PAMUNGKAAN 12:3 - BIBEL JAMITA NA DENGGAN

³ PasupasuonKu ma sanga ise na mamasumasu ho. Tapi buraanKu ma sanga ise na mamurai ho. Jana hara ni ho, pasupasuonKu ma sude angka bangso na di tano on.”

PAMUNGKAAN 12:3 ပူးပေါင်းရင်းမြစ်များ

PAMUNGKAAN 18:18

Gabe bangso na godang jana na markuaso do pomparannia; jana hara ni ia pasupasuonKu ma sude bangso na di tano on.

PAMUNGKAAN 18:19

Na Hupili do ia anso diparentahon ia tu angka dakdanaknia dohot tu pomparannia anso oloanna Au bope patulusonna sanga aha na denggan dohot na tigor. Muda mangoloi halahi, gohanKu ma janjingKu tu si Abraham.”

PAMUNGKAAN 22:18

Pangidoan ni sude bangso na di tano on ma tu Au anso Hupasupasu halahi – hara ni na nioloanmu parentangKu.”

PAMUNGKAAN 24:35

Marlobi-lobi do pasupasu ni Tuhan di si Abraham jana dibaen do ia gabe halak na santak kayo. Madung dilehen Tuhan disia biri-biri na marhulanan-hulanan, hambeng, lombu, unto, halode, perak, sere, hatoban halaklahi dohot dadaboru.

PAMUNGKAAN 25:11

Dung jumolo si Abraham, dipasupasu Debata ma si Ishak anak ni si Abraham i, na maringanan hatiha i di lambung ni sumur na margoar, “Na Mamparrohahon Au”.

PAMUNGKAAN 26:29

bahaso na so baenonmu na jahat tu hami, songon hami na so unjung mambaen na jat maradopkon ho. Ma denggan rohanami adop ho jana hami padiar do ho kehe di bagasan dame. Madung torang di hami na nipasupasu ni Tuhan do ho.”

PAMUNGKAAN 26:4

LehenonKu do hagabean anso maranak marpahompu ho sabahat ni bintang na di langit jana lehenonKu do sude luat on tu halahi. Pangidohonon ni bangso na satano on ma sudena tu Au anso Hupasupasu halahi songon pamasumasungKu di pomparanmu.

PAMUNGKAAN 27:29

Sai gabe naposomu ma da angka bangso na marragam, jana talu ma maradopkon ho angka marga ni bangso na asing. Sai rajaanmu ma sude angka kahanggimu jana marsomba di jolomu ma pomparan ni inangmu. Sai hona bura ma sanga ise na mamurai ho jana tarpasupasu ma sanga ise na mamasumasu ho.”

PAMUNGKAAN 28:14

Songon bahat ni abuan na di tano on ma bahat ni pomparanmu. Pabidangonmu ma tano ni halahi tu ganup humaliang, jana markite-hite ho dohot pomparanmu, pasupasuonKu ma sude bangso na di tano on.

PAMUNGKAAN 30:27

Didok si Laban ma tusia, “Tangihon ma jolo hatangkon: Madung dipaboa sada halak partondung tu au, na dipasupasu ni Tuhan au hara ni ho.

PAMUNGKAAN 30:30

Dompak so ro au tuson, nada sadia dope sinadonganmu, hape saonnari madung sonang sajo, jana madung dipasupasu Tuhan ho hara ni au, hape andigan dope hatihana laho manyarihon na di au?”

PAMUNGKAAN 39:5

Mamungka sian hatiha i, hara ni si Josep, dipasupasu Tuhan ma halak Mesir na sabagas i dohot sude sinadongannia na di bagas sanga pe na di ladang.

MASMUR 72:17

Sai taringot ma di roha sapanjangna goarnia, manahan ma habonggalonna salolot adong mataniari. Sai dihalungunkon angka jolma ma nian dipasupasu songon ia, dohot sude bangso mandok ‘na martua ma da ia’.

HARURUAR 23:22

Tapi muda burju do hamu mangoloi tusia dohot patuluskon sandok na Huparentahon, sosohononKu ma musumu jana Au ma marporang mangalo sude musumunu.

BILANGAN 24:9

Anggo bangso Israel i na gogo do tarsongon singa, ise muse ma he na puluk mangganggusa andigan disia hatiha maradian? Sanga ise mamasumasu halak Israel, ia pe dipasupasu barang ise na mamurai Israel, ia pe hona bura.”

MATEUS 25:40

Alusan ni Raja i ma, ‘Ingot hamu ma on: Hatiha dibaen hamu songon i tu sada halak sian angka kahanggingKu na umdangol i, etongon na tu Au do i dibaen hamu!’

MATEUS 25:45

Alusan ni Raja i ma, ‘Tangkas ma jolo tangihon hamu: Di na so ra hamu mangurupi sahalak sian na umdangol on, etongon na so ra do hamu mangurupi Au.’

LUKAS 24:27

Dung i dipatorang Jesus ma tu halahi sanga aha na nidok taringot tuSia di bagasan Buku Na Badia i, mamungka sian Buku Ni si Musa lopus tu buku-buku ni angka panurirang.

SURAT NI SI PAULUS TU PARLAGUTAN ROM 4:11

Dijagit ia do tanda sunat i songon cap ni hatigoran markite-hite haporsayaan na nipatuduhonnia taran so disunat dope ia. Markite na songon i ma ia gabe ompu ni sude na porsaya na so marsunat, anso diparetongkon ma hatigoran i tu halahi.

1 KORINTUS 1:30

Hara ni na nibaen ni Debata sandiri do umbaen na gabe mardomu hamu dohot Kristus Jesus. Na nilehen ni Debata do Kristus tu hita, anso marguru tu Kristus hamaloanta. Angke Kristus do na padenggankon hita mangulahi dohot Debata. Laing Kristus do na papitahon hita anso gabe bangso na polin hita di Debata. Kristus muse do na paluahon hita.

GALATIA 3:16

Dibaen Debata do angka janjiNia i tu si Abraham dohot tu angka pomparannia. Nada adong tarsurat di Buku Na Badia i na mandok, “dohot tu angka pomparan ni si Abraham,” astuanna bahat bilangan ni halakna. Anggo na tarsurat disi, songon on do, “dohot tu pomparanmu”, artina hum sahalak sajo do, i ma Kristus.

GALATIA 3:28

Anggo taringot tuson, nada adong be dibaen mardia imbar halak Jahudi sanga angka halak Junani, hatoban dohot na mardeka, halaklahi dohot dadaboru. Gabe sada do hamu sudena hara ni Kristus Jesus.

GALATIA 3:8

Madung diida Buku Na Badia i hian do na dung dilehen Debata dalan anso mardenggan mangulahi angka halak na so Jahudi dohot Debata, muda porsaya halahi tu Debata. Tu si Abraham do parjolo dipaboa Jamita Na Denggan i, di bagasan janji on, “Markite-hite ho, pasupasuon ni Debata ma sandok bangso na di ginjang tano on.”

EPESUS 1:3

Pinuji ma Debata, Ama ni Tuhanta Jesus Kristus! Dipasupasu Ia do hita dohot sude ragam-ragam ni pasupasu partondion sian banua ginjang, hara ni na dung mardomu i hita dohot Kristus.

KOLOSSE 3:11

Hara ni sasudena i gabe mago ma angka parasingan ni halak Jahudi dohot na so Jahudi, halak na marsunat dohot na so marsunat; nada adong be parasingan ni angka bangso; nada adong be hatoban sanga na mardeka; angke hum Kristus noma sasudena. Mardomu do Kristus dohot halahi sudena!

HALUMBAAN 7:9

Dung i manaili muse dope au, gabe huida ma jolma na marlagut na lobi bahatna – sahalak pe nada adong tarbaensa mangetong i! I ma angka jolma sian ganop bangso, marga, negara dohot bahasa. Mamake baju juba na bontar ma halahi, maniop mare-mare di tanganna be, jongjong ma halahi sude adop habangsa i dohot adop Anak Ni Biri-biri i.