PAMUNGKAAN 48:7 - BIBEL JAMITA NA DENGGAN

⁷ Hara ni inangmu si Rahel do da hubaen songon i. Sun do arsak ni rohangku di parmonding ni inangmi di Kanaan, nada pola sadia dao sian Efrata, di pardalananku laho mulak sian Mesopotamia. Disi do ia dikuburkon, di topi ni dalan laho tu Efrata.” (Betlehem do diboto halak saonnari Efrata i.)

PAMUNGKAAN 48:7 ပူးပေါင်းရင်းမြစ်များ

PAMUNGKAAN 25:20

Marumur opat pulu taon ma si Ishak di na marripe ia dohot si Ribka, iboto ni si Laban, boru ni si Betuel. (Halak Aram na di Mesopotamia do anggo si Betuel.)

PAMUNGKAAN 33:18

Di pardalanan na sian Mesopotamia lalu ma si Jakob horastorkis tu Sikem na di Kanaan, jadi dipajongjong ia ma bandarnia di sada padang-padang na donok tu kota.

PAMUNGKAAN 35:20

Dipajongjong si Jakob ma sada batu parningotan disi, jana lalu tu saonnari laing tanda dope kuburan ni si Rahel hara ni batu i.

PAMUNGKAAN 35:9

Dung mulak si Jakob sian Mesopotamia, dipataridahon Debata muse dope diriNa tusia jana dipasupasu ia.

PAMUNGKAAN 48:6

Betak sai adong dope tamba dakdanakmu, nada etongon be i songon dakdanakku; si Efraim dohot si Manase do haroroan ni tean-teanan di halahi.

MIKA 5:2

Hara ni i padiaronnia ma halahi lopus tubuan anak sada dadaboru na denggan hian pamatangna. Dung i pasadaonna ma mangulahi angka dongan sabangsona na adong di habuangan dohot bangso ni halahi.

MATEUS 2:18

“Tarbege ma sora di kota Rama i ma sora ni andung dohot na tangis hara ni parkancitan. Ditangisi si Rahel do angka dakdanaknia; nada ra ia niapoan angke ma mate sude dakdanaknia.”

RUT 1:2

Goar ni bayo i si Elimelek, goar ni dadaborunia si Naomi, jana goar ni anaknia na dua i si Mahlon dohot si Kilion do; halak Efrata do halahi sian Betlehem na di Juda. Dung lalu halahi di Luat Moab, tinggal ma halahi disi.

1 SAMUEL 1:1

Adong ma sada bayo na margoar si Elkana, sian Marga Efraim. Maringanan di kota Rama na di pardolohan Efraim do ia. Si Elkana on i ma anak ni si Jeroham jana pahompu ni si Elihu. Masuk tu horong Tohu jana masuk tu Marga Zup.

1 SAMUEL 10:2

Dung kehe ho manadingkon au di ari sadari on, marsuo ma ho dohot dua halak bayo di lambung kuburan ni si Rahel di Zelsah na di Luat Benyamin. Pabotohonon ni halahi ma tu ho, “Ma dapot angka halode na nijalahanmi. Nada sak be roha ni amangmu saonnari taringot tu angka pahan-pahanan i, tapi sai dipupu ia ma mambaen nasa na tarbaen ia anso dapot ho.”

1 SAMUEL 16:4

Dibaen si Samuel ma songon na nidok ni Tuhan i. Disi lalu ia di Betlehem, dialo-alo angka pamimpin ni kota i ma ia tarsonggot be jana disapai halahi ma, “Na maroban hahorasan dehe ulaning haroro ni ompu i?”

1 SAMUEL 17:12

Anggo si Daud, anak ni si Isai halak Efrata sian Betlehem na di Juda do. Adong do salapan anak ni si Isai jana dompak di zaman ni si Saul mamarenta, anggo si Isai madung matobang situtu.