PODA 19:14 - BIBEL JAMITA NA DENGGAN

¹⁴ Bagas dohot sinadongan na bolas dapot do i sian ama ina, tapi dadaboru na marroha hum sian Tuhan do dapotna.

PODA 19:14 ပူးပေါင်းရင်းမြစ်များ

PAMUNGKAAN 24:44

Muda ro do ia mangalehen dohot mandok anso dilehen ia muse minum angka untongki, jadi ia ma da ibana ning rohangku na nitodoMu gabe dongan matobang ni anak ni tuanki.’

PAMUNGKAAN 24:7

Na dung disumpahon Tuhan do tu au, i ma Debata na mangarajai langit, na maroban au sian bagas ni damang dohot sian luat ni koum sisolkotku na giot lehenonNia do luat on tu pomparanku. Laing suruonNia muse ma surusuruanNia mardalan di jolomu anso laing dapot ho boru sian adu di anakki.

PODA 13:22

Halak na denggan pateankon sinadongan tu pomparanna; sinadongan ni pardosa pinda ma i tu halak na burju roha.

PODA 18:22

Halak na dapotan boru, mandapot hauntungan; i ma na patuduhon bahaso tusia jop ni roha ni Tuhan.

PODA 3:6

Ingot ma Tuhan di bagasan sude na nikarejohonmu, anso dipatuduhon Ia tu ho dalan parngoluon na sintong.

2 KORINTUS 12:14

Saonnari, patolu noli on ma rade au laho manopot hamu. Jana nada pola susaanku hamu, angke nada sinadonganmunu i na giot di au, tapi dirimunu i do. Harana nada tama muda dakdanakna manjalahi ngolu ni simatobangna, tapi simatobangna do manjalahi balanjo ni angka dakdanakna.

PANGARATAION 21:16

Muda giot putuskonon ni bayo i ma giot mambagi sinadongannia di angka dakdanaknia i, na so tola do ia mamihak tu anak na sian ripe hasudungan ni rohania i, marhite na mangalehen tu dakdanak i bagian na patut gabe hak ni anak na parjolo sorang.

JAKOBUS 1:17

Ganop silehen-lehen na denggan jana na sanggam sian banua ginjang i do ro; na nipaijur ni Debata na manompa sasudena na torang di langit i do sudena i. Ia do Debata na so muba-uba, jana nada mandao muse Ia sian hita, gabe adong do tading halinuNa humaliang hita.

JOSUA 11:23

Dirampas si Josua ma sude luat i songon na dung diparentahon ni Tuhan tu si Musa. Dung i dilehen ia ma luat i jana dibagi-bagihon tu bangso Israel gabe halahi puna; sabagian be ma ganop marga. Mantak muse ma bangso Israel na marporang i.

1 SAMUEL 25:3

Goarnia i ma si Nabal – si Abigail do goar ni dadaborunia. Na malo do si Abigail boti jeges. Hape anggo si Nabal, kasar do tabiatnia, jana jatjat do pangalahona. Sian horong ni si Kaleb do ibana.