PILIPPI 2:1 - BIBEL JAMITA NA DENGGAN

¹ Nada he hara ni na mangolu i do hamu di bagasan Kristus umbaen na margogo hamu? Umbaen na tarapul pe hamu hara ni na holong do rohaNia mida hamu! Solkot pe hamu sama hamu, hara ni na nitogu-togu ni Tondi i do hamu, jana marsihaholongan muse do hamu bope marsiasi-asian.

PILIPPI 2:1 ပူးပေါင်းရင်းမြစ်များ

MASMUR 133:1

Dengganna i jana sonangna i antong, muda mardenggan angka na markahamaranggi di ngoluna.

JESAYA 16:11

Hara ni arsakku hutangisi do Moab, jana huarsakkon do Kir-Heres.

LUKAS 2:25

Jadi di hatiha i adong ma sahalak di Jerusalem na margoar si Simeon. Halak na burju do ia, na mabiar tu Debata jana na sai paintehon hatihana paluaon ni Debata halak Israel. Didongani Tondi Parbadia do ia.

JOHANNES 14:18

Nada pola padiaronKu hamu mardangol-dangol. Mulak do Au mandapotkon hamu.

JOHANNES 14:27

Hasonangan do Hutadingkon di hamu. Hasonangan na sian Au sandiri do na Hulehen tu hamu. Nada songon pangalehen ni portibi on anggo pangalehenKu hasonangan i tu hamu. Ulang pola susa rohamunu; ulang hamu mabiar.

JOHANNES 17:13

Saonnari ro ma Au mandapotkon Damang. Jadi taran di portibi on Au, Hubaritahon angka na songon i; anso tarkilala situtu hajojop ni rohangKu di bagasan roha ni halahi.

BAENON NI ANGKA RASUL 2:46

Ganop ari marlagut do halahi di Bagas Ni Debata; marmoga-moga jana martoruk ni roha, rap mamonggoli roti halahi di angka bagas ni halahi. Jana rap mangan ma halahi di bagasan jop ni roha dohot toruk ni roha;

BAENON NI ANGKA RASUL 4:32

Sudena halahi na dung porsaya i, saroha jana satondi do ngolu ni halahi. Nada adong sian halahi na mangetong sinadonganna gabe nampunania sandiri. Sudena na adong di halahi, rap mamake do halahi.

SURAT NI SI PAULUS TU PARLAGUTAN ROM 5:5

Nada pailaon be hita hara ni arop ni roha na songon on, harana madung digohi Debata rohanta i dohot holong ni rohaNia. Markite-hite Tondi Parbadia do dibaen Debata songon i, i ma Tondi na nilehenNia tu hita.

SURAT NI SI PAULUS TU PARLAGUTAN ROM 8:26

Laing songon i do Tondi Ni Debata, na ro do i mangurupi hita di hagaleanta. Angke anggo hita nada taboto sanga na tarbia sapatutna hita martangiang. Tapi Tondi i sandiri do mangadop tu Debata laho mangidohon di hita sian lungun ni roha na so tarhatahon jabat nada tuk hata pajojorkonsa.

1 KORINTUS 12:13

Angke markite-hite sada Tondi, nipandidihon do hita sude gabe sada pamatang, bope halak Jahudi bope halak Junani, bope naposo bope halak na malua. Songon i muse, nipainum do hita dohot Tondi na sada i.

1 KORINTUS 15:31

Hamu ale angka dongan! Ganop ari do manaon parkancitan au hara ni moga ni rohangku mida ngolumunu na porsaya hamu tu Kristus Jesus Tuhanta i.

1 KORINTUS 3:16

Diboto hamu dehe, na Bagas Ni Debata do hamu? Songon i muse na maringanan do Tondi Ni Debata di hamu?

2 KORINTUS 2:14

Tapi tarimakasi ma di Debata, tongtong do diuluhon Ia hami mangihutkon uduran ni hamonangan ni Kristus. Dipake Debata do hami anso songon uap na huskus jamita taringot tu Kristus i.

GALATIA 4:6

Dibaen dakdanak ni Debata do hamu, disuru Debata muse ma Tondi Ni AnakNia i masuk tu bagasan rohanta, i ma Tondi na pio-pio, “Abba, ale Amang.”

GALATIA 5:22

Tapi anggo parbatu ni Tondi i, on do: Holong ni roha, jop ni roha, hasonangan, lambok ni roha, habasaran, lidang ni roha, hatomanan,

EPESUS 4:4

Hum sada sajo do pamatang i jana sada do Tondi. Laing songon i muse do hamu dipiohon tu sada arop ni roha na sarupa.

PILIPPI 1:8

Sai lungun sajo do rohangku tu hamu angka dongan, mardongan pangkilalaan holong ni roha na solkot sian Jesus Kristus sandiri. Debata ma saksina, paboa na tutu na hudok i.

PILIPPI 3:3

Hape hita do angka na dung manjagit sunat na tutu, nada halahi. Hombar tu panogu-noguon ni Tondi Ni Debata sandiri do tasomba Debata, jana mandok tarimakasi do hita hara ni na dung mardomu i hita dohot Jesus Kristus. Nada marguru tu angka upacara na tarida hita.

KOLOSSE 2:2

Sai margogo ma nian roha ni halahi, jana marsihaholongan ma halahi anso gabe solkot halahi mardomu. Muda tutu halahi mangarti gabe maruli pos ni roha situtu ma halahi. Jadi mur tangkas muse ma tandaon ni halahi rahasia ni Debata; i ma Kristus sandiri.

KOLOSSE 3:12

Antong hamu angka na dung dipuldit ni Debata, na diparbadia i jana na dihaholonginNia, pake hamu ma ibo ni roha, habasaron, toruk ni roha, lambok ni roha dohot hapohomon.

IBRANI 6:18

Dua pangalaho na so ra muba; nada margabus Debata di janji dohot sumpaNia! Hara ni i, hita angka na marlinggom tu Debata, adong do di hita jaminan na togu anso tongtong mararop ni roha tu na nipasingkop di hita di hatiha na giot ro.

1 PETRUS 1:2

mangihutkon sangkap ni Debata Ama jana na niparbadiai ni Tondi, anso mangoloi Jesus Kristus jana manjagit pamispion ni mudarNia. Mur martamba ma asi ni roha dohot hasonangan di hamu.

1 JOHANNES 3:24

Barang ise na mangoloi angka na niparentahonNia, na maringanan do ia di bagasan Debata, jana Debata di bagasan ia. Jana taboto ma bahaso Debata maringanan di bagasan hita, i ma hara ni Tondi na dung dilehenNia tu hita.

1 JOHANNES 4:12

Sahalak pe nada adong na jungada mida Debata, tapi maringanan do Debata di bagasan hita jana gabe sanggam do holong ni rohaNia di bagasan hita muda marsihaholongan hita sama hita.

1 JOHANNES 4:16

Taboto jana tahaporsayai do holong ni roha ni Debata maradopkon hita. Holong ni roha do Debata. Sanga ise na sai torus mangkaholongi halak na asing, na maringanan do ia di bagasan Debata jana Debata di bagasan ia.