MATEUS 16:27 - BIBEL JAMITA NA DENGGAN

²⁷ Ro ne ma Anak Ni Jolma i, mardongan hasangapan ni AmangNia rap dohot angka surusuruanNia. Anggo disi, baloskononNia ma tu ganop jolma hombar tu pambaenan ni halahi be.

MATEUS 16:27 ပူးပေါင်းရင်းမြစ်များ

JOB 34:11

Dibaloskon Ia do na patut hombar tu pambaenan ni jolma, mambaen tu jolma marguru tu pangalahona.

MASMUR 62:12

jana anggo holong ni rohaNia manongtong do sapanjangna. Ho do mamalos ale Tuhan tu ganop halak marguru tu pangalahona.

PODA 24:12

Bolas do dokkononmu, “Nada ahana i di au.” Tapi diboto Debata do pikiranmu jana adilanNa do ojahan ni pikiranmu. Dijago Ia do ngolumu jana baloskononNia do di ho marguru tu pambaenanmu.

PARJAMITA 3:17

Ninna rohangku do di bagasan, uhumon ni Debata do halak na burju dohot halak na jahat, angke sude pangalaho dohot sude pambaenan na tarjadi do i di hatiha na nitontuhon ni Debata.

JEREMIA 17:10

Au do Tuhan na mandodo roha; Huuji do ate-ate ni jolma. BaloskononKu do tu ganop hombar tu pangalahona; jana Hubaen hombar tu pambaenanna.”

JEREMIA 32:19

Sumurung do angka sangkapMu jana hahomangan do angka pambaenanMu; diida Ho do sude pambaenan ni jolma, jana dibalos Ho do tu halahi hombar tu pambaenan ni halahi.

JEHESKIEL 18:20

Sanga ise na mambaen dosa, ia ma na giot mate. Nada angkon sai tanggungon ni anak panginona ni dosa ni amangna; sabalikna muse, ama pe nada angkon sai tanggungonna panginona ni angka dosa ni anakna. Sanga ise na burju jagitonna balos na denggan hara ni pambaenanna na denggan. Jana halak na jahat, jagitonna ma parkancitan patunda ni hajahatanna i.

JEHESKIEL 7:27

Mangandung ma raja, mandele ma anak ni raja i jana humitir ma rayat i hara ni biarna. UhumanKu noma hamu hombar tu parbuatanmunu sudena jana uhumanKu ma hamu songon panguhumimunu di halak na asing. Jadi gabe botoonmunu ma bahaso Au do Tuhan.”

DANIEL 7:10

Ruar ma sada batang aek api, jana mamolus sian adopanNia; saribu noli marribu-ribu angka na mangoloi Ia, jana bahat sajo do jolma jongjong di joloNia. Dung i juguk ma angka Panguhum jana diungkap ma Angka Buku.

ZAKARIA 14:5

Marlojongi ma hamu mamolus sian lombang na mambagi dolok i gabe marbola dua. Marlojongi ma hamu songon angka ompu na umpompar hamu di hamamasa ni lalo taran mamarenta si Usia raja ni Juda. Jadi ro ma antong Tuhan Debatangku, diudurkon Surusuruan sudena.

MATEUS 13:41

Ro ma Anak Ni Jolma i, suruhononNia ma angka surusuruanNia palagutkon sian tonga-tonga ni bangsoNia sude halak na mambaen mardosa halak na asing dohot sude halak na mambaen na jahat.

MATEUS 13:49

Songon i ma pangalahona di ari na parpudi. Marroan ma angka surusuruan manyirang halak parjahat sian halak na patuluskon na nipangido ni roha ni Debata.

MATEUS 24:30

Dung i pe anso tarida tanda ni Anak Ni Jolma i di langit. Anggo disi tangis ma sude bangso na satano on, marsak. Diida halahi ma Anak Ni Jolma i ro di bagasan ombun mardongan kuaso dohot hasangapan godang.

MATEUS 25:31

“Muda ro Anak Ni Jolma i gabe Raja mardongan angka surusuruanNia, juguk ma Ia di habangsa ni hamuliaonNa.

MATEUS 26:64

Dialusi Jesus ma, “Tutu. Tapi ingot hamu ma: Mamungka saonnari idaonmunu ma Anak Ni Jolma i juguk di siamun ni Na Markuaso i. Dung i ro ma Ia di ginjang ombun na di langit an!”

MATEUS 8:20

Dialusi Jesus ma, “Marliang do sorigala, marasar do angka unggas, tapi anggo Anak Ni Jolma i, i ma suruan ni Debata, nada adong inganan hapayahan ni uluNia.”

MARKUS 14:62

“Olo!” ninna Jesus. “Sude hamu angkon marnida Anak Ni Jolma i juguk di siamun ni Na Markuaso i. Dung i idaonmunu ma Ia ro di bagasan ombun sian langit an!”

MARKUS 8:38

Angke sanga ise na maila hara ni Au dohot hatangKu di tonga-tonga ni halak na so setia dohot pardosa, maila muse ma Anak Ni Jolma i mida ia muda ro Ia di bagasan hasangapan ni AmangNia rap dohot surusuruanNia na badia i.”

LUKAS 21:27

Jadi disi ma ro Anak Ni Jolma i di bagasan ombun mardongan hamuliaan dohot kuaso na godang.

LUKAS 22:69

Tapi mamungka saonnari, juguk ma Anak Ni Jolma i di siamun ni Debata Na Markuaso i.”

LUKAS 9:26

Muda adong na maila hara ni Au jana maila hara ni pangajaranKu di adopan ni halak na asing, maila muse ma Anak Ni Jolma i mangokui halak sisongon i di haroroNia saulahon mardongan hasangapanNia, jana mardongan hasangapan ni Amangnia, songon i dohot hasangapan ni angka surusuruan na badia!

JOHANNES 21:22

Ninna Jesus ma mangalusi, “Muda jop rohangKu laing mangolu ia lopus ro Au mangulahi, ahana ma i di ho. Salaku ihutkon ma Au!” ninna Jesus.

JOHANNES 21:23

Jadi sar ma hobar di tonga-tonga ni angka sisean ni Jesus paboa na so mate sisean na sada i. Hape nian nada adong didok Jesus, na so mate ia; anggo na nidok ni Jesus songon on do, “Muda jop rohangKu laing mangolu ia lopus ro Au, aha na ma i di ho!” ning Ia do.

BAENON NI ANGKA RASUL 1:11

Ninna ma, “Ale hamu halak Galilea, biasi jongjong sajo hamu disi mangaligi tu langit i? Anggo Jesus na niidamunu i kehe manaek tu banua ginjang di adopanmunu, mulak do Ia mangulahi laing songon na niidamunu sinangkin.”

SURAT NI SI PAULUS TU PARLAGUTAN ROM 14:12

Jadi angkon patorangonta be do tu jolo ni Debata sudena angka karejo na tapambaeni i.

SURAT NI SI PAULUS TU PARLAGUTAN ROM 2:6

Harana baloskononNia do tu sude halak hombar tu pambaenanna be.

1 KORINTUS 15:23

Tapi marguru tu aturanna be do nipangolu halahi: Na parjolo Kristus; dung i angka na dung nampuna ni Kristus di hatiha haroroNia.

1 KORINTUS 3:13

Muda ro saulahon Kristus, disi pe anso tarida parkarejoan ni halahi be. Harana api paruhuman do pataridahon karejo ni ganop be. Api i ma na manguji jana manontuhon hadengganan ni karejo i.

1 KORINTUS 8:8

Satutuna nada pola mur solkot hita tu Debata hara ni sipanganon i. Haru tapangan pe sipanganon i nada pola maruntung hita bagi aha. So tapangan pe sipanganon i nada pola adong ruginta sanga aha.

2 KORINTUS 5:10

Harana angkon jongjong do hita sude di jolo ni panguhuman ni Kristus i, jana ganop be angkon manjagit balos satontang tu pambaenanna be taran mangolu, pangalaho na denggan sanga na jat.

EPESUS 6:8

Angkon ingotonmunu do, angkon jagiton ni ganop halak na denggan roha do, sanga na hatoban sanga na anak mardeka, balos ni angka na denggan na nibaenna sian Tuhan i.

KOLOSSE 3:25

Harana sanga ise na marsala, tanggungonna ma angka hasalaanna i; angke sarupa do sudena jolma diida Tuhan i.

1 TESSALONIKA 1:10

Laing di hatahon halahi do sanga na bia ngolngolna pangkilalaanmunu painte-intehon haroro ni Anak Ni Debata sian banua ginjang; i ma Jesus na dung dipangolu Debata sian hamatean i. Laing Jesus i do na paluahon hita sian rimas ni Debata na giot ro i.

1 TESSALONIKA 4:16

Saulahon di na mijur Tuhan Jesus sandiri sian banua ginjang, pio-pio ma kapala ni surusuruan i marsora na gogo jana dipalu ma sarune ni Debata songon boa-boana. Jadi angka halak na dung porsaya tu Kristus dompak di ngoluna be, pangoluon ma halahi parjolo.

JAKOBUS 5:7

Antong sobar ma hamu angka dongan lopus ro Tuhanta i. Ligi hamu ma sobar ni angka partani i paintehon lopus dilehen tanonia i suha na mararga disia. Sobar do ia paintehon udan di musim gugur dohot udan di musim bunga.

1 PETRUS 1:17

Didok hamu Amang tu Debata dompak martangiang hamu. Antong, Debata i do na mandabuhon uhuman tu jolma marguru tu pambaenanna be so pola mangaligi bohi. Hara ni i, salolot di tano on hamu, pagodang hamu ma Debata di ngolumunu.

1 JOHANNES 2:28

Jadi hamu angka dakdanakku, tongtong ma hamu maringanan di bagasan Kristus, anso pos situtu rohanta paboa na puluk hita mangadop tuSia so pola maila be hita saulahon di haroroNa.

JUDAS 1:14

Jungada do didok si Henokh pomparan ni si Adam na papitu sundutkon taringot tu halak sisongon on. Didok ia, “Ligi da, na giot ro do Tuhan mardongan angka surusuruanNia na marribu-ribu

HALUMBAAN 1:7

Ligi da, na ro ma Ia dihaliangi ombun! Idaon ni sude halak ma Ia, dohot halahi na maniham Ia. Mangangguhi ma sasudena bangso na di tano on manangisi dirina be hara ni Ia. Olo, tutu do na songon i! Amen!

HALUMBAAN 2:23

Angka halak na mangihutkon ia pe angkon Hubunu do anso laing torang diboto angka parlagutan i paboa na Au do na tuk mandodo pikiran dohot roha ni jolma. BaloskononKu ma tu hamu marguru tu pambaenanmunu be.

HALUMBAAN 20:12

Jana huida ma angka halak na mate, na menek dohot na magodang rap jongjong di jolo ni habangsa i. Dibuka ma dohot angka buku, dung i dibuka muse ma sada buku na asing, i ma buku hangoluan. Jana di hatiha i ma didabu uhuman tu angka halak na dung mate, satongtang tu pambaenan ni halahi di hatiha na salpu marguru tu na tarsurat di bagasan angka buku i.