PANGARATAION 8:14 - BIBEL JAMITA NA DENGGAN

¹⁴ jamot ma hamu anso ulang gabe manyombong hamu jana lupa tu Tuhan Debatamunu na dung paluahon hamu sian Mesir, ingananmunu diparhatoban.

PANGARATAION 8:14 ပူးပေါင်းရင်းမြစ်များ

2 RAJA-RAJA 14:10

Hara ni na dung talu dibaen ho halak Edom ale Amasia, gabe ginjang ma rohamu. Dumengganan ma marmoga-moga ho hara ni hamonanganmi, di bagasmu ma ho. Aha ma gunana di ho mangalap-alapi hasusaan na hum pabaen-baen mago tu ho sandiri dohot tu rayatmu?”

2 RAJA-RAJA 17:38

jana ulang halupahon hamu parjanjian antara Au dohot hamu.

2 JUJUR TAON 26:16

Dung gogo Raja Usia gabe ginjang ma rohania, jana i ma na maroban ia tu hasegoan. Dilanggar ia ma parenta ni Tuhan Debatania, harana masuk ma ia tu Bagas Ni Debata laho manutung dupa di ginjang ni langgatan pardupaan.

2 JUJUR TAON 32:25

Tapi hara na ginjang rohania, nada mandok tarimakasi ia hara ni hamalumon na nilehen ni Tuhan i tusia. Jadi hara ni i gabe muruk ma Tuhan tu Juda dohot Jerusalem.

MASMUR 106:21

Dihalupahon halahi do Debata na paluahon halahi, na dung patupahon angka pangalaho na godang di Mesir,

MASMUR 78:7

Jadi laing dohot muse ma halahi mambaen Debata gabe arop ni rohana, nada lupa di angka pambaenanNia, tapi gabe burju mangoloi parentaNia.

HARURUAR 13:3

Didok si Musa ma tu halak Israel, “Ingot hamu ma ari on ari haruruarmunu sian Mesir inganan parhatobanonmunu. On ma arina Tuhan paluahon hamu marhite kuasoNia na godang i. Ulang pangan hamu roti na marragi.

JEREMIA 2:31

O hamu Israel, tangihon ma angka hatangKon. Unjung ma he Au songon padang halongonan maradopkon hamu, sanga songon tano na golap bulita jana na gok parmaraan? Hape biasi didok hamu sai na giot bebas hamu, jana nada ra be mulak mangulahi tu Au?

JEREMIA 2:6

Nada diantoi halahi Au; Au do nian na dung manogu halahi di dalan, jana na maroban halahi ruar sian Mesir, manyalpui parhorsihan; tano gariang na margaba-gobi, boti na harsang gok parmaraan padang na so diingani jana nada adong mamolus sian i!

JEREMIA 23:27

na mambaen bangsongKu mangkalupahon Au, marhite nipi na dicaritohon sian na sada tu na asing, songon ompu ni halahi na manghalupahon goarKu hara ni Baal.

DANIEL 11:12

Dung i ginjang ma rohania hara ni hamonangannia i dohot hara ni bahat ni musu dimatehon ia, tapi nada sai torus ia monang.

HOSEA 13:6

Hape dung lalu hamu di tano na denggan jana butongan hamu lopus sombu, gabe ginjang ma rohamunu jana lupa ma hamu tu Au.

BILANGAN 15:39

Hasaya ni rambu-rambu i gabe parningotan ma i. Ganop diida hamu i ingotonmunu ma sude parentangKu jana angkon patulusonmunu. Jadi hara ni i nada hudukkononmunu be Au giot patuluskon lungun ni rohamunu dohot hagiotmunu sandiri.

PANGARATAION 13:6

Ompot kahanggimu, sanga anakmu sanga borumu, sanga dongan saripe haholonganmu, sanga ale-alemu di na sip-sip mangelek-elek ho anso marsomba tu angka debata na asing, i ma tu angka debata na so jungada hian dope disomba ho dohot ompumunu,

PANGARATAION 17:20

Muda marsitutu ia manyise i, gabe nada momo be ia marpikir mandok na dumenggan ia sian halak Israel na asing i, jana nada be langgaronnia parenta ni Tuhan sanga na bia pe dalanna. Jadi mamarenta ma ia dohot pomparannia di bangso Israel marsundut-sundut.”

PANGARATAION 4:9

Parrohahon jana denggan ingot hamu, anso ulang lupa hamu sapanjang mangolu di sude na nisaksihonmunu sandiri. Baritahon hamu ma i di pomparanmunu,

PANGARATAION 5:6

Ninna Debata ma, ‘Au do Tuhan Debatamu, na maroban hamu ruar sian tano Mesir, sian inganan parhatobanan i.

PANGARATAION 6:11

Gok angka barang-barang na denggan angka bagasna i, jana nada ho na pamasukkonsa. Dapotonmu ma angka sumur, jana nada ho na mangkuarsa, angka kobun anggur dohot zetun, jana nada ho na manyuansa. Muda dioban Tuhan ho tu luat i, jana gabe butong ho,

PANGARATAION 8:11

“Jamot ma hamu, anso ulang jabat dihalupahon hamu Tuhan Debatamunu; sian sude parentaNia na Hulehen tu hamu sadari on, ulang adong sada pe na nipasidingmunu.

PANGARATAION 8:13

jana muda dung martamba lombu, hambeng dohot biri-birimunu, perak dohot seremunu, maradu sude arta sinadongan na asing i,

HAKIM-HAKIM 3:7

Dung i mardosa ma mangulahi halak Israel tu Tuhan, Debata ni halahi. Lupa ma halahi tuSia gabe marsomba halahi tu angka gana-ganaan Baal dohot Asera.