Tapi haru pe songon i, laing bahat do angka pamimpin ni halak Jahudi i na porsaya tu Jesus. Tapi nada puluk halahi mangoku torang di jolo ni halak; harana mabiar halahi diharuarkon sian bagas paribadatan.
Ninna Jesus ma mangalusi, “Sanga ise na mangkaholongi Au, ihutkononna do angka pangajaranKu. Haholongan ni Damang ma Ia. Ro ma Damang dohot Au sandiri mandapotkon ia jana maringanan ma Hami rap dohot ia.
Dung sidung didok Ia songon i, manatap ma Jesus tu langit, ning Ia ma, “O ale Amang, saonnari madung dapot hatihana. Pasangap ma AnakMu anso dipasangap AnakMi muse Ho Amang.
Dibaen Damang pe i anso dipasangap halak do Anak i songon na ni baen ni halak tu Damang. Halak na so pasangapkon Anak i, nada diparsangapi ia muse Ama na marsuru Anak i.
Hara ni na mabiar do simatobang ni bayo i mida angka parkuaso ni halak Jahudi i umbaen na songon i didok halahi; harana madung putus tahi ni angka parkuaso ni Jahudi i, pakaruaron ma sian bagas paribadatan sanga ise na mangoku Ia Kristus i.
Hamu ale angka dongan, tontu madung diboto hamu isi ni jamita na nipabolkas ni Debata tu halak Israel. Jamita Na Denggan do barita i na paboahon dame markite-hite Jesus Kristus, i ma Tuhan ni sude jolma.
“Hara ni i ma angkon gabe sude halak Israel tangkas umboto bahaso Jesus na niparsilangkonmunu i, laing Jesus i muse do na nibaen ni Debata gabe Tuhan dohot Kristus!”
Angke bangso na asing pe dibaen Ia do pasangap Debata hara ni asi ni rohaNia, songon na tarsurat di Buku Na Badia i, “Hara ni i giot pasangaponku noma Ho di tonga-tonga ni angka bangso. jana mangendehon puji-pujian di goarMu.”
Hara ni i hupabotohon ma tu hamu anggo halak na dipimpin ni Tondi Parbadia nada tardok halahi, “Sai hona bura ma Jesus!” Laing songon i muse nada adong sahalak pe na malo mandok, “Jesus do Tuhan!” anggo inda digohi Tondi Parbadia halakna i.
Tapi anggo di hita, hum sada sajo do Debata. Ia do Ama na manjadihon sasudena na adong. Na giot diSia do ngolunta on. Tuhan pe hum sada sajo do, i ma Jesus Kristus. Markite-hite Ia dijadihon ma sasudena jadi hara ni Ia do umbaen na mangolu hita.
Markite-hite Ia do porsaya hamu tu Debata na pangoluhon Ia mangulahi sian hamatean dohot na pasangapkon Ia. Jadi Debata do na nihaporsayaanmunu jana laing tu Debata muse ma hamu mararop ni roha.
Songon on ma baen hamu laho mananda sanga Tondi Parbadia do tondi i sanga nada: Sanga ise na mangoku Jesus Kristus ro tu portibi on gabe jolma, na sian Debata ma Tondi na adong di halahi.
Madung bahat angka pargabus manyarsar sun ro di dia di tano on. Na so nioku ni halahi do na dung ro Jesus Kristus tu portibi on songon sada jolma. Pargabus do halak na songon i jana musu ni Kristus.
Angke pakean na songon i ma bontarna na giot pakeon ni angka halak na monang. Nada sesaonKu be goar ni halahi sian buku hangoluan, tapi okuonKu ma halahi di adopan ni Damang dohot di adopan ni angka surusuruanNia paboa na Au nampuna halahi.