PARJAMITA 9:11 - BIBEL JAMITA NA DENGGAN

¹¹ Adong dope na huida di tano on: Nada sai tongtong parlojong na hipas manghamonangkon parsiaduan, nada sai tongtong halak na gogo manghamonangkon paraloan. Nada sai tongtong halak na marroha dapotan pangomoan. Jana halak na pistar nada sai tongtong dapotan sinadongan. Songon i angka na malo nada sai tongtong tarbonggal. Angke sanga na ise pe bolas jadi do hona bagian sial.

PARJAMITA 9:11 ပူးပေါင်းရင်းမြစ်များ

2 SAMUEL 17:14

Umbege i didok si Absalom dohot halak Israel i ma sude, “Dumenggan do na nidok ni si Husai on sian sipaingot ni si Ahitofel i.” Tutu ma antong na dung diputuskon Tuhan laho manyundati sipaingot ni si Ahitofel na denggan i, anso marmara si Absalom.

2 SAMUEL 17:23

Dung diida si Ahitofel na so diihutkon hatania i, dipasang ia ma palano ni halodenia, lalu mulak ma ia tu kotania sandiri. Dung dipasidung ia sude urusannia, manyingkot ma ia lalu ditanom di kuburan ni halahi sahorong.

2 JUJUR TAON 20:15

jana mandok hata ma ia, “Daulat rajanami, maradu angka kahanggi sasudena. Pandok ni Tuhan, nada tola hamu mandele sanga mabiar mida tentara na bahat i. Angke nada hamu na marporang, tapi Debata do.

JOB 34:29

Muda diputuskon roha ni Debata manghohom Ia, nada adong sahalak pe manggagaisa. Muda ditabunihon Ia bohiNia, nada adong be sanga ise na marsuohonsa.

MASMUR 76:5

Madung dirampasi Ho angka halak na barani, tarsinok be halahi jana nada tarsunggul be i. Angka tentara na barani madung mago gogona i.

PODA 1:5

Marhite angka poda on, mur martamba do parbinotoan ni halak na bisuk, jana halak na pistar pe gabe dapotan panogu-noguon.

PARJAMITA 2:12

Sanga na bia pe anggo na tarpatupa sada raja, hum na nibaen ni angka raja na di jolona do i. Dung i mamungka hupikirkon sanga na bia do pangalahona muda marbisuk sada-sada halak, sanga loak sanga pe oto.

PARJAMITA 3:14

Huboto do na tongtong do adong salolot-lolotna sude pambaenan ni Debata. Nada tartambai sanga tarurahi jolma pambaenan i, haru hum saotik pe. Jana songon i do dibaen Debata, anso mabiar hita tuSia.

PARJAMITA 3:17

Ninna rohangku do di bagasan, uhumon ni Debata do halak na burju dohot halak na jahat, angke sude pangalaho dohot sude pambaenan na tarjadi do i di hatiha na nitontuhon ni Debata.

PARJAMITA 4:1

Dung i huparrohahon muse ma sada hageduhan na masa di tano on. Martangisan angka halak na hona sosak jana nada adong na ra mangurupi halahi. Umpe sahalak na ra mangurupi, harana godang do kuaso ni angka na manyosak i.

PARJAMITA 4:4

Laing huboto muse dope bahaso songon i situtuna jolma markarejo, hum hara ni na mangiburu paida-ida pandapotan ni hombar bagasna. Magopo do sudena i songon karejo na manangkup angin.

PARJAMITA 7:13

Parrohahon ma parkarejoan ni Debata. Harana ise ma he na tarbaen patigorkon sanga aha na nipageldok ni Debata?

PARJAMITA 9:2

Tutu do nian, sarupa do bagian na mandondoni ganop jolma: Halak na jujur sanga halak na jurngit, halak na burju sanga pe halak na jahat, halak na ias sanga pe halak na hodar, halak na manghaulkon haul sanga na so marhaul. Nada dumohar halak na burju sian halak na mardosa, mandosdos do halak na marsumpa dohot halak na so ra marsumpa.

PARJAMITA 9:3

Jadi, sarupa do bagian na mandondoni halahi sudena. Nada tigor songon i laing songon sude na masa na di tano on. Salolot di ngolu ni jolma i gok hajungkaton do rohana jana pikiranna pe gok haotoon do. Dung i tompu ma ro ajalna.

JEREMIA 46:6

Angka tentara na lobassa hipas marlojong, nada tolapsa maporus sian musu. Tartuktuk do halahi jana tinggang di Utara, di topi ni Batang aek Efrat i.

JEREMIA 48:14

Biasi didokkon halaklahi ni Moab, ‘Na gogo do hami, tentara na barani na dung tammat di bagasan parporangan?’

JEREMIA 9:23

Didok Tuhan ma, “Nada pola manggodang na pistar hara ni hapistaranna, halak na gogo hara ni hagogoanna, dohot halak na kayo hara ni sinadonganna.

DANIEL 4:35

Nada adong astuan ni bangso na di portibi on. Dirajai Debata do surusuruan na di banua ginjang dohot jolma na di tano on. Sahalak pe nada adong tarbaen mangalo hagiotNia, nada adong na puluk manyapai sanga aha na nibaenNia.

ZAKARIA 4:6

Disuru surusuruan i ma au palaluhon tu si Zerubabel tona ni Tuhan songon on, “Nada markite-hite gogo ni parangan jana nada muse marhite hagogoonmu sandiri gabe manjadi karejomu, tapi marhite tondingKu do ninna Tuhan Na Markuaso.

MALEAKI 3:18

Mangulahi ma idaon ni bangsongKu na asing do bagian ni halak na burju sian na jahat, bagian ni halak na marpangoloion tu Au dohot halak na so mangoloi tu Au.”

EPESUS 1:11

Debata do mangkarejohon sasudena hombar tu hagiotNia dohot haputusanNia sandiri. Sian mula ni mulana madung ditodo Ia hian hita hara ni por ni rohaNia anso markite-hite Kristus gabe halakNia hita,

PANGARATAION 8:17

Jadi, ulang diambang hamu hara ni pambaenan dohot gogomunu sandiri hamu gabe mamora.

PANGARATAION 8:18

Ingot hamu ma! Tuhan Debatamunu i do na mambaen mamora hamu. Patunda ni na laing setia do Ia lalu tu sadari on tu janji na nibaenNia dohot ompumunu umbaen na dipatupa Ia na songon i.

1 SAMUEL 17:50

Songon i ma dibaen si Daud manaluhon halak Pilistin i marhite ambalang dohot batu; ditaluhon dohot dibunu ia do halak Pilistin i, so pola mardongan podang.

1 SAMUEL 6:9

Parrohahon hamu ma pardalanna i; muda mardalan adop luatna i sandiri do, i ma tu kota Bet-Semes, i ma tandana bahaso Debata ni halak Israel i do na parohon hamamago na jorbut i tu hita. Tapi muda nada kehe tusi, botoonta ma na so sian Debata ni Israel haroroan ni hasusaan i, tapi na ro songon i sajo do i.”