PILIPPI 3:14 - BIBEL JAMITA NA DENGGAN

¹⁴ Hara ni i ma umbaen na torus hulojong manuju tu tujuan na parpudi anso dapot au hamonangan, i ma ngolu na di banua ginjang; hara ni i do umbaen na nipio ni Debata hita markite-hite Jesus Kristus.

PILIPPI 3:14 ပူးပေါင်းရင်းမြစ်များ

LUKAS 16:16

Olat ni si Johannes Pandidi laing margogo do Tona ni ugamo na nipasahat ni si Musa, dohot angka pangajaran na adong di buku ni angka panurirang. Mamungka sian i torus ma dijamitahon Jamita Na Denggan taringot tu Harajaan Ni Debata.

SURAT NI SI PAULUS TU PARLAGUTAN ROM 11:29

Dibaen nada disolsoli Debata rohaNia, taringot tu na nilehen dohot na nipiohonNia.

1 KORINTUS 9:24

Tontu sude do hamu mamboto, anggo di na marsiadu hipas marlojong, sude do halak na dohot i marlojong, hape hum sahalak do anggo na manjagit upa. Antong sahipas-hipasna ma lojongi hamu anso dapot hamu upa i.

2 KORINTUS 4:17

Jana anggo hasusaan na so sadia on na hami taon santongkin, lehenon ni i do di hami hasangapan na so tarsuhat jana na manongtong. Dao dope gumodang hasangapan i sugari nipartimbangkon tu hasusaan i sandiri.

PILIPPI 3:3

Hape hita do angka na dung manjagit sunat na tutu, nada halahi. Hombar tu panogu-noguon ni Tondi Ni Debata sandiri do tasomba Debata, jana mandok tarimakasi do hita hara ni na dung mardomu i hita dohot Jesus Kristus. Nada marguru tu angka upacara na tarida hita.

KOLOSSE 2:18

Ulang hamu ra digorahon halak na paula-ula martoruk roha jana na manyomba angka surusuruan. Angka siginjang roha do sudena i hara ni angka pikiran ni halahi na marojahan tu portibi on. Na marguru tu angka parnidaanna do i,

1 TESSALONIKA 2:12

Hami paingot, hami sosoi jana hami jujui do hamu anso mangolu hamu mangihutkon na tumbuk di roha ni Debata, na mamiohon hamu tu bagasan Harajaan bope hasangapanNia.

2 TIMOTEUS 1:9

Dipalua Debata do hita jana dipiohon Ia hara ni na giot baenonNia hita gabe halakNia sandiri. Nada marnida tu angka karejonta i dibaen Debata, tapi marguru tu sangkapNia sandiri do i dohot denggan ni rohaNia. Taran so dijadihon dope portibi on madung songon i hian denggan ni rohaNia adop hita markite-hite Kristus Jesus.

IBRANI 3:1

Hara ni i ale angka dongan na badia, na dohot taruli di pio-pio na sian banua ginjang, ligi hamu ma rasul dohot Malim Godang na taoku i, i ma Kristus Jesus.

IBRANI 6:1

Hara ni i, tapadiar ma jolo ojahan na parjolo sian ajaran taringot tu Kristus, jana taparayak ma hasanggapan i. Ulang be taulahi mambaen ojahan taringot tu hamubaan ni roha sian pambaenan na so hasaya, jana ojahan haporsayaan tu Debata,

1 PETRUS 1:13

Hara ni i hobas ma hamu. Jonggor ma hamu jana mararop ni roha situtu di pasupasu na giot lehenonNa tu hamu di haroro ni Jesus Kristus muse.

1 PETRUS 5:10

Tapi dung ditaon hamu santongkin parkancitan i, Debata sandiri noma mambaen hamu gabe sanggam. PajongjongonNia ma hamu jana patoguonNia dohot parjugukmunu pe pahotonNia muse ma. Angke Debata parroha na sun denggan do Ia, na mamiohon hamu anso dohot mangkilala hasangapanNia na manongtong i markite-hite Kristus.

2 PETRUS 1:3

Dipio Debata do hita anso dohot hita mangkilalahon hagodanganNa dohot mandai hadengganan ni rohaNia. Mardongan kuasoNia sandiri bope sian na taboto taringot tuSia sandiri, dilehen Debata na mamiohon hita i do tu hita sanga aha na porlu anso mangolu hita songon halak na maribadat tu Debata.

HALUMBAAN 3:21

Di na monang i ma lehenonKu anso juguk ia rap dohot Au di habangsangKi, laing songon Au na monang jana na juguk rap dohot Damang di habangsaNia i.