Dung i didok Tuhan Debata ma tu ulok i, “Hona uhum ma ho hara ni pangalahomi; sian sude na margoar binatang, hum ho ma manaon bura na songon on; mamungka sian on, manjurur noma ho dohot butuhamu, jana abu noma panganonmu salolot ho mangolu.
Rap manjampal ma sorigala dohot anak ni biri-biri, singa pe mangan durame songon lombu, jana ulok pe mangolu sian abu. Di sude dolokKu Na Badia i nada adong be na mangarugi i, sanga mambaen na jahat,” ninna Tuhan.
Muda kehe au tu padang, huida ma angka bangke na nipangan ni porang. Di bagasan kota huida parkancitan; angka jolma na giot mate malean. Didalankon panurirang dohot malim langgamanna so diboto sanga aha na nipambaenanna.”
Au Tuhan, madung Hutontuhon opat pangalaho na jorbut giot masa tu halahi; marmatean ma halahi di parporangan, sarat-saraton ni anjing ma bangke ni halahi, papanganan ni unggas jana pangabison ni binatang panyoro.
Marmatean do halahi hona nyae na mambaen mate, jana marmatean ma halahi di parporangan sanga mate tangkuraparon. Sahalak pe nada adong na manangisi halahi sanga na manguburkonsa. Marampar do bangke ni halahi songon rompak-rompak di tano i, jana dipapangani unggas ma i dohot angka binatang.
Bolas do paroonKu angka binatang panyoro laho mamolgahi halak na adong di luat i, lopus gabe gok parmaraan luat i jana sahalak pe nada adong puluk mamolus.
Didok Tuhan Debata i: “DabuhononKu ma uhuman na jumorbut tu kota Jerusalem laho mamusa jolma bope pahan-pahanan. Uhuman i, i ma: Porang, tangkuraparon, binatang panyoro dohot nyae.
ParoonKu ma angka binatang na parohon parmaraan tu tonga-tongamunu. Soroanna ma angka anakmu, mamunu pahan-pahananmu pasudehon hamu, gabe saotik ma bilanganmunu, gabe lungun angka dalan na adong di luatmunu.
Muda martabuni halahi di puncu ni Dolok Karmel, jalahanKu jana tangkuponKu halahi. Muda martabuni halahi tu toru ni laut adu i, parentahononKu do naga laut laho manurbing halahi.
Gabe songon ulok ma halahi mandilati tano, jana songon angka binatang na manjulur di tano i; humitir ma halahi ruar sian bentengna jana ro ma tu jolo ni Tuhan Debatanami, humitir marhite biar tu Ho.
Uhumon ni Tuhan ma ho dohot ragam ni nyae na posi, tbc, milas, radang. ParoonNia ma logo ni ari dohot alogo na mangombuskon lopus sego suha ni ladangmunu. Sai marpupu ro do bala on taononmunu lopus mate hamu sude.
Hara ni i ma gabe angkon mangoloi ho tu angka musu na giot sitongoson ni Tuhan laho mangalo ho. Tangkuraparon, manguas jana marsaemara ma ho – hurangan di sasudena. Kejam baenon ni Tuhan manyosak ho lopus abis ho.
Di na nihobuk ni angka musumunu angka hutamunu, topet ma ho hatiha mandele hara ni na tangkuraparon, gabe papangananmunu ma angka dakdanakmunu sandiri na nibasa-basahon ni Tuhan Debata tu ho.