MASMUR 145:17 - BIBEL JAMITA NA DENGGAN

¹⁷ Tigor do Tuhan i di sude tindakanNa, gok holong ni roha do Ia di sude na nibaenNa.

MASMUR 145:17 ပူးပေါင်းရင်းမြစ်များ

PAMUNGKAAN 18:25

Pasti do na so ra Ho mamunu angka halak na so marsala i rap dohot na marsala. Inda masuk di akal! Inda mungkin ra Ho mambaen songon i. Sugari sura dibaen Ho songon i, gabe sarupama angka halak na so marsala dohot na marsala. Hape nian matua na tigor do anggo Panguhum ni sandok na adong.”

2 SAMUEL 22:31

Sanggam do pambaenan ni Debata, haposan do sude janjiNa. Songon panapik ni sinjata do Tuhan i di halak na maporus tuSia sandiri.

JOB 34:10

O hamu angka halak na mamboto, tangihon ma! Ra ma he Debata Na Markuaso i mambaen na sala?

JOB 34:12

Nada mambaen hajahatan Debata Na Markuaso; dilehen Ia do hatigoran tu sude jolma.

MASMUR 103:6

Didalankon Tuhan uhum dohot hatigoran tu sude halak na didondonan.

MASMUR 112:4

Marsinondang ma na torang di bagasan hagolapan, di halak na burju, na tigor, parholong dohot paribo.

MASMUR 116:5

Na denggan do Tuhan i jana parasi roha; gok ibo ni roha do Debatanta.

MASMUR 50:6

Dipabotohon langit do hatigoranNa, angke Debata sandiri do panguhumNa.

MASMUR 89:14

Hatigoran dohot hajujuron do ojahan ni harajaanMu, torang do huida holong dohot habonaron di sude na nibaenMu.

MASMUR 97:2

Ombun dohot hagolapan manggupgupi Ia, hatigoran dohot uhum do ojahan ni pangarajaionNia.

JESAYA 45:21

Paboa jana patuduhon ma sidalianmu, olo, padiar ma halahi rap martahi, Ise dehe na paboahon sian na robi, jana mambaritahonsa? Nada he Au, Tuhan? Nada adong na asing, nada adong Debata asing sian Au! Debata na tigor jana Sipalua, nada adong asing sian Au!”

ZEPANYA 3:5

Tapi na tigor do anggo Tuhan di tonga-tonga ni halahi, nada unjung dibaen Ia hakejamon, na so unjung dihalupahon di hatiha manyogot. Tapi halak na kejam nada mamboto hahaila.

ZAKARIA 9:9

Ale boru Sion, marjop ni roha ma ho! Marolop-olop ma hamu ale pangisi ni Jerusalem! Ligi ma! Ro rajamu mardongan hamonangan! Raja na tigor do Ia na maroban haluaan. Na serep roha do Ia, jana mangalombut halode, sada halode jara-jara.

PANGARATAION 32:4

Tuhan ma da na mangondihon ho gumogo, sude dalanNa tigor jana sanggam do. Setia do Debatamu jana ias rohaNa, na denggan dohot na patut do dibaen Ia.

HALUMBAAN 19:11

Dung i huida ma mungkap banua ginjang, haruar ma sada kudo na bontar, jana na juguk di ginjangna i margoar, “Na Setia dohot Na Sintong,” jana markite-hite hatigoran do Ia manguhumi dohot marporang.

HALUMBAAN 19:2

Dibaen na sintong jana na tigor do angka uhumNia, angke diuhumi Ia do panggampang godang i, na manyegohon tano on markite-hite panggampangonnia i, jana Ia do na mambaloskon mudar ni angka naposoNia tu panggampang i.”

HALUMBAAN 4:8

Mahluk na opat i, onom be habongna jana sap sudena dohot mata. Nada mantak mahluk na opat i marende arian na borngin, “Na badia, na badia, na badia do Tuhan Debata Parkuaso Na Sumurung i; na adong, na dung adong, jana na giot ro!”