PANGARATAION 30:19 - BIBEL JAMITA NA DENGGAN

¹⁹ Saonnari bolas ma pilionmunu, hangoluan sanga na hamatean, pasupasu ni Tuhan sanga na buraNia. Langit dohot tano hupio gabe saksina di haputusan sibaenonmunu. Antong pili hamu ma hangoluan.

PANGARATAION 30:19 ပူးပေါင်းရင်းမြစ်များ

PAMUNGKAAN 2:17

asing sian hayu na mangalehen parbinotoan taringot tu na denggan dohot na jahat. Nada tola panganonmu batuna i; muda dipangan ho i, mate ma ho laing di na sadari i.”

MASMUR 119:111

ParentaMu do pusako di au salolot-lolotna, na mambaen rohangku marmoga-moga.

MASMUR 119:173

Sai urupi ma tongtong au angke huoloi do antong paraturanMu.

MASMUR 119:30

Madung diputuskon rohangku laho mangoloi, sai huingot-ingot do parentaMi.

PODA 1:29

Nada jungada porlu dihilala hamu parbinotoan. Sai na matua losok do rohamunu mangoloi Tuhan.

PODA 12:28

Hasintongan do dalan tu hangoluan; tapi tu hamatean do dalan ni na jahat.

PODA 8:36

Sanga ise na so mandapot au, mangarugii dirina sandiri, halak na manghasogohon au, hamatean do dihaholongi.”

PODA 9:11

Lehenon ni habisuhon do di ho umur na ginjang.

JESAYA 1:2

Didok Tuhan ma, “O, langit dohot tano tangihon ma na Hudok! Angka dakdanak na Hupature-ture mangalo do tu Au.

JESAYA 56:4

Tu halak sisongon i didok Tuhan do, “Muda dipasangap ho do Au marhite na marningot Ari Sabat, muda setia do ho tu parjanjianKu jana dipatulus ho na pasonangkon rohangKu.

JEREMIA 21:8

Dung i disuru ma au mandok tu bangso i songon on, “Tangihon! Au Tuhan, mangalehen tu hamu sada sipilion: Dalan na manuju tu hangoluan sanga dalan na manuju tu hamatean.

JEREMIA 32:39

LehenonKu ma tu halahi sada sajo tujuan ni ngoluna: i ma, pasangapkon Au salolot-lolotna; na patongon na denggan do i tu halahi sandiri, dohot tu pomparan ni halahi.

JEREMIA 42:21

Saonnari madung hupalalu tu hamu tona ni Tuhan Debatanta i, hape nada ra hamu mangoloisa.

JEHESKIEL 20:11

Disi ma Hulehen tu halahi angka parentangKu jana Huajarkon angka tona na sian Au sioloan ni halahi, angke mangolu do tongtong sanga ise na patuluskonsa.

LUKAS 10:42

Hape hum sada do na porlu! Jana madung ditodo si Maria na denggan i, na so buaton be sian ia.”

BAENON NI ANGKA RASUL 2:39

Angke tu hamu do ale angka dongan, dohot tu pomparanmunu, songon i muse tu angka halak na maringanan di na dao do na nijanjihon ni Debata i – i ma sudena halak na nipiohon ni Debata Tuhanta i anso ro tuSia.”

PANGARATAION 11:26

Sadari on hulehen di hamu sada ombas laho mamili pasupasu sanga bura.

PANGARATAION 30:1

“Saonnari bolas ma pilionmunu pasupasu sanga bura. Muda dung tarjadi sudena i tu dirimunu, jana maringanan di tonga-tonga ni angka bangso na asing hamu di inganan parserahanmunu dibaen Tuhan, tarsingot ma hamu di sipilion na hulehen tu hamu.

PANGARATAION 30:15

Sadari on bolas ma pilionmunu hangoluan dohot na denggan, hamatean dohot hasusaan.

PANGARATAION 30:16

Muda holong rohamunu tu Tuhan Debatamunu jana mangoloi hamu tuSia bope diihutkon hamu sandok uhum dohot parentaNia na hulehen tu hamu sadari on, gabe dapot hamu ngolu na sonang, jana gabe bangso na sonang. Pasupasuon ni Tuhan Debata ma hamu di tano na so sadia honok nari be giot siingananmunu.

PANGARATAION 31:17

Muda tarjadi songon i, hona muruk ma halahi baenonKu. TadingkononKu ma halahi, tabunihononKu ma bohingKu maradopkon halahi jana pangabison halahi. Marroan ma bahat parmaraan na ampe tu halahi, jana botoon ni halahi ma umbaen na masa pe songon i tu halahi, angke Au do antong Debata ni halahi, hape nada Hudongani be halahi.

PANGARATAION 31:28

Antong, suru hamu ma marlagut sude pamimpin ni marga dohot angka ulubalang di jolongku, anso hupalalu angka pangalaho on tu halahi. Langit dohot tano ma hupiohon gabe saksina maradopkon halahi.

PANGARATAION 32:1

“Tangihon, o langit, giot mangkuling au, o tano, patinggil ma pinggolmu!

PANGARATAION 4:1

Dung i didok si Musa ma tu bangso i, “Oloi hamu ma sude aturan na huajarkon tu hamu, anso tola hamu mangolu dohot mangingani tano na giot silehenon ni Tuhan, Debata ni ompumunu tu hamu.

PANGARATAION 4:25

Muda dung honok hamu sanoli on maringanan di luat i, jana madung maranak marpahompu, ulang muse mardosa hamu hara ni na mambaen di dirimunu patung ni bagi aha sajo pe. Hajahatan do pangalaho na songon i di adopan ni Tuhan, jana na mambaen bonsir gabe muruk Ia.

PANGARATAION 4:26

Langit dohot tano ma na gabe saksimunu sadari on, muda ampot nada marpangoloion hamu tu na hudok i, manigor mago ma hamu sian tano na giot siingananmunu na di ipar ni Batang aek Jordan i. Nada pola honok hamu tinggal disi, tapi roncohononkon do sudena.

PANGARATAION 4:6

Patutna ma nian setia hamu patuluskon sude aturan i. Muda dibaen hamu songon i, nalnal ma abisuhonmunu maradopkon angka bangso na asing i. Muda dibege halahi taringot tu angka aturan i, dokkonon ni halahi ma, ‘Na bisuk jana na pistar ma da antong bangso na godang on!’

PANGARATAION 6:2

Salolot mangolu hamu dohot pomparanmunu sai habiari hamu ma Tuhan Debatamunu jana oloi hamu ma sude aturanNa na giot silehenonku tu hamu, anso ginjang umurmunu di tano i.

1 TIMOTEUS 5:21

Gomos pangidoanku tu ho di adopan ni Debata, dohot Jesus Kristus bope angka surusuruan todoan, anso diihutkon ho angka na hudok on so pola mardongan biar ni roha maradopkon sanga ise pe jana nada mamihak-mihak.