PAMUNGKAAN 18:19 - BIBEL JAMITA NA DENGGAN

¹⁹ Na Hupili do ia anso diparentahon ia tu angka dakdanaknia dohot tu pomparannia anso oloanna Au bope patulusonna sanga aha na denggan dohot na tigor. Muda mangoloi halahi, gohanKu ma janjingKu tu si Abraham.”

PAMUNGKAAN 18:19 ပူးပေါင်းရင်းမြစ်များ

PAMUNGKAAN 12:2

Hulehen pe bahat di ho pomparanmu jana gabe bangso na godang ma halahi. Hupasupasu pe ho jana tarbonggal pe goarmu Hubaen, lopus gabe pasupasu ho di halak na bahat.

PAMUNGKAAN 12:3

PasupasuonKu ma sanga ise na mamasumasu ho. Tapi buraanKu ma sanga ise na mamurai ho. Jana hara ni ho, pasupasuonKu ma sude angka bangso na di tano on.”

PAMUNGKAAN 17:9

Didok Debata dope tu si Abraham, “Ho pe angkon laing rade do maniop parjanjian on, bope ho bope pomparanmu marsundut-sundut.

PAMUNGKAAN 22:18

Pangidoan ni sude bangso na di tano on ma tu Au anso Hupasupasu halahi – hara ni na nioloanmu parentangKu.”

PAMUNGKAAN 35:2

Jadi didok si Jakob ma tu halahi na sabagas dohot tu sude halaknia, “Ambungkon hamu ma sandok dewa na asing na adong ditiop hamu; paias hamu ma dirimunu jana pake hamu ma pakean na ias.

2 SAMUEL 22:22

Huoloi do parenta ni Tuhanku, jana na so unjung marbalik au sian Debatangku.

2 SAMUEL 7:20

Aha dope na tardokkon au tu Ho? Madung diboto Ho sinasoada ni naposoMon.

1 JUJUR TAON 28:9

Jadi tu si Salomo, didok si Daud ma, “Amang, Debata na nisomba ni amangmu ma oku gabe Debatamu. Angkon oloanmu do Ia sian sonang dohot ias ni rohamu. Harana diboto Ia do sude pikiran dohot pos ni rohanta. Muda dijalahi ho Ia, gabe padumpang ma dohot Ia, tapi muda ditadingkon ho, tulakkononNia noma ho salolot-lolotna.

2 JUJUR TAON 14:3

Disingkirkon ia do angka langgatan ni bangso na asing dohot angka inganan parsombaan ni gana-ganaan. Disarsarkon ia do angka tugu ni debata jana diparrumpakkon ia do angka tiang ni Debata Asera.

NEHEMIA 9:7

Ho do Debata, Tuhan Na Sun Sasada. Dipili Ho do si Abram sian tonga-tonga ni bangsona. Ur di Babel madung tading dibaen ia, dibaen Ho sandiri do na mamimpinsa. Lalu dilehen Ho goar na imbaru disia: Mamungka sian i si Abraham noma dokkonon goarNia.

JOB 1:5

Ganop abis pesta, sai sigop do ngot si Job jana dihaulkon ia ma haul salaho tu angka anaknia i anso disesa Tuhan dosa ni halahi. Harana didok rohania betak na dung mardosa do angka dakdanaknia i jana pabilehon Debata sian na so pamotoanna.

MASMUR 1:6

Ditogu-togu Tuhan do anggo halak pangoloi, tapi anggo halak na jahat muli-muli tu hamagoan do i.

MASMUR 11:4

Maringanan Tuhan di BagasNa na badia, marhabangsa di banua ginjang do Ia. Angka jolma i sai dipaligi-ligiSa, sude karejo ni halahi diboto Ia.

MASMUR 34:15

Diparrohahon Tuhan do halak na daulat, muda pio-pio halahi, ditangihon Ia.

PODA 22:6

Ajarkon ma tu na poso parngoluon na pajop roha ni Tuhan, gabe songon i ma ngolunia sapanjangna.

JESAYA 38:19

Hum jolma na mangolu do na mamuji Ho, songon na hupatupa sadari on. Dibaritahon na matobang tu dakdanakna sanga songon dia burju ni rohaMu.

HAMALIMON 14:42

Dung i angka batu na diparuar i, gontion ma dohot batu na imbaru. Dingding batu ni bagas i angkon nilepo mangulahi.

AMOS 3:2

“Sian sandok bangso na di tano on, hum sasada hamu sajo do bangso na Hutanda dohot na Huantoi. I ma mambaen godang dosamunu, jana angkon uhumanKu hamu.”

MATEUS 25:17

Laing songon i muse ma na manjagit dua ribu hepeng perak i, maruntung ma ia dua ribu hepeng perak.

JOHANNES 10:14

Au do parmahan na denggan. Hutanda do angka biri-biringKu jana ditanda halahi do Au,

JOHANNES 21:17

Patolu-nolihon laing disapai Jesus dope tusia, “O Simon anak ni si Jona. Holong do rohamu mida Au?” ning Ia. Gabe marsak ma si Petrus hara ni na nisapaan ni Jesus i ia jabat tolu noli di na nidok ni Jesus, “Holong dehe rohamu mida Au?” Tapi laing dialusi si Petrus ma, “O Tuhan diboto Ho do Tuhan sasudena. Diboto Ho do Tuhan na holong rohangku mida Ho!” Dung i didok Jesus ma tusia, “Antong parmahani ma angka biri-biringKi.

BAENON NI ANGKA RASUL 27:31

Hara ni i, ninna si Paulus ma mandok tu perwira dohot angka soridadu i, “Muda nada tinggal halahi di kapal on, nada tarbaen hamu malua.”

EPESUS 6:4

Hamu angka dongan na dung mardakdanak! Ulang ma baen hamu na so patut tu dakdanakmunu anso ulang gabe muruk halahi. Tapi gumonan do ajari hamu halahi di aturan dohot pangajaran ni Tuhan.

PANGARATAION 32:46

didok si Musa ma, “Jagohon hamu ma anso oloi hamu sude parenta na hulehen tu hamu sadari on. Ajarkon hamu ma i tu angka dakdanakmunu, anso dioloi halahi sude pangajaran ni Tuhan i di bagasan haburjuon.

1 TIMOTEUS 3:12

Sanga ise na mangurupi di parlagutan, angkon laing sada halak sajo do dadaborunia. Angkon malo do ia mangatur angka dakdanakna dohot rumahtanggana sadenggan-dengganna.

2 TIMOTEUS 1:5

Taringot do tu rohangku situtu ni haporsayaanmu tu Kristus, sarupa tu haporsayaan ni ompungmu si Lois dohot inanta si Eunike. Jana au pe pos do rohangku, laing songon i muse haporsayaanmu.

2 TIMOTEUS 2:19

Hape anggo ojahan na nibaen ni Debata, ojahan na togu situtu do i jana na so tarhutur. Di ginjangna i tarsurat do, “Ditanda Tuhan do angka nampunaNia,” bope “Sanga ise na mandok nampuna ni Tuhan ia, angkon mantak ma halakna i mambaen dosa”.

2 TIMOTEUS 3:15

Ingotonmu do, mamungka sian hamenehanmu dope madung ditanda ho Buku Na Badia i. Ditorangi Buku Na Badia i do rohamu laho mangastui anso maruli haluaan ho sian na mangkaporsayai Kristus Jesus.

JOSUA 24:15

Sugari sura nada ra hamu mangoloi tu Tuhan, laing sadari on ma baen hamu haputusanna, sanga na tu ise do giotmunu mangoloi: Tu angka debata na nisomba ni ompumunu najolo di Mesopotamia, sanga tu angka debata ni halak Amori na niingananmunu tanona saonnari do. Tapi anggo hami – au dohot dongan sabagasku – hum Tuhan do oloannami.”

HAKIM-HAKIM 13:12

Jadi disapai si Manoah ma, “Muda tarjadi songon na nidok ni tuan i sanoli on, angkon aha do sibaenon ni dakdanak i? Bia do ngolunia sanoli on?”