MATEUS 24:31 - BIBEL JAMITA NA DENGGAN

³¹ Dipalu ma tarompet na godang, suruon ni Anak Ni Jolma i ma angka surusuruanNia tu panjuru na opat i di tano on palagutkon bangsoNia, sian topi ni langit na sada lalu tu topi ni langit na sada nari.”

MATEUS 24:31 ပူးပေါင်းရင်းမြစ်များ

MASMUR 22:27

Ingoton ni sude bangso ma Tuhan, sian desa na walu halahi marroan, sude horong ni bangso mulak ma tuSia, lalu marsomba tuSia.

MASMUR 67:7

Madung dipasupasu Debata hita, sai sude ma nian na satano on pasangapkon Ia.

MASMUR 81:3

Ombus ma sarune di ari pestanta, di pesta bulan baru dohot bulan tula.

HARURUAR 19:16

Di ari patoluhon, ro ma ronggur dohot hilap. Tarida ma ombun na hapal di ginjang ni dolok i jana habegean ma sora ni sarune na lobi gogo. Humitir ma sude halak na di bandar hara ni biarna.

JESAYA 11:12

PajongjongonNia ma sada mandera laho patandahon tu angka bangso bahaso na nipalagutNia mangulahi bangso Israel dohot Juda na marserak i di na opat mata angin jana maroban halahi mulak.

JESAYA 13:5

Na marroan sian angka luat sihadaoan do i sian angka ujung ni tano on. Di hamuruhonNa i giot pusaon ni Tuhan do sude portibi on.

JESAYA 27:13

Paluon ma di hatiha i sarune laho marpio sude halak Israel na hona buang di Asur dohot di Mesir. Ro ma halahi tu Jerusalem marsomba tu Tuhan di dolokNa na badia.

JESAYA 42:10

Endehon ma logu na imbaru di Tuhan, jana puji ma Ia sian sude parsuhi ni tano on. Gumadobur ma laut maradu sude isina, dohot angka pulo rap dohot sandok na manginganisa.

JESAYA 43:6

Huparentahon tu Selatan dohot tu Utara, anso dipaloas jana ulang halahi niambatan. Anso mulak sian angka luat na dao dakdanakKi, padiar marmulahan halahi sian ujung ni portibi.

JESAYA 45:22

O hamu sude na mangingani portibi; sasada Au do da Debata. Saonnari marbalik ma hamu tu Au, anso dipalua hamu.

JESAYA 49:18

Ligi ma humaliang ho, uji ma manatap, marlagut do bangsomi manghuliangi ho. Hara ni Au, Debata Na Mangolu, Au mandok, satutuna do, pakeonmu ma sude halahi gabe parhiasan jana lilitkononmu ma halahi, songon na nibaen ni dadaboru na baru marbagas.

JESAYA 60:4

Ligi ma humaliang ho sanga aha na tarjadi, marlagut rayat laho mulak mangulahi. Sian na dao marroan angka anakmu, niompaan dohot angka borumu.

ZAKARIA 14:5

Marlojongi ma hamu mamolus sian lombang na mambagi dolok i gabe marbola dua. Marlojongi ma hamu songon angka ompu na umpompar hamu di hamamasa ni lalo taran mamarenta si Usia raja ni Juda. Jadi ro ma antong Tuhan Debatangku, diudurkon Surusuruan sudena.

ZAKARIA 2:6

Aha dope, marlojong ma hamu sian tano na di Utara, ninna Tuhan, harana madung Hupaserak hamu adop opat haroro ni alogo, ninna Tuhan.

ZAKARIA 6:5

Dialusi ia ma, “Halahi ma da na haruar tu opat jurusan ni alogo, dung sidung halahi mangadop tu Tuhan ni sude tano on.

ZAKARIA 9:10

Didok Tuhan ma, “Angka kareta na sian Efraim, ambungkononKu noma i, sandok kudo na di Jerusalem, abiskononKu noma i jana sude sior ponggolanKu noma i. Baenon ni rajami ma pardamean ni angka bangso. Sian laut na sada tu laut na asing ia noma markuaso. Sian Batang aek Efrat lopus tu ujung ni tano.”

ZAKARIA 9:14

Pataridahonon ni Tuhan ma diriNa tu bangsoNa, songon hipas ni hilap ditembakkon angka anak ni siorNa. Ombuson ni Tuhan Debata ma sarune lalu mardalan maju di bagasan angin na gogo na sian Selatan.

MATEUS 13:41

Ro ma Anak Ni Jolma i, suruhononNia ma angka surusuruanNia palagutkon sian tonga-tonga ni bangsoNia sude halak na mambaen mardosa halak na asing dohot sude halak na mambaen na jahat.

MATEUS 24:22

Tapi madung dipapendek Debata hatihana i. Sugari nada, umpe sahalak jolma na tarbaen tahan. Tapi hara ni bangsoNia i, gabe dipapendek Debata do hatihana i.

MATEUS 24:24

Harana, marroan do disi angka kristus pargabus dohot angka panurirang pargabus. Patupaon ni halahi ma angka pambaenan na luar biasa dohot angka na pahomang roha laho paoto-otohon halak. Sugari tarbaensa, dohot bangso ni Debata i pe giot paoto-otoon ni halahi muse do.

MATEUS 24:32

“Marguru ma hamu sian bona ni gala-gala. Muda rata rantingna i boti loyok, ruar muse ma angka pusukna, botoonmunu ma na giot dapot ne ma musim panas.

MATEUS 25:31

“Muda ro Anak Ni Jolma i gabe Raja mardongan angka surusuruanNia, juguk ma Ia di habangsa ni hamuliaonNa.

MATEUS 28:18

Gabe dipadonok Jesus ma tu halahi, didok Ia ma hata, “Sude kuaso na di banua ginjang dohot di tano on, madung dipasahat tu Au.

MARKUS 13:27

SuruhononNia ma angka surusuruanNia laho palagutkon bangso na nipiliNia sian na opat panjuru ni tano on, sian angka ujung ni tano lalu tu angka ujung ni langit.”

LUKAS 24:47

Sada muse, tarsurat hian do angkon nijamitahon do tu sude bangso markite-hite goar ni Kristus i bahaso na giot ampunan ni Debata ma angka dosa muda dipauba jolma i rohana sian angka dosa ni halahi. Jana mamungka ma barita i sian Jerusalem on.

JOHANNES 11:52

Jana nada hum hara ni halak Jahudi sajo, tapi dohot muse anso dipalagut sudena gabe sada angka dakdanak ni Debata na marserak i.

SURAT NI SI PAULUS TU PARLAGUTAN ROM 10:18

Tapi husapai ma: Nada he dibege halahi do i? Madung dibege halahi do i, “Angke madung lalu do sora ni halahi tu sandok tano on, jana hata ni halahi madung tu liat portibi on.”

1 KORINTUS 15:52

Di bagasan sangkidop mata do i sudena tarjadi, di na nipalu sarune na parpudi situtu. Angke dung tarbege sora ni sarune i, pangoluon ma mangulahi angka jolma na mate i marpamatang na manongtong jana paubaon ma hita sudena.

EPESUS 1:10

Isi ni sangkap i, on do: Anso sada sudena na nitompa i, na adong di banua ginjang sanga na di portibi on dohot Kristus na gabe uluna. Jana salosehonon ni Debata ma i muda dung dumpang hatihana.

PANGARATAION 30:4

Haru marserak pe hamu lalu tu ujung ni tano tu inganan na dumao pe, laing palaguton ni Tuhan Debatamunu do hamu jana buatonNia hamu mulak.

PANGARATAION 4:32

Tangkasi hamu ma hatiha na dung salpu, dao taran so sorang dope hamu, mamungka sian ari di na nitompa ni Debata jolma di tano on. Jalahi hamu ma di sandok portibi on. Unjung dehe tarjadi pangalaho na songon on godangna di jolo ni on? Adong dehe halak na jungada umbege taringot tu na masa sisongon on?

1 TESSALONIKA 4:16

Saulahon di na mijur Tuhan Jesus sandiri sian banua ginjang, pio-pio ma kapala ni surusuruan i marsora na gogo jana dipalu ma sarune ni Debata songon boa-boana. Jadi angka halak na dung porsaya tu Kristus dompak di ngoluna be, pangoluon ma halahi parjolo.

2 TESSALONIKA 2:1

Taringot tu haroro ni Tuhanta Jesus Kristus, bope taringot tu hita na giot palagutonNia anso rap dohot Ia, on ma na hupangido dohot gomos sian hamu:

IBRANI 12:19

saringar ni sarune dohot sora na lobi gogo. Di na nibege ni halak Israel sora i, gogo do pangidoan ni halahi anso ulang be nian mangkuling sora i tu halahi.

HALUMBAAN 1:20

On ma arti ni rahasia ni bintang na pitu na niidamu di tangan siamunKon dohot astuan ni parlampuan na pitu na nibaen sian sere i. Bintang na pitu i, i ma angka surusuruan ni parlagutan na pitu i, jana parlampuan na pitu i, i ma parlagutan na pitu i.”

HALUMBAAN 11:15

Dung i diombus surusuruan papituhon i ma sarunenia, gabe adong ma sora na gogo situtu di banua ginjang na marsurahi mandok, “Anggo kuaso laho mamarenta portibi on saonnari madung di bagasan tangan ni Tuhanta dohot Kristus na nijanjihon i. Mamarenta noma Ia salolot-lolotna!”

HALUMBAAN 7:1

Dung i huida ma opat surusuruan jongjong di suhi-suhi na opat ni tano on manahan angin na opat i di tano on anso ulang mangombus di darat, di laut sanga tu bona ni hayu aha pe.

HALUMBAAN 8:2

Dung i huida ma dilehen pitu sarune tu surusuruan na pitu na jongjong i di jolo ni Debata.