PILIPPI 4:17 - BIBEL JAMITA NA DENGGAN

¹⁷ Nada hum silehen-lehenmunu i na giot jagitonku, tapi anso huida do angka suha na patamba hauntunganmunu, i do na huhalungunkon.

PILIPPI 4:17 ပူးပေါင်းရင်းမြစ်များ

PODA 19:17

Mangurupi halak na pogos tudos do na pasalihon tu Tuhan; laing Tuhan muse ma na paulakkon.

MIKA 7:1

Marjaya ma au! Harana parngoluonku songon dompak papunguhon batu ni anggur di ari logo, songon dompak painte masa parbatu ni anggur, nada adong anggur na giot sipanganon, dohot parbatu ni ara na huhajopkon.

MALEAKI 1:10

Didok Tuhan Na Markuaso i ma, “Sugari adong ma nian sian tonga-tongamunu, na giot manutup pintu, anso unang dipagara hamu api di langgatanKu di bagasan na so marguna. Nada jop rohangKu tu hamu, ninna Tuhan Na Markuaso jana nada jagitonKu haul sian tanganmu.

JOHANNES 15:16

Nada hamu mamili Au. Au do na mamili hamu jana Husuru hamu kehe anso ramos hamu marbatu – i ma parbatu na denggan. Dung i lehenon ni Damang ma di hamu sanga aha pe na nipangidomunu markite-hite goarKu.

JOHANNES 15:8

Muda ramos hamu marbatu, gabe hasangapan ni Ama i do i; songon i ma dalanna baenonmunu patuduhon na tutu situtu hamu siihutkon Au.

SURAT NI SI PAULUS TU PARLAGUTAN ROM 15:28

Muda dung sidung hubaen karejongkon, jana hupasahat pangurupion na nipalagut i tu halahi na di Jerusalem, kehe ma au tu Luat Spanyol mamolus sian kotamunu on.

2 KORINTUS 11:16

Hudok saulak nari: Ulang adong sanga ise na jabat marpikir di bagasan rohana mandok na oto au. Tapi muda laing dipikir hamu na oto au, antong anju hamu ma au na oto on muda pagodang diri au saotik.

2 KORINTUS 9:5

I ma umbaen na porlu huhilala marsuru angka donganta on mandapotkon hamu parjolo laho paturehon angka pangurupion na nijanjihonmunu i. Jadi muda ro au sanoli on, madung singkop nian sude silehen-lehenmunu i. Jadi tarida ma na sian burju ni rohamunu do na mangalehen i, nada hara ni na tarpaksa.

PILIPPI 1:11

Angka pambaenan na denggan noma mardapot-dapot sian ngolumunu, hum sian Jesus Kristus sajo do na tarbaen pataridahon suha na songon i; gabe nipasangap jana nipuji-puji ma Debata.

PILIPPI 4:11

Tapi hudok pe songon i nada na mandok adong na hurang di au sanga aha, harana madung huparsiajari mangkasonangkon sanga aha na adong.

1 TESSALONIKA 2:5

Tangkas do diboto hamu na so jungada hami pake hata lancap sanga na hami tipu hamu anso dapotan untung hami. Debata ma saksina!

1 TIMOTEUS 3:3

ulang parmabuk sanga na parbada. Tapi angkon halak na lambok do jana pardame. Ulang halak na sai mangarohahon hepeng.

1 TIMOTEUS 6:10

Angke sian holong ni roha tu hepeng do haroroan ni sude ragam ni hajahatan. Adong do deba halak na sai mangkojar hepeng jana na so mangihut be tu ajaran ni Kristen, lopus gabe didondoni pardangolan halahi, mambaen gabe marsak roha ni halahi.

TITUS 1:7

Harana na mangurus karejo ni Debata do sada halak sintua jadi nada tola halak na targora. Nada tola ginjang rohana sanga na parmuruk, sanga na parmabuk, sanga na kasar, sanga na sai mangarohahon hepeng.

TITUS 3:14

Angkon marsiajar do angka ruasta i patupahon angka na denggan anso tarbaen manggohi angka na porlu situtu; ulang jabat gabe halak na so marguna ngolu ni halahi.

IBRANI 6:10

Nada Debata na so tigor. Nada halupahononNia sanga aha na denggan na nibaenmunu tuSia. Sai na ingotonNia do holong ni roha na nipatuduhonmunu tuSia di bagasan pangurupionmunu na nipasahatmunu maradopkon angka dongan Kristen na asing i. Jana lopus saonnari pe laing dilehen hamu do pangurupion i.

1 PETRUS 5:2

anso parmahani hamu punguan ni biri-biri ni Debata na nipasahat tu hamu. Sonang ma rohamunu marmahani halahi songon na nihagiotan ni Debata, ulang ma borat rohamunu. Jana ulang ma hum hara ni na giot manjalahi labo baen hamu, tapi hara ni situtu ni rohamunu ma mangoloi.

2 PETRUS 2:15

Gabe lilu do halahi hara ni na so ra halahi mangihutkon dalan na tingkos. Dalan na nibolus ni si Bileam anak ni si Beor nahinan, i do diihutkon halahi. Na sai por sajo do roha ni si Bileam mida upa ni pambaenan na jat.

2 PETRUS 2:3

Hara ni na ahut tu dirina, caritohonon ni angka guru pargabus i ma tu hamu angka carito na nibaen ni halahi sandiri anso dapotan untung halahi sian hamu. Tapi anggo panguhuman laho manguhum halahi madung tibu dipasingkop jana hamagoan na dung ditontuhon pe tu halahi madung paintehon tu halahi.

JUDAS 1:11

Marjaya ma halahi! Dalan ni si Kain do na nibolus ni halahi. Anso dapotan upa, gabe didohoti halahi do angka hasalaan songon na nibaen ni si Bileam. Jana mago do halahi hara ni na manggaori songon na nibaen ni si Kora.