MATEUS 16:23 - BIBEL JAMITA NA DENGGAN

²³ Tapi humusor ma Jesus manaili tu si Petrus, didok Ia ma, “Morot ho sian on, Sibolis! Gabe batu partuktuhan do ho di Au. Pikiran ni jolma do pikiranmi! Inda pikiran ni Debata na songon i!”

MATEUS 16:23 ပူးပေါင်းရင်းမြစ်များ

PAMUNGKAAN 3:17

Dung i didok Ia ma tu halaklahi i, “Dibaen madung dipatangi-tangi ho hata ni dadaborumu gabe dipangan ho batu ni hayu na Hudok na so tola panganonmu. Jadi hara ni pangalahomi, gabe hona bura ma tano. Angkon marsitutu noma ho karejo salolot di ngolumu, anso tuk panganonmu sian suha ni tano i.

2 SAMUEL 19:22

Tapi mangkuling ma si Daud tu si Abisai dohot si Joab, mandok, “Ulang manganto-antoi hamu. Biasi arsahanmunu au? Di ari sadari on mulak au gabe raja di Israel, jana nada adong tola halak Israel na mate hona uhum.”

1 JUJUR TAON 21:1

Sai giot agoon ni Sibolis do halak Israel; jadi dijajang Sibolis i ma si Daud anso mambaen sensus.

JESAYA 8:14

Dibaen na sun badia do Au, gabe batu partuktuhan ma Au di rayat ni Juda, Israel dohot Jerusalem. Songon tirangkap do Au na giot manangkup halahi.

MATEUS 16:22

Dung i ditogu si Petrus ma Jesus tu duru laho manggorahon Ia. Didok si Petrus, “Sai dipadao Debata ma na songon i sian Ho, Tuhan! Sai ulang ma tulus pangalaho na songon i tu Ho!”

MATEUS 18:7

Marjaya do portibi on hara ni angka pangalaho na di bagasanna, i ma na mambaen halak gabe mardosa. Tutu angkon sai tongtong do adong na songon i. Tapi marjaya ma halak na gabe parbonciranna!

MATEUS 4:10

Dialusi Jesus ma, “Morot ma ho, Sibolis! Angke tarsurat do, ‘Sombaonmu do Tuhan Debatamu, hum Ia sajo do oloanmu!’ ”

MARKUS 8:33

Tapi dihudukkon Jesus ma si Petrus, tu anak siseanNia na asing i ma diligi Ia. Dimuruhi Ia ma si Petrus, ning Ia, “Morot ho sian on, Sibolis do ho! Inda pikiran ni Debata pikiranmi, pikiran ni jolma do i!”

LUKAS 4:8

Dialusi Jesus ma, “Tarsurat do di Buku Na Badia i, ‘Somba ma Tuhan, Debatamu jana Ia sajo do sioloanmu!’ ”

JOHANNES 6:70

Dialusi Jesus ma tu halahi, “Au do nian mamili hamu na dua bolas halak on. Tapi haru songon i pe gabe songon Sibolis do sahalak sian hamu!”

SURAT NI SI PAULUS TU PARLAGUTAN ROM 14:13

Hara ni i ulang marsiuhuman hita sama hita! Gumonan ma ulang tabaen sanga aha na maroban donganta gabe madabu sanga tartuktuk.

SURAT NI SI PAULUS TU PARLAGUTAN ROM 14:21

Gumonan ma indangkon sai nipangan juhut sanga niinum anggur sanga aha sajo pe tehe, muda patunda ni i do tartuktuk dongan na asing.

PILIPPI 3:19

Anggo ujungna angkon gabe sego do ngolu ni halak sisongon i, angke na martuhankon hagiot ni pamatangna sandiri do halahi. Angka pangalaho sihailahononkon, hape gabe i do na niargahon ni halahi; angke hum angka na mardomu tu tano on sajo do na nisarihonna.

KOLOSSE 3:2

Tu angka pangalaho na disi ma tujuhon hamu pikiranmunu ulang ma tu angka na di tano on.