MATEUS 20:2 - BIBEL JAMITA NA DENGGAN

² Jadi dung sada rohania manggarar upa ni parkarejo i sada hepeng perak sadari, disuruhon ia ma halahi markarejo di kobun anggurnia i.

MATEUS 20:2 ပူးပေါင်းရင်းမြစ်များ

1 RAJA-RAJA 18:12

Muda kehe au sian on, mungkin do obanon ni Tondi Ni Tuhan amang tu inganan na so huboto! Jana muda hupaboa tu si Ahab na dison amang, hape nada marsuo ia tu amang, tontu bunuonnia ma au, haru pe na marsitutu au na maribadat i tu Tuhan sian na menek.

2 JUJUR TAON 34:3

Dung salapan taon ia gabe raja, dompak bajar dope ia, mamungka ma si Josia marsomba Debata na nisomba ni Raja Daud ompunia i. Dung opat taon mamungka ma dironcohon ia angka inganan parsombaan ni gana-ganaan, angka patung ni Debata Asera, dohot angka gana-ganaan na asing.

PARJAMITA 12:1

Ingot ma Na Manompa ho taran di haposoonmu, painte so dapot angka taon na gok hasusaan. Anggo di hatiha i dokkononmu ma, “Nada martua ngolungku.”

MATEUS 18:28

“Tapi di na kehe i haruar naposo i, marsuo ma ia dohot dongannia, rap naposo do halahi. Adong utang ni dongannia i tusia sanga na piga pulu ribu. Hape ditangkup ia ma manigor dongannia i lalu dipingkok ia jana didok ia ma tu dongannia i, ‘Garar sude utangmi tu au,’ ning ia.

MATEUS 20:1

“Anggo Harajaan Ni Banua Ginjang, tarsongon sada halak nampuna kobun anggur do i. Manyogot-nyogot i kehe ma ia manjalahi halak na giot markarejo di kobun anggurnia i.

MATEUS 20:13

Dialusi nampuna kobun i ma tu sahalak sian halahi, ‘Ah dongan, nada adong hubaen na so patut tu hamu. Na he na dung jolo dioloi ho do, sada hepeng perak upa ni halak na markarejo sadari?

MATEUS 20:3

Dung pukul sambilan manyogot i, kehe ma mangulahi nampuna kobun i, diligi ia ma sanga na piga-piga halak na ngongong marsoan songon i di balerong.

MATEUS 20:9

Dung i ro ma angka na masuk karejo pukul lima andospotang i. Sada be ma hepeng perak dijagit halahi.

MATEUS 22:19

Patidahon hamu ma jolo tu Au hepeng na nilehenmunu manggarar pajak!” Jadi dilehen halahi ma sada hepeng perak tuSia.

MATEUS 9:37

Gabe ninna Jesus ma tu angka anak siseanNia i, “Bahat do na giot sabion, hape hum saotik do panyabi.

MARKUS 12:15

Diboto Jesus do na mangakali halahi. Dialusi Ia ma, “Biasi pola diuji hamu Au? Patidahon hamu ma jolo tu Au hepeng perak i sada.”

LUKAS 1:15

Gabe halak na godang do dakdanak i mangihutkon parnidaan ni Tuhan. Nada tola ia minum anggur, sanga siinumon na koras. Mamungka di bortian dope ia, Tondi Parbadia do mangarajai ia.

LUKAS 10:35

Ancogotna i diparuar ia ma dua hepeng perak, dilehen ia ma i tu nampuna bagas parbornginan i. ‘Pature-ture ma jolo,’ ning ia tu nampuna parbornginan i. ‘Muda mulak au muse tuson hugarari pe harugian na nipakemu laho pature-ture ia.’ ”

LUKAS 20:24

“Patidahon hamu ma jolo tu Au sangkibung hepeng perak. Gambaran ni bohi ni ise dohot goar ni ise do di hepeng i?” “Kesar i!” ning halahi mangalusi.

2 TIMOTEUS 3:15

Ingotonmu do, mamungka sian hamenehanmu dope madung ditanda ho Buku Na Badia i. Ditorangi Buku Na Badia i do rohamu laho mangastui anso maruli haluaan ho sian na mangkaporsayai Kristus Jesus.

HALUMBAAN 6:6

Jadi hubege ma tarsongon sora na pio-pio sian tonga-tonga ni mahluk siopat-opat i. Ninna sora i ma, “Satuhul eme argana sabahat ni upa sadari jana tolu tuhul jaung pe argana tong sabahat ni upa sadari. Tapi ulang nisego-sego angka miak dohot anggur!”

1 SAMUEL 2:18

Anggo si Samuel anak ni si Hanna i, dipupu ia do mangoloi Tuhan. Mamake baju efod do ia na dibaen sian abit linen, songon baju parkobas ni angka malim.

1 SAMUEL 2:26

Tapi anggo si Samuel dakdanak i, mur magodang ma ia boti mur pajop roha ni Tuhan bope roha ni jolma sudena.

1 SAMUEL 3:1

Anggo si Samuel na danak i dope, laing dioloi ia do Tuhan di hatiha i di bagasan panogu-noguon ni si Eli. Jarang sajo do di hatiha i adong tona dohot parnidaan sian Tuhan.

1 SAMUEL 3:21

Laing torus dope dipatidahon Tuhan i diriNa tu si Samuel di Silo, jana manghobari dohot Ia. Ganop mangkobari si Samuel, sai ditangihon bangso Israel do.