PANGARATAION 31:12 - BIBEL JAMITA NA DENGGAN

¹² Suru ma marlagut sude halaklahi, dadaboru dohot dakdanak, dohot halak sileban na maringanan di hutamunu laho manangihon anso marsiajar halahi pasangapkon Tuhan Debatamunu, dohot manghaburjuhon mangoloi angka pangajaranNia.

PANGARATAION 31:12 ပူးပေါင်းရင်းမြစ်များ

ESRA 10:1

Jadi taran na martangiang i si Esra lalu na tangis ia mangaku dosa di Bagas Ni Tuhan i, bahat sajo do halak Israel ro marlagut, halaklahi bope dadaboru dohot angka dakdanak. Dihuliangi halahi ma ia lalu tangis mangangguhi.

HAMALIMON 9:5

Sude na nitonahon ni si Musa i, dioban halahi ma tu jolo ni Bandar Parmianan, lalu marlagut ma sude na bahat i disi laho manyomba Tuhan.

HAGAI 1:12

Dung i ditangihon si Zerubabel, anak ni si Sealtiel dohot Malim Godang Josua, anak ni si Josadak maradu sude halak Israel ma sora ni Tuhan Debata ni halahi, ditangihon muse dohot hata ni Panurirang Hagai, hombar tu sora ni Tuhan Debata ni halahi tusia, jadi mabiar ma bangso i maradopkon Tuhan.

JOHANNES 5:39

Diparsiajari hamu do nian Buku Na Badia i angke dipikir hamu dapot hamu ma hangoluan na so mantak i muda dung diparsiajari hamu i. Jana Buku Na Badia i sandiri pe disaksihon i do taringot tu Au!

PANGARATAION 29:29

Adong do sanga na piga pangalaho na nitabunihon ni Tuhan Debatanta; tapi anggo UhumNia madung nian dipatangkas Ia tu hita, jana angkon oloanta do i dohot pomparanta salolot-lolotna.”

PANGARATAION 29:9

Jadi sai burju ma hamu antong mangoloi sude hata na sian parjanjian on anso mardohar hamu di sude na nibaenmunu.

PANGARATAION 31:13

Jadi songon on ma dalanna di angka pomparanmunu na so jungada dope umbege Uhum Ni Tuhan Debatamunu i laho manangihonsa. Jana di na songon i, marsiajar ma halahi mangoloi Tuhan salolot mangolu halahi di tano na so sadia lolot nari be giot buatonmunu di bariba ni Batang aek Jordan.”

PANGARATAION 4:10

taringot tu ari i di na jongjong hamu di adopan ni haroan ni Tuhan Debatamunu di Dolok Sinai. Didok Ia do di hatiha i tu au, ‘Palagut ma bangso i. GiotKu anso ditangihon hamu sanga aha na giot sidokkononKu, anso marsiajar halahi marpangoloion tu Au sapanjang mangolu halahi jana anso diajari halahi angka dakdanak ni halahi marpangoloion tu Au.’

JOSUA 8:33

Marjongjongan ma paadop-adop angka halak Israel, diholang-holangi Poti Parjanjian ni Tuhan dohot angka pamimpin, angka panglima, angka hakim dohot angka halak sileban na maringanan di tonga-tonga ni halahi, mangadop be tu angka Malim Levi na mamorsan Poti Parjanjian i. Satonga ma sian halahi mangadop tu Dolok Gerisim jana satonga nari mangadop tu Dolok Ebal. Madung diparentahon si Musa naposo ni Tuhan i hian do anso baenon ni halahi songon i muda dung dapot hatihana jagiton ni halahi pasupasu na nijanjihon ni Tuhan.

JOSUA 8:35

Pasada-sada sude parenta ni si Musa na tarsurat di bagasan Buku Tona Ni Tuhan i disise si Josua tu sandok halak na marlagut disi, dohot ma disi angka dadaboru, angka dakdanak, dohot angka halak sileban na tinggal di tonga-tonga ni halak Israel.