PILIPPI 1:20 - BIBEL JAMITA NA DENGGAN

²⁰ Hum on ma i na sai hupangidohon dohot na huaropkon: Ulang nian gabe so tulus sidung karejongku. Sai diarop rohangku do tongtong lumobi saonnari anso mur puluk au sian sudena roha bope pamatangku – sanga mangolu sanga na mate pe au – laing nipasangap ma Kristus.

PILIPPI 1:20 ပူးပေါင်းရင်းမြစ်များ

MASMUR 119:116

Domu tu janjiMu pargogoi ma au anso laing mangolu, ulang paloas au dipaila di bagasan arop ni rohangku.

MASMUR 119:80

Sai ulang nian manyimbil rohangku sian hatontuanMu, anso ulang au marmalu-malu.

MASMUR 25:2

o Tuhan, Ho do haposan ni rohangku! Ulang padiar dipaila au, jana disurahi angka musungku.

MASMUR 62:5

Hupasada do rohangku paintehon Debata, hum tuSia do au mararop roha.

PODA 10:28

Arop ni roha ni halak na denggan mambaen ia marjop roha; arop ni roha ni halak na jahat do na soada.

PODA 23:18

anso torang ari pangapudianmu jana nada mago arop ni rohaMu.

JESAYA 45:17

Hape anggo Israel paluaon ni Tuhan, jana malua ma halahi salolotna. Rayatna i nada palayason salolot-lolotna dohot satorusna.’ ”

JESAYA 50:7

Hape nada mampan incak ni halahi, dibaen dilehen Tuhan Debata pangurupi. Hupatogu rohangku songon togu ni dolok batu, angke huboto nada au dibaen maila.

JESAYA 54:4

Ulang ho mabiar, nada pola pailaon be ho; nada layasan jabat mangirput ho. Halupahononmu ma na so turemu dompak poso ho; dohot na lungunmu dompak mabalu ho.

JOHANNES 21:19

Jadi na paboahon sanga na tarbia do parmate ni si Petrus saulahon laho pasangap Debata, i do na nidok ni Jesus disi.) Dung i didok Jesus ma tu si Petrus, “Ihutkon ma Au!” ning Ia.

BAENON NI ANGKA RASUL 20:24

Tapi nada pola hupardulihon ngolungkon, asalkan ma hupasidung karejo na nipasahat ni Tuhan Jesus tu au jana asal ma sai burju au lopus tu ujung ni ngolungku laho manjamitahon Jamita Na Denggan i, i ma taringot tu asi ni roha ni Debata.

BAENON NI ANGKA RASUL 21:13

Tapi dialusi ia ma, “Aha ma he gunana martangisan hamu songon on, hum mangarsahi ate-atengku do i. Angke nada hum nirahutan au rade, tapi na rade do au mate di Jerusalem humopkop goar ni Tuhan Jesus.”

BAENON NI ANGKA RASUL 4:31

Dung sidung na martangiang i, humutur ma bagas inganan ni halahi i. Digohi Tondi Parbadia ma halahi sude, mamungka ma halahi puluk sajo manjamitahon barita na sian Debata.

SURAT NI SI PAULUS TU PARLAGUTAN ROM 12:1

Hara ni i ale angka dongan, hupaingot ma hamu markite-hite ibo ni roha ni Debata, anso dipasahat hamu dirimunu gabe haul na mangolu, na badia jana na tumbuk di roha ni Debata, i ma na gabe hangoluanmunu na sapatutna.

SURAT NI SI PAULUS TU PARLAGUTAN ROM 5:5

Nada pailaon be hita hara ni arop ni roha na songon on, harana madung digohi Debata rohanta i dohot holong ni rohaNia. Markite-hite Tondi Parbadia do dibaen Debata songon i, i ma Tondi na nilehenNia tu hita.

SURAT NI SI PAULUS TU PARLAGUTAN ROM 6:13

Sada muse, ulang be pasahat hamu goar-goaran ni pamatangmunu tu kuaso ni dosa gabe parkokas laho mambaen angka na jahat. Tapi tu Debata ma pasahat hamu dirimunu songon halak na dung nipapinda sian hamatean tu hangoluan. Jana pasahat hamu ma sude goar-goaran ni pamatangmunu i tu Debata gabe parkokas laho mambaen angka na tigor.

SURAT NI SI PAULUS TU PARLAGUTAN ROM 6:19

Mangihutkon hasomalan ni jolma do mangkatai au dohot hamu, anso ummura astuanmunu. Songon na dipasahatmunu na jolo goar-goaran ni pamatangmunu tu na mangoloi hahodaran dohot hajahatan na maroban hamu tu hahodaron, laing songon i saonnari pasahat hamu ma goar-goaran ni pamatangmunu gabe hatoban ni hatigoran, jana anso gabe badia ma hamu.

SURAT NI SI PAULUS TU PARLAGUTAN ROM 8:19

Hara ni lungunna, sasudena na nitompa i painte-intehon do sanga andigan hatihana patidahonon ni Debata hasangapan ni angka dakdanakNia i.

SURAT NI SI PAULUS TU PARLAGUTAN ROM 9:33

Songon na tarsurat i, “Ligi da, Hupayakkon do di Sion sada batu partuktuhan dohot sada batu pardandian, jana barang ise na porsaya diSia, nada dipaila be.”

1 KORINTUS 15:31

Hamu ale angka dongan! Ganop ari do manaon parkancitan au hara ni moga ni rohangku mida ngolumunu na porsaya hamu tu Kristus Jesus Tuhanta i.

1 KORINTUS 6:20

Madung ditobus Debata hamu jana lunas digarari Ia. Hara ni i, denggan ma pake hamu pamatangmunu i anso marsangap Debata.

1 KORINTUS 7:34

jadi gabe mardua roha ma ia. Dadaboru na so marbagas, sanga bujing-bujing, taringot tu Tuhan do bahat pikiranna, harana giotnia ulang so Debata nian nampuna sude ngolunia. Tapi anggo dadaboru na marsaripe, dipasada do rohana tu angka na di tano on, harana sai giot pasonangonnia do roha ni halaklahinia.

2 KORINTUS 10:8

Nada pola ila rohangku muda jotjot pe hupaboa-boa kuaso na nilehen ni Tuhan di hami, harana na giot mambangun hamu do i umbaen na dilehen, nada na giot manyegohon.

2 KORINTUS 3:12

Harana sisongon i do na niarop ni rohanami, gabe puluk ma hami mangkatahon na songon i.

2 KORINTUS 4:10

Sai tongtong do hami oban hamatean ni Jesus di pamatang nami anso tangkas muse hangoluan ni Jesus di pamatang nami.

2 KORINTUS 5:15

Mangkopkop sasudena jolma do mate Kristus, anso ulang tu dirina be mangolu angka jolma i, tapi tu Kristus noma, na dung mate jana na nipangolu i mangulahi hara ni haporluan ni halahi.

2 KORINTUS 7:14

Hupuji-puji hian do hamu tusia, tuani ma inda pola dipaila hamu au. Tutu do sude na dung hami paboa i tu hamu. Songon i muse sanga na aha na hami puji-puji i hamu tu si Titus, hape tutu muse do.

2 KORINTUS 7:4

Pos situtu do rohangku di hamu. Moga situtu do pangkilalaanku hara ni hamu. Haru pe bahat hasusaan hami taon, tarapul situtu do rohangku hara ni hamu. Jop sajo do rohangku!

PILIPPI 1:14

Jana dung di bagasan hurungan on au, gabe bahatan ma angka dongan sahaporsayaan gabe mur marpos ni roha tu Tuhan, mambaen halahi gabe mur puluk manjamitahon hata ni Debata so pola mardongan biar.

PILIPPI 2:17

Betak na angkon dohot dope haulkononku pamatangkon pasanggamkon haul na ni haulkonmunu i di bagasan haporsayaanmunu na gok tu Debata. Muda pe angkon songon i, mandok tarimakasi do au tu Debata hara ni i jana dohot ma au marjop ni roha rap dohot hamu.

KOLOSSE 1:24

Saonnari jop do rohangku manaon parkancitan laho pasari-sari hamu. Angke hara ni sitaonon na adong di pamatangkon, hupaujung do sanga aha dope na angkon taonon ni Kristus hara ni parlagutanNia i, i ma pamatangNia i.

1 TESSALONIKA 5:23

Debata pardame i ma paiaskon hamu sasudena, dipaburju Ia ma hamu anso hum tuSia sajo ngolumunu. Sai dijagohon Debata ma nian hamu sudena, di tondi, di roha bope pamatangmunu, anso ulang targora lopus tu ari haroro ni Tuhanta Jesus Kristus mangulahi.

1 PETRUS 4:16

Tapi muda manaon parkancitan hamu hara ni na Kristen hamu, ulang ma maila hamu hara ni i. Mandok tarimakasi ma hamu tu Debata hara ni na dipanggoarkon tu hamu goar ni Kristus sandiri.

1 JOHANNES 2:28

Jadi hamu angka dakdanakku, tongtong ma hamu maringanan di bagasan Kristus, anso pos situtu rohanta paboa na puluk hita mangadop tuSia so pola maila be hita saulahon di haroroNa.