MATEUS 15:14 - BIBEL JAMITA NA DENGGAN

¹⁴ Padiar hamu ma halahi. Angke panogu na mapitung do halahi, na manogu na mapitung. Muda di togu na mapitung halak na mapitung, madabu do halahi na dua tu lubang i.”

MATEUS 15:14 ပူးပေါင်းရင်းမြစ်များ

JESAYA 31:3

Hum jolma na somal do halak Mesir, nada debata halahi. Kudo ni halahi pe mahluk na somal do, nada adong bako hadebataanna. Muda jabat martindak Tuhan, targompang noma bangso na gogo i, jana bangso na gale na nitungkolanna i pe madabu noma. Gabe rap marujung noma i dua-duana.

JESAYA 42:19

Adong dope he na umpitung sian Israel naposongKu? Adong dope he na ummingol sian suruanKu?

JESAYA 56:10

angke angka na mapitung do anggo pamimpin ni bangsongKu! Nada diboto halahi bagi aha. Songon anjing panjago na so martunggu do halahi, tapi na modom sajo do halahi.

JESAYA 9:16

Madung dipalilu jana digaor angka pamimpin ni bangso i rayat i.

JEREMIA 5:31

Angka panurirang manghatahon gabus jana angka malim mangajarkon hagiotna sambing. Jana i do na diparhagiot ni bangsongKu. Tapi muda ro ari parpudi, aha ma sibaenonmunu?”

JEREMIA 6:15

Angkon maila do nian halahi hara ni sude parbuatan ni halahi na jat i. Hape sihapal bohi do halahi jana na so umboto ila. Patunda ni i angkon gabe madabu do halahi songon halak na asing na dung madabu i; abis noma barita ni halahi muda jabat Au manguhum halahi. Au Tuhan, madung mandok songon i.”

JEREMIA 8:12

O hamu bangsongKu, patut nian maila ma hamu hara ni sude halayason na dung nibaenmunu on! Hape hapal do bohimunu jana nada mamboto hahaila. Jadi hara ni i angkon madabu hamu songon halak na asing na dung madabu i; abis ma riwayatmunu muda dung Huuhumi hamu. Au Tuhan, madung mandok songon i.”

HOSEA 4:17

Mardomu do Efraim dohot angka gana-ganaan, padiar ma ia!

MALEAKI 2:8

Hape saonnari, madung manyimbil hamu angka malim sian dalan na tutu. Hara ni angka pangajaranmunu, hona sarat do bahat halak gabe mambaen na sala. Diputuskon hamu do parjanjian dohot halak Levi ninna Tuhan Na Markuaso.

LUKAS 6:39

Dung i dicaritohon Jesus ma tu halahi umpama on, “Tarbaen ma he na mapitung manogu na mapitung? Nada he madabu ma halahi na dua tu bagasan lubang?

JOHANNES 9:39

Didok Jesus ma, “Laho mandalankon uhum do umbaen na ro Au tu portibi on; anso marnida angka na mapitung jana halak na marnida gabe mapitung.”

1 TIMOTEUS 6:5

dohot parsalisian na so marujung. Na dung puntol do pikiran ni halak na songon i jana sala. Diambang halahi tarbaen ma dapotan untung sian ugamo.

2 PETRUS 2:1

Najolo di tonga-tonga ni bangso ni Debata, ro do angka panurirang pargabus. Laing songon i muse do di tonga-tongamunu, marroan ma angka guru pargabus. Baritahonon ni halahi ma angka pangajaran na so tutu, na pasegohon. Jana diporso halahi do Parkuaso na dung marhancit laho paluahon halahi. Jadi na mangalap magona do halahi disi, na tibu mandondoni halahi sandiri.

2 PETRUS 2:17

Songon mual na mate do angka guru pargabus i jana songon ombun na niombus ni halingsungsung. Madung diparade Debata do di halahi inganan na golap marimpot-impot.

HALUMBAAN 19:20

Gabe tartangkup ma binatang i rap dohot panurirang pargabus na pabaen-baen angka tanda hahomangan di jolo ni binatang i. (Angka tanda hahomangan i do dibaen binatang i paoto-otohon angka jolma na mamake tanda ni binatang i dohot angka jolma na manyomba patung ni binatang i.) Jadi didanggurkon ma binatang i dohot panurirang pargabus i mangolu-ngolu tu bagasan laut api na gara-gara dohot barerang.

HALUMBAAN 22:15

Tapi sanga ise halak na mambaen habilean, angka na marhadatuon, angka halak na mambaen rorang, angka halak sibunu jolma, angka halak na marsomba gana-ganaan, dohot angka halak pargabus di hatana sanga markite-hite pambaenanna, di balian ni kota i do anggo inganan ni angka halak sisongon i.