NAHUM 1:12 - BIBEL JAMITA NA DENGGAN

¹² Jadi didok Tuhan ma tu Israel, bangsoNia i, “Haru pe gogo halak Asur i jana bahat bilanganna, tapi pangabisonKu do halahi sudena. Ale bangsongKu, Au do mambaen hamu marhancit, tapi nada ulahanKu be mambaen songon i.

NAHUM 1:12 ပူးပေါင်းရင်းမြစ်များ

2 RAJA-RAJA 19:35

Laing di borngin i ro ma Surusuruan Ni Tuhan tu parbandaran ni halak Asur mamatehon 185.000 halak paranganna. Ancogotna i manyogot marragean ma angka bangke i!

2 RAJA-RAJA 19:37

Sanoli hatiha maribadat ia di bagasan pamelean ni Debata Nisroh, dibunu si Adramelek dohot si Sareser anaknia ma ia dohot podang. Dung i kehe ma halahi maporus tu Luat Ararat. Gabe si Esarhadon anaknia na asing ma gabe raja manggonti ia.

HARURUAR 12:12

Di borngin i bolusanKu ma sude tano Mesir, jana bunuonKu ma sude anak halaklahi siangkaan, bope di jolma bope di pahan-pahanan. UhumanKu ma sude sombaon na di Mesir, angke Au do Tuhan.

JESAYA 10:16

Dibaen madung manyombong halak Asur, paroon ni Tuhan Na Markuaso i ma nyae laho manguhumi angka perwira na mamokmohi saonnari. Hona arun na lobi milas ma halahi songon api na torus manutungi.

JESAYA 17:14

Hatiha lusut mataniari dibaen halahi hagaoron, tapi marayak andostorang nada adong be halahi. Songon i ma bagian ni ganop halak na manyamun hita.

JESAYA 30:19

Ale hamu na maringanan di Jerusalem, nada sai mangandungi be hamu. Ibo roha ni Tuhan jana alusanNia ma hamu muda pio-pio hamu tuSia mangido tolong.

JESAYA 31:8

Abis di parporangan noma Asur, tapi nada marhite gogo ni jolma. Maporus ma halak Asur i sian porang, jana angka na poso bulung ni halahi baenon noma gabe hatoban.

JESAYA 37:36

Laing di borngin i, ro ma Surusuruan ni Tuhan tu parundung-undungan ni halak Asur i jana dibunu ma 185.000 halak parajuritna. Ancogotna i manyogot-nyogot, marampar ma angka bangkena i.

JESAYA 51:22

Songon i ma pandok ni Tuhanmu, Debata na mangondihon hamu, “Mangulahi Hubuat sian hamu, mangkuk dohot isi na palenongkon, jana isi ni mangkuk hamilason ni murukKu, indangkon inumon munu be i.

JESAYA 7:20

Pakeon ni TUHAN ma raja ni Asur manaluhon, pabilehon dohot mangaroncohon Israel. Baenon ni raja Asur ma Israel songon pambaen ni sada tukang cukur na mangabisi sude obuk dohot imbulu na di pamatang.

JESAYA 8:8

Masuhan ni halahi ma Juda songon aek magodang na mangalantap jabat liput abara jana mambaen bonom sasudena; jana habongna na mangirbang i ma manutupi sude luatmu; ale Immanuel!”

DANIEL 11:10

Jadi marhobas ma angka anak ni raja ni Siria laho marporang dohot mambaen tentara na bahat. Maju ma sada sian halahi margalusak songon aek magodang torus mamorangi benteng ni musu.

JOEL 2:19

Dialusi Ia ma halahi, songon on didok Ia, “Saonnari Hulehen ma di hamu sude: gandum, anggur dohot miak zetun baen panganonmunu be, anso sude hamu gabe butong be. Nada padiaronKu marlayas hamu sanga sipartataan ni angka bangso.

NAHUM 1:15

Ligi da, ro do sada suruan mamolus sian angka dolok, maroban jamita na denggan, barita hamonangan. Ale bangso Juda, pestahon ma ari pestamu jana haulkon ma haulmu tu Debata. Nada rajaan ni parjahat be tanomu. Ma pola sude halahi diabiskon.

HALUMBAAN 7:16

Nada be male halahi sanga manguas; nada taonon ni halahi mataniari sanga las ni ari,