MATEUS 5:19 - BIBEL JAMITA NA DENGGAN

¹⁹ Hara ni i, sanga ise na mangalanggar sada sian angka Tona i, sanga na ummenekna i pe, dung i diajari ia muse halak na asing mambaen songon i, gabe na ummenek do sisongon i di bagasan Harajaan Ni Banua Ginjang. Tapi sabalikna, sanga ise na padalankon angka aturan i, dung i diajari ia muse halak na asing mambaen songon i, halak na godang do sisongon i di bagasan Harajaan Ni Banua Ginjang.

MATEUS 5:19 ပူးပေါင်းရင်းမြစ်များ

MASMUR 119:128

Hara ni i ma umbaen na huihutkon sude sipaingotMu, jana huhagigihon dalan na sala.

MASMUR 119:6

Muda huparrohahon sude parentaMu, gabe nada jabat maila be au.

DANIEL 12:3

Marsinondang be ma songon sinondang ni langit angka pamimpin na marbisuk i. Jana halahi na dung mangajari halak na bahat laho mambaen sanga aha na denggan dohot na tigor, marsinondang ma halahi songon angka bintang i salolot-lolotna.”

MATEUS 11:11

Ingot hamu ma! Inda adong be jolma na gumodang di tano on sian si Johannes Pandidi. Tapi haru pe songon i, halak na ummenek di Harajaan Ni Banua Ginjang laing gumodang dope i sian si Johannes.

MATEUS 19:28

Dialusi Jesus ma halahi, “Hudok ma tu hamu, satutuna di hatiha panompaon muse, di hatiha juguk Anak Ni Jolma i, di habangsa hamuliaonNa, hamu angka na mangihutkon Au, giot juguk di ginjang di habangsa na dua bolas i laho manguhumi Israel na dua bolas marga i.

MATEUS 20:26

Tapi anggo hamu, nada tama songon i. Muda adong sian hamu na giot godang, angkon gabe pangoloimunu do ia.

MATEUS 28:20

Laing ajari hamu ma halahi anso burju mangoloi sude na Huparentahon tu hamu. Botoonmunu ma. Au ma tongtong rap dohot hamu lopus tu hasidungan ni tano on.”

LUKAS 1:15

Gabe halak na godang do dakdanak i mangihutkon parnidaan ni Tuhan. Nada tola ia minum anggur, sanga siinumon na koras. Mamungka di bortian dope ia, Tondi Parbadia do mangarajai ia.

LUKAS 11:42

Marjaya ma hamu angka halak Parise, dibaen dilehen hamu do parsampuluan sian angka suan-suanan na menek, inggu dohot ragam-ragaman ni simarata, tapi dilaosi hamu do tona dohot holong ni roha ni Debata. Angkon sikarejohonon do i, tapi ulang nitinggalkon na asing i.

LUKAS 9:48

Dung i didok Ia ma tu halahi, “Sanga ise na manjagit dakdanak on hara ni Au, dos do i dohot na manjagit Au. Dung i, sanga ise na manjagit Au, sarupa do i na manjagit na marsuru Au muse. Angke sanga ise na ummenek sian hamu, ia do na gumodang!”

BAENON NI ANGKA RASUL 1:1

Teofilus na niparsangapan! Madung hupatorang di buku na parjolo sasudena na nikarejohon dohot na niajarkon ni Jesus mulai sian na mamungka Ia markarejo,

SURAT NI SI PAULUS TU PARLAGUTAN ROM 3:8

Jana biasi inda tola hita mandok, “Tole ma tabaen na jat, anso ro na denggan sian i?” Tutu nian, adong do halak na pabilehon hami, paboa na dung hudok songon i. Anggo halak na songon i satutuna patut do uhumon ni Debata.

SURAT NI SI PAULUS TU PARLAGUTAN ROM 6:1

Antong anggo songon i, aha ma na tardok hita? Angkon tadatdati ma he mambaen dosa anso mur martamba asi ni roha i?

SURAT NI SI PAULUS TU PARLAGUTAN ROM 6:15

Antong, bia noma ujungna? Tola dope hita mardosa, hara ni na so ditoru ni Tona be hita, tapi madung ditoru ni asi ni roha? Nada songon i!

PANGARATAION 12:32

Sai patulus hamu ma sandok na dung huparentahon tu hamu; ulang tambai sanga urahi hamu saotik pe.

PANGARATAION 27:26

‘Bura ni Debata ma di halak na so mangoloi sude uhum dohot pangajaran ni Debata.’ Dung i sude ma bangso i mandok: ‘I ma tutu!’ ”

1 TIMOTEUS 6:11

Tapi anggo ho, halak ni Debata do ho, jadi angkon mandao do ho sian i sudena. Parayak ma anso halak na bonar ho di parnidaan ni Debata, jana na mangoloi tu Debata boti na porsaya tu Kristus, na marholong ni roha, sobar dohot marlambok ni roha.

TITUS 3:8

Tutu do sasudena sanga aha na hudok on. Jadi giotku, gomos ma dokkon taringot tu angka na hudok on, anso marsitutu angka na porsaya tu Debata patuluskon angka karejo na denggan na marguna tu sude halak.

1 PETRUS 5:4

Jadi muda ro Parmahan Bolon i, jagitonmunu ma tuku hamuliaon na so ra malos.

1 JOHANNES 3:4

Sanga ise na mambaen dosa, na mangalaosi Tona Ni Debata do i; angke na nidok dosa, i ma karejo na mangalaosi Tona Ni Debata.

HALUMBAAN 2:20

Tapi anggo taringot tu pangalaho na sada on, nada jop rohangKu mida hamu: Dilehen hamu do rohamunu tu si Isebel dadaboru na mangoku dirina i suruan ni Debata. Madung miduk sian angka naposongKu na niajarannia dohot na nipaoto-otonia anso markamainan dohot mangankon sipanganon na nihaulkon tu gana-ganaan.

1 SAMUEL 2:30

Au Tuhan Debata ni Israel, na dung Hujanjihon do najolo, horongmu dohot margamu do na giot parkobas di Au gabe malim sapanjangna. Tapi saonnari Au mandok, nada Huhagioti be na songon i! Angka na pasangapkon Au do na giot pasangaponKu tapi anggo na palayas Au, palayasonKu do.