MATEUS 24:14 - BIBEL JAMITA NA DENGGAN

¹⁴ Dung i muse, Jamita Na Denggan taringot tu Harajaan Ni Debata, dijamitahon ma i tu portibi on sude, anso sude halak umbegesa. Dung i pe anso ro ari na parpudi.”

MATEUS 24:14 ပူးပေါင်းရင်းမြစ်များ

JEHESKIEL 7:10

Ligi ma madung ro arina: Masa ma parhancitan, martumbur ma hajahaton, marharajaon ma ginjang ni roha.

MATEUS 10:7

Kehe ma hamu manjamita, dok hamu ma: Madung donok Harajaan Ni Banua Ginjang.

MATEUS 18:19

Ingot hamu muse ma on! Muda adong dua halak sian hamu di tano on na saroha manangiangkon sanga aha pe, tulus do tangiang i baenon ni Damang na di banua ginjang i.

MATEUS 24:3

Dung i kehe ma Jesus juguk di Dolok Zetun. Jadi hatiha na juguk i Ia, marroan ma angka anak siseanNia laho mangkatai dohot Ia sajo. “Paboa ma jolo tu hami sanga andigan do tarjadi sudena i,” ninna halahi manyapai Ia. “Dung i muse, aha ma tandana paboa na giot dapot ma haroroMu dohot hasidungan ni portibi on?”

MATEUS 24:6

Begeonmunu ma angka sora ni porang dohot barita ni angka porang. Tapi ulang gabe mabiar hamu. Harana angkon tarjadi do songon i. Tapi nada podo hatihana ro ari na parpudi.

MATEUS 4:23

Dung i dibolus Jesus ma sude Luat Galilea. Mangajari ma Ia di angka bagas paribadatan ni halahi. Dijamitahon Ia ma Jamita Na Denggan taringot tu Harajaan Ni Debata. Dipamalum Ia ma angka na marnyae dohot halak na markahurangan.

MATEUS 9:35

Songon i ma Jesus mardalani sian kota na sada tu kota na asing, sian huta na sada tu huta na asing. Mangajari ma Ia di angka bagas paribadatan. Dibaritahon Ia ma Jamita Na Denggan taringot tu Harajaan Ni Debata. Dipamalum Ia ma ragam-ragam ni nyae dohot sitaonon ni halak na mardangol.

MARKUS 13:10

Angke anggo Jamita Na Denggan i na sian Debata angkon jolo dijamitahon do tu sude bangso.

LUKAS 2:1

Diparentahon Kesar Agustus ma hatiha i anso marsidaftarkon dirina be sude rayat na nirajaannia.

LUKAS 24:47

Sada muse, tarsurat hian do angkon nijamitahon do tu sude bangso markite-hite goar ni Kristus i bahaso na giot ampunan ni Debata ma angka dosa muda dipauba jolma i rohana sian angka dosa ni halahi. Jana mamungka ma barita i sian Jerusalem on.

LUKAS 4:5

Dung i dioban Sibolis i ma Jesus tu inganan na gincat. Dipatidahon Sibolis i ma santongkin tu Jesus sude harajaan na di tano on.

BAENON NI ANGKA RASUL 1:2

lopus tu ari hananaekNia tu banua ginjang. Dompak so manaek Ia tu banua ginjang, madung dilehen Ia hian markite-hite kuaso ni Tondi Parbadia angka tona tu angka rasul na nipiliNia i.

BAENON NI ANGKA RASUL 11:28

Jadi jongjong ma sahalak sian halahi na margoar si Agabus. Dipatubu Tondi i ma tu rohania laho paboahon na giot masa haleon potir di tano on sudena. (Jana tutu do masa haleon potir di hatiha ni Kesar Klaudius mamarenta.)

BAENON NI ANGKA RASUL 17:31

Harana na dung ditontuhon Ia hian do sada hatiha laho manguhumi portibi on sudena mangihutkon hatigoran. Pasahaton ni Debata ma karejo i tu sada halak na dung nipiliNia tusi. Jadi anso pos roha ni halak sudena taringot tusi, madung dipangolu Debata do Ia mangulahi sian hamatean!” ning si Paulus.

BAENON NI ANGKA RASUL 17:6

Tapi hara ni na so dapot halahi si Paulus dohot si Silas gabe si Jason ma ditarik halahi dohot deba nari na porsaya i tu jolo ni angka panjabat na markuaso di kota i. Marsurak ma halahi, “Angka on ma sipanggaori i di na satano on! Saonnari giot di hita on ma halahi manggaori,

BAENON NI ANGKA RASUL 19:27

Hara ni i, sego ma goar ni parusahoanta on. Tapi nada hum i sajo, marlayas muse dope goar ni bagas paribadatan ni Dewi Artemis, jana etongon ni halak ma hasangapannia i songon sisoada; hape nian ia do dewi na nipasomba-somba ni sude halak na di Asia on, dohot na satano on!” ning ia.

BAENON NI ANGKA RASUL 20:25

Madung hutogu hamu sudena jana madung hujamitahon muse tu hamu Harajaan Ni Debata. Anggo saonnari ninna rohangku, nada marsuo be au dohot hamu.

SURAT NI SI PAULUS TU PARLAGUTAN ROM 10:18

Tapi husapai ma: Nada he dibege halahi do i? Madung dibege halahi do i, “Angke madung lalu do sora ni halahi tu sandok tano on, jana hata ni halahi madung tu liat portibi on.”

KOLOSSE 1:23

Hara ni i angkon ojak jana togu do hamu di bagasan haporsayaan i, jana nada ra be hamu nipaorot sian arop ni roha ni Jamita Na Denggan na dung binegemunu. Madung dijamitahon jamita i tu sude na nitompa di tano on, jana na dung gabe naposo ni i do au si Paulus.

KOLOSSE 1:6

Mur rarat do barita na sian Debata tu portibi on sudena, jana madung dipasupasu ngolu ni jolma hara ni barita i, songon na masa tu ngolumunu. Sian mula-mulana dibege hamu taringot tu asi ni roha ni Debata jana tutu do diauhon hamu, ngolumunu pe madung dipasupasu.

IBRANI 1:6

Tapi di na nisuru ni Debata AnakNia siangkaan i tu portibi on, didok Ia do, “Sude surusuruan ni Debata angkon manyomba tuSia.”

IBRANI 2:5

Anggo angka surusuruan nada dohot manjagit kuaso ni Debata, giot mamarenta di portibi na imbaru na giot ro i, i ma portibi na tahatai on saonnari.

HALUMBAAN 14:6

Dung i huida ma sada surusuruan na asing habang gincat di langit. Dioban surusuruan i do barita taringot tu Jamita Na Denggan na manongtong i sipalaluon tu jolma na di tano on; i ma tu sude bangso, marga, bahasa dohot negara.

HALUMBAAN 16:14

Angka i ma tondi ni setan na mambaen angka tanda hahomangan. Kehe ma tondi na tolu i mandapotkon angka raja na satano on jana dipalagut ma halahi sudena laho marporang di ari na godang ni Debata Parkuaso Na Sumurung i.

HALUMBAAN 3:10

Hara ni na dung nioloanmunu parentangKu anso sobar hamu, Au pe jagohononKu ma hamu anso laing horas torkis hamu mamolus hasusaan na giot masa tu sude portibi on. I ma na giot tarjadi laho manguji sasude jolma na satano on.