PILIPPI 4:1 - BIBEL JAMITA NA DENGGAN

¹ Hara ni i hamu ale angka dongan na nihaholongan, sai porsaya situtu ma hamu tu Tuhan i di ngolumunu on. Lungun do rohangku tu hamu! Hamu do na pagodang rohangku, hajopan ni rohangku.

PILIPPI 4:1 ပူးပေါင်းရင်းမြစ်များ

JOB 31:36

jadi sian godang ni rohangku hubaen ma i di abarangku, jana songon tuku hujujung ma i di ulungku.

MASMUR 125:1

Sanga ise na porsaya tu Tuhan, i ma na songon Dolok Sion, na togu nada tarhutur, jana tohong nada targulotkon salolot-lolotna.

MASMUR 27:14

Mararop roha tu Tuhan ma da, haporsayai ma, ulang padele roha. Tu Tuhan ma mararop roha.

MATEUS 10:22

Goyak ma roha ni halak sude mida hamu hara ni Au. Tapi na torus tahan lopus tu ujungna, i do na giot paluaon.

JOHANNES 8:31

Dung i didokkon Jesus ma tu halak Jahudi na dung porsaya tuSia, “Anggo burju hamu mandalankon angka ajaranKi, i pe anso tutu hamu gabe siihutkon Au.

BAENON NI ANGKA RASUL 11:23

Jana dung lalu si Barnabas disi, diida ia ma sanga na bia pamasumasu ni Debata di halahi, gabe jop sajo ma rohania. Dung i dipaingot ia ma halahi anso tongtong marsihohot tu Tuhan i.

BAENON NI ANGKA RASUL 14:22

Dipapos halahi ma roha ni angka na mangihutkon Jesus, jana dipaingot halahi ma angka na mangihutkon Jesus i anso tongtong porsaya tu Jesus. “Angkon jolo bahat do taononta parkancitan baru pe anso maruli hita hatuaan ni Harajaan Ni Debata,” ninna rasul i mamodai angka na mangihutkon Jesus di angka kota nangkinan i.

BAENON NI ANGKA RASUL 2:42

Dihaburjuhon halahi do marsiajar sian angka rasul i jana sai tongtong ma halahi rap marlagut. Rap do halahi di na mamonggoli roti, dohot martangiang.

SURAT NI SI PAULUS TU PARLAGUTAN ROM 2:7

Lehenon ni Debata ma ngolu na manongtong tu sude na mangkaburjuhon na denggan, hasangapan na sanggam jana na manongtong i.

1 KORINTUS 15:58

Hara ni i hamu ale angka dongan na nihaholongan, sai togu ma hamu jana hot. Marsitutu ma markarejo di Tuhan, angke diboto hamu do, sude na nikarejohonmunu di Tuhan, nada sayang boti sudena i.

1 KORINTUS 16:13

Antong jonggor ma hamu jana togu ma haporsayaanmunu. Angkon barani do hamu martindak jana sai margogo ma hamu.

2 KORINTUS 1:14

Jadi muda ro Tuhan Jesus muse, moga ma hamu hara ni hami songon moga ni rohanami di hamu.

GALATIA 5:1

Saonnari madung bebas hita, hara ni na dung dipalua Kristus hita! Hara ni i partahankon hamu ma habebasonmunu i jana ulang be ra hamu mangulahi diparhatoban.

PILIPPI 1:27

Antong parangehon hamu ma parange na tama tu Jamita Na Denggan na sian Kristus, anso muda ro au mangaligi hamu, sanga sian na dao hubege taringot tu hamu, bahaso na togu do hamu jongjong di bagasan sada tondi jana saroha laho marporang humopkop haporsayaan di Jamita Na Denggan i.

PILIPPI 1:8

Sai lungun sajo do rohangku tu hamu angka dongan, mardongan pangkilalaan holong ni roha na solkot sian Jesus Kristus sandiri. Debata ma saksina, paboa na tutu na hudok i.

PILIPPI 2:26

Malungun situtu do ia mida hamu sudena jana marsak do rohania betak na dung lalu tu hamu barita paboa na marnyae ia.

KOLOSSE 4:12

Tabe ni si Epafras di hamu. Laing sian hamu on do asalnia. Naposo ni Jesus Kristus do ia, na sai manangiangkon hamu. Marsitutu do ia mangido tu Debata anso margogo hamu nian jana anso tongtong togu; boti muse anso laing mardongan pos ni roha na togu hamu mangoloi hagiot ni Debata.

1 TESSALONIKA 3:13

Jadi muda songon i, tarbaen Tuhan ma patoguhon rohamunu, anso gabe badia hamu jana nada adong sigorahonon di adopan ni Debata Amanta, di haroro ni Tuhanta Jesus rap dohot sudena halak na gabe nampunaNia.

2 TESSALONIKA 2:15

Antong hamu ale angka dongan, sai tongtong ma hamu burju jana togu marsitiopan tu pangajaran na dung hami pasahat tu hamu markite-hite hata bope dohot suratnami.

2 TIMOTEUS 2:1

Amang Timoteus! Sai margogo ma ho hara ni asi ni roha na nilehen di hita hara ni pardomuanta i dohot Kristus.

IBRANI 10:23

Togu ma hita marsitiopan tu arop ni rohanta na dung taoku i angke haposan do Debata, patulusonNia do janjiNia.

IBRANI 3:14

Sapartohapan do hita on sudena rap dohot Kristus; asal ma togu tatiop lopus tu ujungna, sanga aha na tahaporsayai di mulana i.

IBRANI 4:14

Hara ni i do dibaen na angkon togu tioponta haporsayaanta i. Angke adong do Malim Godang na sangap di hita, na dung masuk lalu tu jolo ni Debata – i ma Jesus Anak Ni Debata.

2 PETRUS 3:17

Tapi anggo hamu angka dongan na nihaholongan, madung diboto hamu taringot tusi. Hara ni i, jonggor ma hamu, anso ulang jabat tarela-ela hamu tu haliluon ni angka halak na so mananda parenta ni Debata, anso ulang madabu hamu sian ojahanmunu i.