PARJAMITA 12:13 - BIBEL JAMITA NA DENGGAN

¹³ Dung hutimbang sasudena, on ma na dapot au panyimpulina. Habiari ma Debata jana oloi ma sude parentaNa, angke hum na giot tusi do jolma i ditompa.

PARJAMITA 12:13 ပူးပေါင်းရင်းမြစ်များ

PAMUNGKAAN 22:12

“Ulang palalu tanganmu tu dakdanak i sanga dihahua ho ia,” ninna surusuruan i. “Saonnari madung huboto sangapmu dohot pangoloimu tu Debata, angke nada manjua ho pasahat anakmu sisada-sada i tu Debata.”

1 RAJA-RAJA 2:3

Patulus ma sanga aha na niparentahon ni Tuhan Debatamu tu ho. Oloi ma sude tona dohot angka parentaNia na tarsurat di buku ni si Musa, anso sai maruntung ho sanga tudia pe ho kehe dohot di sude sanga aha na nikarejohonmu.

JOB 28:28

Didok Debata ma tu jolma, “Angkon pasangopanmunu do Debata anso maruli bisuk hamu. Angkon mandao do hamu sian hajahatan anso dapotan parbinotoan hamu.”

MASMUR 111:10

Biar mida Tuhan, i do mula ni habisukon; sanga ise na mangkarejohonna dapotan parbinotoan. Nipuji ma Ia salolot-lolotna!

MASMUR 145:19

Dipasonang Ia do roha ni angka na burju marugamo, ditangihon Ia do pio-pio ni halahi jana dipalua Ia.

MASMUR 147:11

Lomo do roha ni Tuhan tu halak na burju, tu halak na tongtong mararop ni roha tu holongNia.

PODA 1:7

Laho maruli habisuhon angkon jumolo halak marpangkilalaan sangap dohot biar maradopkon Tuhan. Layas do roha ni halak na oto maradopkon habisuhon jana nada ra i niajaran.

PODA 19:23

Biar mida Tuhan parohon hangoluan, jadi marbongin ma jolma di bagasan jop ni roha, nada ditinggang parhancitan.

PODA 23:17

Ulang iba mangiburu mida halak pardosa. Oloi ma torus Tuhan,

PARJAMITA 2:3

Hara ni pangonjar ni por ni rohangku anso gabe pistar, hupasada ma rohangku laho marsonang-sonang marhite na minum anggur dohot na marpesta-pesta. Ninna rohangku songon i ma dalanna na dumenggan di jolma laho mangkilala ngoluna na pendek i di tano on.

PARJAMITA 3:14

Huboto do na tongtong do adong salolot-lolotna sude pambaenan ni Debata. Nada tartambai sanga tarurahi jolma pambaenan i, haru hum saotik pe. Jana songon i do dibaen Debata, anso mabiar hita tuSia.

PARJAMITA 5:7

Songon nipi bahat na so adong artina, laing songon i muse ma na so marguna bahat hata-hata. Tapi habiari ma Tuhan.

PARJAMITA 6:12

Bia do pamboto ni jolma sanga aha na dumenggan disia di bagasan ngoluna na pendek jana na so marguna, jana na salpu songon halinu? Bia do baenon ni jolma mangastui sanga aha na giot masa di tano on dung so adong be ia?

PARJAMITA 7:18

Pasiding ma parkotian godang ni na dua i. Muda nihabiaran Debata, angkon malua do hita.

PARJAMITA 8:12

Haru pe dibaen sada pardosa saratus hajahatan, laing totop do ia mangolu jana umurna ginjang. Ninna, sanga ise na mangoloi Debata, mur maradu mura do ngoluna.

PARJAMITA 8:5

Halak na mangoloi parenta, sai na malua do i jana sonang. Halak na pistar diboto do sanga andigan jana bia mangoloi raja.

MIKA 6:8

Nada! Madung dipaboa Tuhan tu hita sanga aha na denggan. Anggo na nipangido ni rohaNia sian hita, i ma anso tigor pambaenanta, tadalankon ma holong ni roha, jana mangoku di bagasan toruk ni roha di jolo ni Debatanta.

LUKAS 1:50

Sian sundut tu sundut do holong ni rohaNia maradopkon halak na mabiar tuSia.

PANGARATAION 10:12

“Saonnari hamu ale angka dongan sabangso, parate-atehon hamu ma na nituntut ni Tuhan Debatamunu sian hamu: Maribadat tu Tuhan ma hamu jana patulus hamu sandok na niparentahonNia. Haholongi hamu ma Ia, sian sandok rohamunu dohot tondimunu ma oloi hamu Ia,

PANGARATAION 10:20

Habiari hamu ma Tuhan Debatamunu, jana tuSia sajo ma hamu mangoloi. Sai hot ma hamu setia tuSia jana mangasahon goarNia ma baen hamu angka janjimunu.

PANGARATAION 4:10

taringot tu ari i di na jongjong hamu di adopan ni haroan ni Tuhan Debatamunu di Dolok Sinai. Didok Ia do di hatiha i tu au, ‘Palagut ma bangso i. GiotKu anso ditangihon hamu sanga aha na giot sidokkononKu, anso marsiajar halahi marpangoloion tu Au sapanjang mangolu halahi jana anso diajari halahi angka dakdanak ni halahi marpangoloion tu Au.’

PANGARATAION 4:2

Sandok na huparentahon i, ulang tambai sanga urahi hamu saotik pe. Oloi hamu ma angka parenta ni Tuhan Debatamunu na hulehen i tu hamu.

PANGARATAION 6:2

Salolot mangolu hamu dohot pomparanmunu sai habiari hamu ma Tuhan Debatamunu jana oloi hamu ma sude aturanNa na giot silehenonku tu hamu, anso ginjang umurmunu di tano i.

1 PETRUS 2:17

Pantun ma hamu tu sude halak, haholongi hamu ma donganmunu sahaporsayaan tu Kristus. Habiari hamu ma Debata jana pasangap ma Kesar i.

HALUMBAAN 19:5

Jadi tarbege ma sian habangsa i hata na mandok, “Puji ma Debatanta, ale hamu angka naposoNia, hamu angka na mabiar mida Ia, bope na menek, bope na magodang!”

1 SAMUEL 12:24

Pasangap hamu ma Tuhan i jana mangoloi tuSia ma hamu di bagasan na tigor dohot sian sandok rohamunu. Ingot hamu ma angka pangalaho na godang na dung dibaen Ia di hamu.