Dung i angkon basuon ni halahi ma pakeanna, obukna pe angkon dicukur sude lalu maridi. Dung i ias ma ia, tola ma ia masuk tu parbandaran i, tapi pitu ari honokna nada tola ia masuk tu bandarnia sandiri.
Di ari papituhon angkon cukuronnia mangulahi ulunia, dung i janggutna, salibonna dohot sude imbulu na di pamatangnia angkon dicukur. Dung i angkon dibasu ia pakeannia lalu maridi. Dung i pe ias ma ia mangihutkon ugamo.
Muda gabe hodar obuk ni sada halak nasir na dung mardohonan tu Tuhan hara ni na topet ia di lambung ni sada halak na mate ompot, angkon painteonnia pitu ari honokna dung i angkon dicukur ia obuknia dohot janggutnia disi pe anso ias ia.
Jana muda adong dadaboru na martangiang, sanga manyurirangi ia, hape inda marbasaen ulunia, na pabilehon ulunia i do i. Gabe tarsongon na marcukur ma ia muda songon i.
Angke muda so ra dadaboru marbasaen, gumonan do nipangkas obukna i. Tapi muda marcukur sanga nigusting obukna i, gabe halayasonnia do i. Antong, gumonan do marbasaen dadaboru.