!

MARKUS 8:38

Angke sanga ise na maila hara ni Au dohot hatangKu di tonga-tonga ni halak na so setia dohot pardosa, maila muse ma Anak Ni Jolma i mida ia muda ro Ia di bagasan hasangapan ni AmangNia rap dohot surusuruanNia na badia i.”

LUKAS 9:26

Muda adong na maila hara ni Au jana maila hara ni pangajaranKu di adopan ni halak na asing, maila muse ma Anak Ni Jolma i mangokui halak sisongon i di haroroNia saulahon mardongan hasangapanNia, jana mardongan hasangapan ni Amangnia, songon i dohot hasangapan ni angka surusuruan na badia!

JOHANNES 7:35

Dung i didok angka halak Jahudi i ma, “Na giot tudia muse dehe Ia umbaen jabat nada tarbaen hita mandapotkon Ia? Adong he ulaning na giot kehe mandapotkon halak Jahudi na mangaranto di tonga-tonga ni halak Junani i ma Ia jana giot ajaranNia ma angka halak Junani i?

BAENON NI ANGKA RASUL 3:26

I do umbaen na nipili ni Debata NaposoNia, jana hamu do na parjolo didapotkon Ia anso dipasupasu Ia hamu, dohot paubahon rohamunu sudena sian ngolumunu na jahat i.”

SURAT NI SI PAULUS TU PARLAGUTAN ROM 10:17

Jadi sian parbinegean do ro haporsayaan, jana parbinegean i markite-hite hata ni Kristus.

SURAT NI SI PAULUS TU PARLAGUTAN ROM 15:19

na nidonganan ni angka tanda hahomangan na sian gogo ni Tondi Parbadia do sudena i. Madung sudena hubaritahon Jamita Na Denggan sian Kristus i tu angka jolma, mamungka sian Jerusalem lopus tu Ilirikum.

SURAT NI SI PAULUS TU PARLAGUTAN ROM 15:29

Huboto do muda ro au, angkon boanonku do angka pasupasu na sian Kristus di hamu.

SURAT NI SI PAULUS TU PARLAGUTAN ROM 2:9

Ganop halak na sai mambaen na jahat, markancit ma disi jana mangae; tarlobi-lobi tu halak Jahudi, songon i muse halak Junani.

SURAT NI SI PAULUS TU PARLAGUTAN ROM 4:11

Dijagit ia do tanda sunat i songon cap ni hatigoran markite-hite haporsayaan na nipatuduhonnia taran so disunat dope ia. Markite na songon i ma ia gabe ompu ni sude na porsaya na so marsunat, anso diparetongkon ma hatigoran i tu halahi.

1 KORINTUS 15:2

Muda togu do hamu marojahan tu na hujamitahon i, paluaon ni Jamita Na Denggan i ma hamu; asing ma rupani anggo na sayang boti sajo hamu di na porsaya i.

1 KORINTUS 2:2

Harana madung putus hian di rohangku, salolot rap au dohot hamu, nada pajojoronku bagi aha tu hamu asing sian Jesus Kristus; lumobi ma i taringot tu hamamateNia di parsilang i.

1 KORINTUS 2:4

Nada markite-hite habisuhon na paposkon hupalalu hatangku dohot jamitangku tapi markite-hite dalan na patandahon kuaso na sian Tondi i do.

1 KORINTUS 9:12

Muda adong hak ni halak na asing manjagit sisongon i sian hamu, inda he umbahatan dope haknami ulang halahi? Tapi anggo au nada hupake dope hak na songon i. Gumonan dope hutaonkon sasudena timbang mambaen ambat-ambat laho pararatkon Jamita Na Denggan taringot tu Kristus i.

1 KORINTUS 9:18

Antong, aha ma upa di au? On ma upana: Tarjamitahon au do Jamita Na Denggan i so pola adong halak na asing hupadokdok laho mambalanjoi au, hara ni na so ra au manuntut bagianku songon parjamita ni Jamita Na Denggan i au.

2 KORINTUS 2:12

Dung lalu au di Troas, laho manjamitahon Jamita Na Denggan taringot tu Kristus i do nian maksudku. Madung tarbuka muse dalan dibaen Tuhan i di au laho markarejo di inganan i.

2 KORINTUS 4:4

Na nigupgupan ni Debata na mangarajai portibi on do roha ni halahi na so porsaya i. I do na manyundati halahi anso ulang dohot halahi marnida sinondang na sian Jamita Na Denggan i, i ma taringot tu hasangapan ni Kristus i na gabe songon gambaran ni Debata.

2 KORINTUS 9:13

Hara ni hadengganan na dipataridahonmunu, gabe bahat halak pasangapkon Debata, angke diida halahi ma antong burju ni rohamunu maradopkon Jamita Na Denggan i na patorangkon Jesus Kristus na niihutkonmunu i. Mardomu muse hara ni habasaonmunu laho mambagi-bagihon sanga aha na adongmunu tu halahi bope tu sude halak na asing.

GALATIA 1:7

Anggo satutuna nada adong “jamita na denggan na asing”. Umbaen na hudok pe songon i hara ni na adong do halak marroan parundut pikiranmunu jana na giot mamutar-balikkon Jamita Na Denggan taringot tu Kristus i.

1 TESSALONIKA 2:13

Adong dope sada nari pangalaho na mambaen hami angkon tongtong mandok tarimakasi tu Debata. I ma, hara ni panjagitmunu di jamita na sian Debata dompak hami jamitahon tu hamu. Nada songon jamita na sian jolma i dijagit hamu tapi songon jamita na sian Debata do. Jana na sian Debata do i tutu! Na markarejo do hata ni Debata di bagasan dirimunu na mangkaporsayai Kristus.

1 TIMOTEUS 1:11

Anggo pangajaran i, i ma na tarsurat di Jamita Na Denggan i na dung dipasahat tu au di bagasan pos ni roha, i ma Jamita Na Denggan na sian Debata na sangap i.

2 TIMOTEUS 1:12

Hara ni i ma umbaen na hutaon sudena on, tapi nada maila au, angke tangkas do huboto sanga ise na huhaporsayai. Pos do rohangku, sanga aha na nipasahatNia tu au, tarjagohon Ia do i lopus tu Ari Parpudi i.

2 TIMOTEUS 1:16

Tapi anggo na sian bagas ni si Onesiporus madung adong sanga na piga noli dipajop ia rohangku. Ibo ma roha ni Tuhan, sai dilehen ma tu halahi asi ni rohaNa. Haru pe tarhurung au, nada pola maila si Onesiporus marnida na masa tu au.

2 TIMOTEUS 1:8

Jadi hara ni i, ulang ma maila ho pajojorkon hasaksian taringot tu Tuhanta jana ulang maila ho hara ni au na tarhurung hara ni Ia. Gumonan ma dohot ho manaon parkancitan hara ni Jamita Na Denggan i mangasahon gogo na sian Debata.

IBRANI 4:12

Hata na mangolu jana na margogo do hata ni Debata; tumajom dope i sian podang sidua baba. Disirang ia do tondi dohot hosa, utok-utok dohot holi-holi, jana markuaso do i manguhumi pikiran dohot parrohahon ni ate-ate.

1 PETRUS 4:16

Tapi muda manaon parkancitan hamu hara ni na Kristen hamu, ulang ma maila hamu hara ni i. Mandok tarimakasi ma hamu tu Debata hara ni na dipanggoarkon tu hamu goar ni Kristus sandiri.