PANGARATAION 16:15 - BIBEL JAMITA NA DENGGAN

¹⁵ Pitu ari honokna angkon hagodangkononmunu pesta on laho pasangapkon Tuhan di inganan paribadatan na sada i. Marjop ni roha ma hamu hara ni na nipasupasu ni Tuhan panen dohot karejomunu.

PANGARATAION 16:15 ပူးပေါင်းရင်းမြစ်များ

NEHEMIA 8:17

Sude do rayat na mulak sian habuangan i mambaen undung-undung, lalu tinggal disi ma halahi. On ma na parjolo situtu dipamasa mamungka sian hatiha ni si Josua anak ni si Nun. Jadi sude do halahi sonang jana marjop ni roha.

ESTER 9:22

Harana di ari i ma antong halahi manaluhon angka musu ni halahi, gabe muba ma pardangolan dohot hapariron ni halahi gabe jop ni roha dohot hamogaan. Jadi hara ni i angkon rayahonon ni halahi do angka ari i marhite pesta dohot parjamu-jamuan lalu marsipiringan sipanganon dohot mangalehen sidoka tu halak na miskin.

PANGARATAION 12:5

Sian sude luat na masuk tu angka marga ni Israel, pilion ni Tuhan ma sada inganan maribadat di bangsonta anso tarbaen hita ro tu adopan ni Tuhan laho manyomba Ia.

PANGARATAION 16:10

dung i pestahon hamu ma Pesta Gotilon laho pasangapkon Tuhan Debatamunu. Oban hamu ma di ari i haul sian na nionjar ni roha tuSia marguru tu bahat ni rasoki na nilehenNia di hamu.

PANGARATAION 16:14

Marmoga-moga ma hamu rap dohot angka dakdanakmunu, angka hatobanmunu, halak Levi, halak sileban, dakdanak na so marama dohot angka na mabalu na maringanan di hutamunu.

PANGARATAION 16:16

Angkon ro do sude halaklahi ni Israel manyomba Tuhan di inganan paribadatan na sada i tolu noli sataon: Di Ari Pesta Paskah, Pesta Gotilon dohot di Pesta Undung-undung Bulung Rata. Angkon ganop be marsioban haulna,

PANGARATAION 30:16

Muda holong rohamunu tu Tuhan Debatamunu jana mangoloi hamu tuSia bope diihutkon hamu sandok uhum dohot parentaNia na hulehen tu hamu sadari on, gabe dapot hamu ngolu na sonang, jana gabe bangso na sonang. Pasupasuon ni Tuhan Debata ma hamu di tano na so sadia honok nari be giot siingananmunu.

PANGARATAION 7:13

HaholonganNia jana pasupasuonNia ma hamu, anso mur mabahat bilanganmunu; pasupasuonNia angka ladangmunu, anso gabe haroroan ni gandum, anggur dohot miak zetun. PasupasuonNa ma hamu marhite lombu dohot biri-biri na bahat. Lehenon ni Tuhan ma sude pasupasu i tu hamu di tano na giot silehenonNia tu hamu hombar tu janjiNia dohot ompumunu.