PAMUNGKAAN 4:8 - BIBEL JAMITA NA DENGGAN

⁸ Jadi didok si Kain ma tu si Abel anggina i, “Beta jolo hita tu ladang.” Jadi di hatiha di ladang halahi dibalbal si Kain ma angginia i lalu dibunu ia.

PAMUNGKAAN 4:8 ပူးပေါင်းရင်းမြစ်များ

PAMUNGKAAN 4:25

Maruli anak dope si Adam dohot dadaborunia sada nari. Ning si Hawa ma, “Dilehen Debata dope baya di au sada nari anak gonti ni si Abel na nibunu ni si Kain i.” I ma umbaen si Set dibaen ia goar ni anaknia i.

2 SAMUEL 14:6

Adong do dua anakku halaklahi, jana di sada ari marbadai ma halahi. Jadi hara ni na so adong halak manyirang halahi, dibunu na sada ma na sahalak nari.

2 SAMUEL 3:27

Disi lalu si Abner di Hebron, dipiohon si Joab ma ia tu lambungnia, tu lambung ni pintu horbangan i tarsongon na giot mangkobari sada rahasia. Dung i ditiham si Joab ma butuha ni si Abner i lalu mate. Songon i ma si Abner hona bunu dibaen si Joab laho mambaloskon pamunuon tu si Asael angginia i.

2 JUJUR TAON 21:4

Dung togu dihilala si Joram parjuguknia songon raja, disuru ia ma mamunu sude angginia i dohot piga-piga halak parpangkat.

NEHEMIA 6:2

Jadi martona ma si Sanbalat dohot si Gesem tu au anso ro au mambaen parsuoan dohot halahi di sada huta di Rura Ono. Tapi huboto do bahaso na giot mambaen mara do halahi tu au,

JOB 11:15

Gabe benget ma iba jana margogo mangadopi ngolu. Hot ma parjongjongmu togu jana nada pola be marganggu.

MASMUR 139:19

Sugari dipusa Ho ma nian halak parjahat, ale Debata, jana padao ma sian au angka siduruskon mudar!

MASMUR 36:3

Gok sipaoto-oto, jahat angka hatana, anggo na denggan dohot habisuhon nada dibaensa.

MASMUR 55:21

Lambok ni hatania mangapus pusu-pusu, hape rohania gok hagigian. Pangkataina maradu lambok, hape manorusi songon podang na tajom.

HOSEA 4:2

Dibaen halahi janji hape nada digohi halahi; margabus, mamunu, manangko, manggampang do halahi. Martamba do hajahatan jana mardapot-dapot pamunuon.

MIKA 7:6

Angka anak halaklahi pabilehon amangna, anak dadaboru bangkit mangalo inangna, parumaen mangalo namboruna; marsalisi do halak na sabagas.

BILANGAN 35:20

Muda magigi sahalak tu na asing, lalu dibunu ia diumban, sanga didanggurkon ia sanga aha tu halak i,

MATEUS 23:35

Ujungna madabu ma tu hamu uhuman hara ni na nibunumunu sude angka na so marsala i mamungka sian pamunuon na tu si Abel na so marsala i lalu tu pamunuon na tu si Zakaria anak ni si Berekia na giot bunuonmunu di holang-kolang ni bilik na badia dohot inganan ni haul na di Bagas Ni Debata i.

LUKAS 11:51

Mamungka sian hamamate ni si Abel lopus tu hamamate ni si Zakaria, na nibunu di holang-kolang ni langgatan dohot Inganan Na Badia. Olo tutu, ‘Hudok ma tu hamu angkon tuntuton ma i tu halak sisaonnari on.

LUKAS 22:48

Tapi didok Jesus ma tusia, “O Judas, hape markite-hite pangummami ma dihianati ho Anak Ni Jolma i.”

IBRANI 11:4

Hara ni na porsaya, gabe dihaulkon si Abel do tu Debata haul na dumenggan ulang pado haul na nihaulkon ni si Kain. Hara ni haporsayaannia i, dijagit Debata do si Abel gabe songon halak na dumenggan; angke tangkas do i tarida di na nijagit ni Debata na nihaulkonnia i. Madung mate nian si Abel, tapi hara ni haporsayaannia i, gabe mangkobari dope ia lopus tu sadari on.

IBRANI 12:24

Diadopi hamu do Jesus pandomui na mambaen janji na imbaru i; diadopi hamu do mudar pamispison na gabe jaminan ni angka na dao dumenggan sian na nijamin ni mudar ni si Abel.

JUDAS 1:11

Marjaya ma halahi! Dalan ni si Kain do na nibolus ni halahi. Anso dapotan upa, gabe didohoti halahi do angka hasalaan songon na nibaen ni si Bileam. Jana mago do halahi hara ni na manggaori songon na nibaen ni si Kora.