MASMUR 72:17 - BIBEL JAMITA NA DENGGAN

¹⁷ Sai taringot ma di roha sapanjangna goarnia, manahan ma habonggalonna salolot adong mataniari. Sai dihalungunkon angka jolma ma nian dipasupasu songon ia, dohot sude bangso mandok ‘na martua ma da ia’.

MASMUR 72:17 ပူးပေါင်းရင်းမြစ်များ

PAMUNGKAAN 12:3

PasupasuonKu ma sanga ise na mamasumasu ho. Tapi buraanKu ma sanga ise na mamurai ho. Jana hara ni ho, pasupasuonKu ma sude angka bangso na di tano on.”

PAMUNGKAAN 22:18

Pangidoan ni sude bangso na di tano on ma tu Au anso Hupasupasu halahi – hara ni na nioloanmu parentangKu.”

2 SAMUEL 7:13

Ia do na giot pajongjong bagas di Au, jana pahotonKu harajaannia sapanjangna.

2 SAMUEL 7:16

Angkon tongtong do adong pomparanmu, jana baenonKu harajaanmu martahan salolot-lolotna. Na so ra marujung do harajaanmu?’ ”

MASMUR 21:7

Mararop roha tu Tuhan i do raja i, sai sonang do ia, angke tongtong do ia dihaholongi Tuhan Na Markuaso i.

MASMUR 45:17

Endehononkon ma jana pabonggalkonon ma goar ni raja i, jana salolot-lolotna ma angka bangso mamuji raja i.

MASMUR 89:36

Martahan do habangsania salolot marsinondang mataniari, jana pomparannia sandiri manjuguki.

HARURUAR 3:15

Baritahon ma tu bangso Israel, paboa Au do Tuhan Debata ni ompu ni halahi, Debata ni si Abraham, si Ishak dohot si Jakob na marsuru ho manopot halahi. I do goarKu ro di salolot ni lolotna. On ma panggoaringKu di sude bangso marsundut-sundut.

JESAYA 7:14

Hara ni i Tuhan sandiri ma mangalehen sada tanda di hamu: Sasintongna, sada halak anakboru angkon mardenggan pamatang jana manubuhon sada anak, jana goaronnia ma Anak i “Immanuel”.

JEREMIA 4:2

baru pe anso tola hamu marsumpa mangasahon goarKu. Jadi gabe pangidoon ni sandok bangso ma anso Hupasupasu halahi, jana pujion ni halahi ma Au.”

MATEUS 1:21

Sorang ma sian ia sada anak halaklahi, angkon Jesus do baenonmu goar ni Dakdanak i. Harana, giot paluaonNia ma bangsoNa sian angka dosa ni halahi be.”

MATEUS 1:23

“Denggan ma pamatang ni sada bujing-bujing, sorang ma sian ia sada anak halaklahi. Digoari ma Dakdanak i Immanuel.” (Di hata Ibrani, Immanuel astuanna “Debata do rap dohot hita”.)

LUKAS 1:48

Angke diingot Ia do au, naposoNa na bile on! Mamungka saonnari sude ma halak mandokkon au na martua,

BAENON NI ANGKA RASUL 3:16

Haporsayaan di goar ni Jesus madung mangalehen gogo tu jolma na niligi jana na nitandamunu on; jana haporsayaan i ma na mangalehen hamalumon tu bayo on di adopanmunu sudena.

GALATIA 3:14

Dibaen Kristus Jesus pe songon i anso laing dilehen do tu angka bangso na asing pasupasu na nijanjihon ni Debata tu si Abraham i. Dung i hita na porsaya tu Debata, tola ma manjagit Tondi na nijanjihon ni Debata i.

EPESUS 1:3

Pinuji ma Debata, Ama ni Tuhanta Jesus Kristus! Dipasupasu Ia do hita dohot sude ragam-ragam ni pasupasu partondion sian banua ginjang, hara ni na dung mardomu i hita dohot Kristus.

EPESUS 3:14

Hara ni i ma umbaen na marsinggang au di adopan ni Ama i.

PILIPPI 2:10

Anso marsinggang ma di bagasan goar ni Jesus, sandok na di banua ginjang, na di tano on dohot na di toru ni tano on.

KOLOSSE 1:3

Madung hami bege, na dihaporsayai hamu Jesus Kristus jana dihaholongi hamu do sudena halak na badia. Jadi muda hatiha hami tangiangkon hamu, gabe tongtong do mandok tarimakasi hami tu Debata, Ama ni Tuhanta Jesus Kristus.

1 PETRUS 1:3

Mandok tarimakasi ma hita tu Debata bope Ama ni Tuhanta Jesus Kristus! Hara ni denggan ni rohaNia, dibaen Ia do hita gabe jolma na imbaru na maruli arop ni roha na tongtong mangolu, angke madung dipangolu Kristus mangulahi sian hamatean.

HALUMBAAN 15:4

Ise dope he na so mabiar mida Ho, Tuhan, jana ise dope he na so ra pasangapkon goarMu? Hum Ho sajo do na badia. Marroan ma angka bangso sudena manyomba Ho dibaen madung diida sasude halak angka panguhumanMu na tigor i.”