PAMUNGKAAN 4:14 - BIBEL JAMITA NA DENGGAN

¹⁴ Dipaorot Ho do iba sian tano on, padaohon sian Ho dohot sian pangurupiMu. Mompas-ompas noma iba, nada adong bagas di tano on, jadi sanga ise na marsuo dohot iba bunuonna ma iba.”

PAMUNGKAAN 4:14 ပူးပေါင်းရင်းမြစ်များ

PAMUNGKAAN 3:24

Dung i muse, di sabola Habincaran ni kobun i, dibaen Tuhan Debata ma angka kerub na marpodang sidua baba na marputar humaliang laho manjago anso ulang adong sahalak pe mandonohi hayu na mangalehen ngolu i.

PAMUNGKAAN 4:13

Jadi ning si Kain ma tu Tuhan, “Madokdoktu do da uhuman i tu au, nada tarporsan iba.

2 SAMUEL 14:7

Jana saonnari gabe sude ma koum sisolkotku mangalo au jana marsituntut anso hupasahat anakki tu halahi anso bolas matehonon ni halahi, hara ni na dung dibunu ia angginia i. Muda baenon ni halahi ma songon i, gabe mamunjung noma sasada au, so adong be sada anak pe. Soadahonon ni halahi ma arop ni rohangku na sasada i jana nada adong be anak halaklahi na tinggal di halaklahingku laho patoruskon pomparannia.”

MASMUR 109:10

Sai gabe pangido-ido nian angka dakdanakna jana mompas-ompas, jana diusir sian sego-sego ni ingananna.

MASMUR 109:12

Sai ulang adong na burju halak tusia, sanga manghaholongi dakdanak na nitadingkonna i.

MASMUR 143:7

Alusi ma au saonnari, ale Tuhan, dibaen madung magotap arop ni roha. Ulang martabuni be tu au anso ulang songon halak na manuat tu hamatean au.

PODA 14:32

Mate do halak na jahat hara ni jahat ni parbuatanna; tapi malua do halak na burju hara ni hadenggananna.

PODA 28:1

Marlojongi do halak parjahat haru so adong na mangayak, tapi halak na tigor barani do songon singa.

JESAYA 8:22

sanga tu tano, umpe bagi aha idaon ni halahi asing sian hasusaan dohot hagolapan maradu haholomon na mandondoni, jana tu inganan na songon i ma halahi ditogu.

JEREMIA 52:3

Sun do muruk ni Tuhan maradopkon halak na maringanan di Jerusalem dohot halak Juda lopus nada ra be Ia mamparrohahon halahi. Dung i mangalo ma si Zedekia maradopkon si Nebukadnesar raja ni Babel.

HOSEA 13:3

Jadi hara ni i angkon mago ma angka jolma i songon nambur jana songon ombun manyogot. Songon durame di pardegean ma halahi na niombus ni alogo jana songon timus na ruar sian tataring.

HAMALIMON 26:17

Au do alomunu, gabe ditaluhon hamu jana halak na mangkagigihon hamu, gabe mangkuasoi hamu. Gok biar ma hamu, gabe marlojong hamu haru so adong mangayak-ayak.

HAMALIMON 26:36

Angkon tarbuang do hamu muse tu luat na leban, baenonKu habiaran tu hamu pola tehe hum umbege sora ni bulung-bulung na niombus ni haba-haba pe gabe mabiar hamu. Gabe marlojong ma hamu songon na diayak di parporangan, martinggangan ma hamu di hatiha so adong musu humaliang hamu.

BILANGAN 35:19

Koum sisolkot ni na tarbunu i, palalu uhuman mate. Muda padumpang ia dohot si pamunu i, dibunu ia ma i.

BILANGAN 35:21

sanga pe ditenju ia, sala do halakna i hara ni na mamunu, jadi halak i pe angkon niuhum mate. Sisolkot na dumonok tu na nibunu i do mambaen uhuman mate i. Muda marsuo ia dohot na mamunu i, dibunu ia ma i.

BILANGAN 35:27

hape marsuo dohot sisolkot ni na mate tarbununia i, gabe dibunu ma ia, nada na mamunu ia i.

MATEUS 25:41

Dung i didok Raja i ma tu halak na di siambirangNia i, ‘Morot ma hamu sian on, hamu angka na hona bura! Masuk ma hamu tu api na so ra mintop na niparade di Sibolis dohot di angka surusuruanna!

MATEUS 25:46

Hara ni i uhumon ma angka halak sisongon i dohot uhuman na manongtong. Hape anggo halak na mambaen lomo ni roha ni Debata mangolu ma halahi jana marjop ni roha dohot Debata.”

PANGARATAION 28:64

Paserahon ni Tuhan ma ho di tonga-tonga ni angka bangso, sian ujung na sada tu ujung na sada nari di tano on. Sombaonmunu ma disi angka debata na dibaen sian hayu dohot batu, i ma angka debata na so unjung hian disomba ho dohot ompumunu.

PANGARATAION 28:65

Sanga na di dia pe nada adong dapot ho hasonangan, nada adong sada inganan na tardok ho songon ho puna; baenon ni Tuhan ma ho gamang sajo, nada adong arop ni roha, jana gok pandelean.

2 TESSALONIKA 1:9

Uhumon ma halahi tu hamagoan na salolot-lolotna, dao sian adopan ni Tuhan i bope sian hasangapan ni hagogoanNia.