PANGARATAION 24:19 - BIBEL JAMITA NA DENGGAN

¹⁹ Muda palagutkon sagean ni gandum hamu, jana adong dope sasaotik na martinggalan gandum na dung disabi i, ulang be ulahi hamu mamuaisa. Angkon tadingkonon do gandum i baen di halak sileban, di na so marama, dohot di angka na mabalu, anso dipasupasu Tuhan Debatamunu i hamu di sandok na nibaenmunu.

PANGARATAION 24:19 ပူးပေါင်းရင်းမြစ်များ

JOB 42:12

Dipasupasu Tuhan ma si Job, maradu marlobi-lobi di angka ngolunia na tinggal i, lumobi sian dompak so masa sitaononnia i. Adong do opat bolas ribu bahatna hambeng biri-biri ni si Job, onom ribu untonia, dua ribu lombu dohot saribu halode.

MASMUR 112:9

Dilehen ia do sidoka tu halak na pogos, jana dibagihon ia sinadonganna sian burju ni rohana; sai marpupu do ia mambaen na denggan, hara ni i ma umbaen na markuaso ia jana dipasangap.

PODA 14:21

Sanga ise na palayas halak, mambaen dosa; sanga ise marroha na denggan tu halak na pogos, martua.

PODA 19:17

Mangurupi halak na pogos tudos do na pasalihon tu Tuhan; laing Tuhan muse ma na paulakkon.

JESAYA 32:8

Tapi anggo halak na burju roha sai na tigor do i jana pir do i mampartahankon na tigor.

HAMALIMON 23:22

Muda manyabi hamu, ulang sabi hamu gandum na tubu di topi ni ladang i jana nada tola mulak hamu papungu turiangna. Tinggalkon ma i baen di halak na dangol dohot di halak na leban. Tuhan do Debatamu.

LUKAS 6:35

Anggo sapatutna nada songon i! Anggo hamu angkon suhar-suhar ni i do. Angkon haholonganmunu do musumunu jana baen hamu ma na denggan tu halahi. Angkon lehenonmunu do manginjam jana ulang pola arop rohamunu dapotan garar mangulahi. Godang do dapot hamu upa ni i jana gabe anak ni Debata Na Gumincat i ma hamu. Angke anggo Debata, denggan do dibaen Ia maradopkon angka na so malo mandok tarimakasi, songon i muse laing denggan do dibaen Debata maradopkon halak na jahat.

LUKAS 6:38

Lehen hamu ma tu halak na asing, anso laing dilehen Debata muse tu hamu; jagiton ni tanganmunu ma silehen-lehen maruse-use na dung nisuhat di hamu. Angke parsuhatan na nipakemunu tu halak na asing, laing i do parsuhatan na nipake tu hamu.”

PANGARATAION 14:29

I ma panganon baen di halak Levi, angke nada adong antong tano ni halahi, songon i di halak na asing, di na so marama so marina dohot di angka na mabalu na maringanan di angka hutamunu. Tola do halahi ro dohot mambuat sandok na porlu di halahi. Muda dibaen hamu songon i gabe pasupasuon ni Tuhan Debatamunu ma hamu di sude na nikarejohonmunu.”

PANGARATAION 15:10

Lehen hamu ma tu halak i sian na nionjar ni roha dohot sian basa ni roha, jadi gabe pasupasuon ni Tuhan ma sude karejomunu.

PANGARATAION 24:18

Ingot hamu ma na jungada do hamu gabe hatoban di Mesir jana na dung dipalua Tuhan Debatamunu do hamu; hara ni i ma da umbaen na hulehen aturan on tu hamu.

PANGARATAION 26:13

dokkon hamu ma tu Tuhan, ‘Sian na saparsampulu pandapotan ni na hukarejohon na patut gabe nampuna ni Tuhan, saotik pe nada adong be tinggal di bagasku; madung hulehen sude di halak Levi, halak sileban dakdanak na so marama, dohot di angka na mabalu songon na diparentahon ni Tuhan tu au. Sada pe nada adong na hulanggar sian parenta ni Tuhan salaho tu parsampuluan i.

RUT 2:16

Denggan do sangajo hamu manguldus sasaotik sian na dung nitambatan i, jana dabuhon hamu baen disia anso adong jomputannia.”

RUT 2:2

Sanoli didok si Rut ma tu si Naomi, “Kehe au jolo namboru tu ladang laho mamuai burir-burir na nipardabuhon ni angka parkarejo i. Pos do rohangku sai adong do i halak na paloaskon au mambaen songon i.” “Denggan, maen!” ning si Naomi mangalusi, “kehe ma da ho.”