PAMUNGKAAN 42:36 - BIBEL JAMITA NA DENGGAN

³⁶ Jadi didok amang ni halahi i ma, “Na por dehe rohamu agoan au di anakki sude? So adong be si Josep; si Simeon pe so adong be, saonnari si Benyamin muse noma na giot buatonmunu. Di au do da na dangolna!”

PAMUNGKAAN 42:36 ပူးပေါင်းရင်းမြစ်များ

PAMUNGKAAN 42:37

Jadi didok si Ruben ma tu amangnia i, “Muda nada huoban mangulahi si Benyamin, matehon ma anakki na dua i. Pasahat ma da ia tu au, huoban do ia mangulahi.”

PAMUNGKAAN 43:14

Sai ibo ma roha ni gubernur i mida hamu dibaen Debata Na Gumogo i anso ra ia paulakkon si Benyamin dohot si Simeon tu hamu. Anggo salaho tu au, muda na angkon sai na magoan ma di angka dakdanakki, padiar ma agoan au di halahi.”

PAMUNGKAAN 44:12

Tangkas ma dipareso parkobas ni si Josep i, dipungka ia ma sian harung ni siangkaan lalu tu harung ni sianggian i, jana dapot ma piala i di bagasan harung ni si Benyamin.

PAMUNGKAAN 45:28

“Hape na mangolu dope si Josep anakki baya!” ning ia. “Hum on noma giotku! Angkon kehe do au anso huida ia painte so mate au.”

PAMUNGKAAN 47:12

Jana dipasingkop si Josep ma haporluan ni balanjo di amangnia, di angka kahangginia dohot di sude koum sisolkotnia lopus tu na umposo pe.

JOB 7:7

Ingot ma, hum sangombus sordam do ngoluniba; simanolongku nada bisa be mangaligi na denggan.

MASMUR 34:19

Halak na burju, manaon bahat na hancit, tapi dipalua Tuhan do ia sian i sudena.

PARJAMITA 7:8

Dumenggan do ujung ni sada pangalaho umpado parmulaanna. Gumonan do hasobaron umpado ginjang ni roha.

JESAYA 27:9

Tapi anggo dosa ni Israel hum sada do dalanna anso tarsesa i, i ma muda digiling lamot songon soda angka langgatan parsombaan tu angka debata. Sandok panutungan ni hamonyan dohot tiang gana-ganaan Debata Asera angkon nisarsarkon muse.

JESAYA 38:10

“Pandokku, satonga umur dope angkon kehe ma au, tu pintu ni harbangan ni hamatean do au dipio lalu tu ujung ni ngolungku.

JESAYA 41:10

Ulang ho mabiar Au do rap dohot ho, Au do Debatamu, ulang heput ho. Hupatogu do ho, Hulehen pangurupion, Huondihon jana Hupalua ho.

JEREMIA 31:15

Didok Tuhan ma, “Tarbege do di Rama sora ni andung dohot na holsoan maradu na tangis monggung-onggung. Ditangisi si Rahel do angka dakdanakna, nada haapoan patunda ni anakna na dung soada.

MATEUS 14:31

Jadi manigor disurduhon Jesus ma tanganNia manangkup si Petrus. Dung i ninna Jesus ma, “Na hurang porsaya do ho, Petrus. Biasi pola ganggu rohamu?”

SURAT NI SI PAULUS TU PARLAGUTAN ROM 8:28

Taboto do, Debata do na mangatur sasudena, anso gabe manjalak tu dengganna di angka halak na mangkaholongi Ia jana na nipiohonNia hombar tu sangkapNia.

SURAT NI SI PAULUS TU PARLAGUTAN ROM 8:31

Aha ma he tardok hita taringot tu sudena i? Muda Debata donganta, ise ma he tarbaen mangalo hita?

1 KORINTUS 10:13

Sanga aha pe cobaan na nibolusmunu, cobaan na somal dialami jolma dope i. Tapi anggo Debata burju do marningot janjiNa. Nada pola dipadiar Ia hamu dicoba lobi sian na tolap gogomunu. Muda hatiha ro cobaan tu hamu, lehenonNia do dalan di hamu anso tahan hamu manaon cobaan i.

2 KORINTUS 4:17

Jana anggo hasusaan na so sadia on na hami taon santongkin, lehenon ni i do di hami hasangapan na so tarsuhat jana na manongtong. Dao dope gumodang hasangapan i sugari nipartimbangkon tu hasusaan i sandiri.

1 SAMUEL 27:1

Marpikir ma si Daud di bagasan rohania, “Bagi na bia pe, di sada hatiha angkon laing bunuon ni si Saul noma au. Jadi nada adong be dalan na asing di au sian na maporus tu tano ni halak Pilistin. I noma mangantak si Saul manjalahi au di Israel jana gabe malua au.”