MATEUS 5:9 - BIBEL JAMITA NA DENGGAN

⁹ Martua ma angka na mambaen dame, dibaen nigoar do halahi anak ni Debata.

MATEUS 5:9 ပူးပေါင်းရင်းမြစ်များ

1 JUJUR TAON 12:17

Didapotkon si Daud ma halahi jana didok ma, “Anggo na giot mandongani au do hamu ro tuson, denggan ma i dison hamu. Jop do rohanami laho manjagit hamu. Tapi muda na giot manghianat au do tu musu maksudmunu, haru pe nada hujungkati hamu, Debata na nisomba ni angka ompunta i ma na umbotosa, jana Ia ma na manguhumi hamu.”

MASMUR 120:6

Madung mahonoktu au tinggal rap dohot halahi, rap dohot halak na so manghagioti dame i.

MASMUR 34:12

Por dehe rohamunu lolot di hangoluan jana mandai hadengganan dohot hatuaan?

MATEUS 5:45

anso gabe dakdanak ni Amangmunu na di banua ginjang i hamu. Harana dipabincar Debata do mataniari tu halak na burju dohot tu halak na jahat pe. Diparo Ia do udan tu halak na tigor dohot tu halak na geduk roha.

MATEUS 5:48

Angkon sanggam do hamu – sarupa dohot Amangmunu na di banua ginjang i, sanggam.”

LUKAS 20:36

Songon surusuruan noma pangalaho ni halahi jana nada ra be mate. Gabe dakdanak ni Debata ma halahi, angke madung dipangolu halahi mangulahi, sian hamatean.

LUKAS 6:35

Anggo sapatutna nada songon i! Anggo hamu angkon suhar-suhar ni i do. Angkon haholonganmunu do musumunu jana baen hamu ma na denggan tu halahi. Angkon lehenonmunu do manginjam jana ulang pola arop rohamunu dapotan garar mangulahi. Godang do dapot hamu upa ni i jana gabe anak ni Debata Na Gumincat i ma hamu. Angke anggo Debata, denggan do dibaen Ia maradopkon angka na so malo mandok tarimakasi, songon i muse laing denggan do dibaen Debata maradopkon halak na jahat.

BAENON NI ANGKA RASUL 7:26

Ancogotna i diida ia muse ma marbadai dua halak Israel, dicubo ia muse ma padamehon halahi. Didok ia ma, ‘Hamu dongan, na markahamaranggi do da hamu. Biasi marbadai hamu?’ ning ia.

SURAT NI SI PAULUS TU PARLAGUTAN ROM 12:18

Intap ni na tarbaen, mardame ma ngolumunu tu halak sudena.

SURAT NI SI PAULUS TU PARLAGUTAN ROM 8:14

Sanga ise na nitogu-togu ni Tondi Ni Debata, i do dakdanak ni Debata.

SURAT NI SI PAULUS TU PARLAGUTAN ROM 8:16

Rap manyaksihon do Tondi Ni Debata dohot tondinta laho patangkaskon na tutu hita dakdanak ni Debata.

SURAT NI SI PAULUS TU PARLAGUTAN ROM 8:19

Hara ni lungunna, sasudena na nitompa i painte-intehon do sanga andigan hatihana patidahonon ni Debata hasangapan ni angka dakdanakNia i.

1 KORINTUS 6:6

Tapi hape kehe do dongan na sada mandapotkon na so Kristen mangaduhon parkarona maradopkon donganna Kristen!

2 KORINTUS 13:11

Ujungna hamu ale angka dongan! Sai marjop ni roha ma hamu jana margogo parayakkon na sanggam. Jagit hamu ma sude sipaingotki. Sai saroha ma hamu jana mardame-dame. Donganan ni Debata parholong jana pardame i ma hamu.

2 KORINTUS 5:20

Partonaan ni Kristus do hami. Mandok hata pe hami tu hamu, songon na Debata sandiri do na mangkobari tu hamu. Mangasahon goar ni Kristus gomos ma hami pangido tu hamu, sai ra ma hamu dipadenggan dohot Debata.

GALATIA 5:22

Tapi anggo parbatu ni Tondi i, on do: Holong ni roha, jop ni roha, hasonangan, lambok ni roha, habasaran, lidang ni roha, hatomanan,

EPESUS 4:1

Hara ni i ma – au sada halak na tarhurung, na nihurungkon hara ni na mangoloi Tuhan i – gomos hupangido tu hamu: Dalani hamu ma ngolumunu marguru tu parobananmunu songon halak na dung dipiohon Debata.

PILIPPI 4:2

Hupaingot do si Euodia dohot si Sintike anso saroha halahi di bagasan Tuhan i.

KOLOSSE 3:13

Angkon sobar do hamu maradopkon dongan jana marsimaapan muda adong na so tabo pangkilalaanna tu donganna. Madung di ampuni Tuhan hamu, jadi hamu pe angkon marsiampunan do sama hamu.

IBRANI 12:14

Usahahon hamu ma anso mardame-dame hamu tu sude halak jana manggogo ma hamu anso hum di Tuhan ngolumunu, harana sahalak pe nada adong na tarbaen mida Tuhan anggo inda songon i pardalan ni ngoluna.