LUKAS 24:27 - BIBEL JAMITA NA DENGGAN

²⁷ Dung i dipatorang Jesus ma tu halahi sanga aha na nidok taringot tuSia di bagasan Buku Na Badia i, mamungka sian Buku Ni si Musa lopus tu buku-buku ni angka panurirang.

LUKAS 24:27 ပူးပေါင်းရင်းမြစ်များ

PAMUNGKAAN 12:3

PasupasuonKu ma sanga ise na mamasumasu ho. Tapi buraanKu ma sanga ise na mamurai ho. Jana hara ni ho, pasupasuonKu ma sude angka bangso na di tano on.”

PAMUNGKAAN 22:18

Pangidoan ni sude bangso na di tano on ma tu Au anso Hupasupasu halahi – hara ni na nioloanmu parentangKu.”

PAMUNGKAAN 26:4

LehenonKu do hagabean anso maranak marpahompu ho sabahat ni bintang na di langit jana lehenonKu do sude luat on tu halahi. Pangidohonon ni bangso na satano on ma sudena tu Au anso Hupasupasu halahi songon pamasumasungKu di pomparanmu.

PAMUNGKAAN 3:15

Marsihosoman ma ho dohot dadaboru i. Marsalisi ma torus pomparanna tu pomparanmu. Ropukkonon ni pomparannia ma ulumu jana turbingonmu ma tambihulna.”

PAMUNGKAAN 49:10

Tiopon ni si Juda ma tungkot harajaon. Mamarenta ma pomparanna sapanjangna. Marroan ma angka bangso pasahat somba-sombana. Jana manungkap tanda tunduk di jolona.

MASMUR 132:11

Mardongan sumpa do dijanjihon Ho tu si Daud, jana nada tarihonMu be janjiMi mangulahi. NingMu do, “Sada sian anakmu baenonKu gabe raja; ia ma manggontihon ho marhabangsa.

JESAYA 1:23

Angka pamimpinmu halak na sai mangalo do jana kaki tangan ni panangko; sai dihagioti halahi do manjagit silua dohot suap. Nada unjung halahi ra mangondihon na so marama so marina di pangadilan; nada diampirkon halahi angka na mabalu na mangaduhon parkarona.

JESAYA 50:6

Hulehen do tanggurungku tu halak na mambalbali au, jana bohingku tu halak na mangumpat janggutku. Nada hutabunihon bohingku hatiha dipalayas sanga ditijuri au.

JESAYA 7:14

Hara ni i Tuhan sandiri ma mangalehen sada tanda di hamu: Sasintongna, sada halak anakboru angkon mardenggan pamatang jana manubuhon sada anak, jana goaronnia ma Anak i “Immanuel”.

JESAYA 8:17

Madung ditabunihon Tuhan diriNa maradopkon bangsoNia, tapi anggo au porsaya jana mararop roha do tuSia.

JESAYA 9:1

Tapi nada jabat sadia honok nari, malua ma halahi sian hasusaan i. Angka luat na niinganan ni Marga Zebulon dohot Naftali jungada do dietong i na bile. Tapi anggo tu hatiha na giot ro, sude luat i sian sabola Habincaran ni Laut Tonga lopus taripar ni Batang aek Jordan, lopus tu Galilea tehe na niinganan ni halak na asing, gabe mandapot sangap ma.

JEHESKIEL 34:23

AngkatonKu ma parmahan laho marmahani halahi, i ma naposongKu si Daud, jana parmahanonnia ma halahi.

JEHESKIEL 37:25

Maringanan ma halahi di tano na dung Hulehen tu naposongKu si Jakob jana na niinganan ni ompu ni halahi, olo, halahi; angka anak ni halahi bope pahompu ni halahi angkon tinggal disi salolot ni lolotna jana naposongKu si Daud ma raja ni halahi salolot ni lolotna.

DANIEL 7:13

Di bagasan parnidaan na tu au borngin i, huida ma adong tarsongon jolma. Ro ma ia dihuliangi ombun lalu kehe ia mandapotkon Na Tongtong Mangolu i jana dipatandahon tuSia.

MIKA 5:6

Halak Israel na teba i, gabe songon ombun na lambok ma i sian Tuhan maradopkon angka bangso na bahat, jana songon parro ni udan tu suan-suanan. Marpangunsandean ma halahi tu Debata, jana nada be tu jolma.

MIKA 7:20

PatuduhononMu ma tu bangsoMu pomparan ni si Abraham dohot si Jakob habonaranMu dohot holong ni rohaMu na so marparsuhatan i songon na nijanjihonMu tu ompunami narobi.

ZAKARIA 13:7

Didok Tuhan Na Markuaso i ma, “Jongjong ma ho, ale podang, lancim ma parmahan na Husuru i! Matehon ma ia, gabe marserak ma angka biri-biri i. AloonKu ma bangsongKu.

ZAKARIA 9:9

Ale boru Sion, marjop ni roha ma ho! Marolop-olop ma hamu ale pangisi ni Jerusalem! Ligi ma! Ro rajamu mardongan hamonangan! Raja na tigor do Ia na maroban haluaan. Na serep roha do Ia, jana mangalombut halode, sada halode jara-jara.

MALEAKI 4:2

Tapi anggo tu hamu angka na mangkabiari Au, songon mataniari bincar do kuasongKu na paluahon dohot padumpangkon hamamalum di hamu. Malua do hamu jana marjop ni roha songon anak ni lombu na baru dipalua sian barana.

BILANGAN 21:14

I ma harana umbaen na tarsurat di buku parporangan ni Tuhan, “..... Huta Waheb di Luat Sufa dohot napa-napana; Batang aek Arnon

MARKUS 4:34

Sai marumpama do Jesus muda mangajari Ia tu halak na bahat i. Tapi anggo Ia dohot angka siseanNia i sajo, dipatorang Ia do sude tu halahi.

LUKAS 24:25

Dung i mandok hata ma Jesus tu halahi ning Ia, “Otona i hamu! Na maol ma hamu manghaporsayai na nidok ni angka panurirang i!

LUKAS 24:44

Dung i mandok hata ma Ia tu halahi ning Ia ma, “Angka on ma na Hupaboa hian di hamu, dompak rap dope Au dohot hamu, angkon tarjadi do sudena sanga aha na tarsurat taringot tu Au di angka Buku Ni si Musa dohot buku ni angka panurirang dohot Masmur i.”

JOHANNES 1:45

Dung i marsuo muse ma si Pilipus dohot si Natanael jana didok ia ma, “Madung marsuo hami dohot Ia na nidok ni si Musa di bagasan Buku Tona i, dohot na nidok ni angka panurirang, i ma Jesus anak ni si Josep halak Nasaret i.”

JOHANNES 12:41

Songon i do didok si Jesaya, harana madung diida ia hasangapanNia jana na mangkobari ia taringot tuSia.

JOHANNES 5:37

Jana Ama na marsuru Au pe madung dilehen Ia hasaksian taringot tu Au. Anggo hamu nada unjung dope umbege sora ni Ama i, sanga marnida bohiNia.

JOHANNES 5:39

Diparsiajari hamu do nian Buku Na Badia i angke dipikir hamu dapot hamu ma hangoluan na so mantak i muda dung diparsiajari hamu i. Jana Buku Na Badia i sandiri pe disaksihon i do taringot tu Au!

BAENON NI ANGKA RASUL 10:43

Sude do angka panurirang manaringoti Ia. Didok halahi, dapotan hasesaan ni dosa do sudena halak na porsaya tu Jesus, markite-hite goarNia.”

BAENON NI ANGKA RASUL 3:18

Jana hara ni i ma umbaen na laing tarjadi sanga aha na dung dipabotohon Debata markite-hite angka panurirangNia, paboa na angkon manaon parkancitan do hape Kristus i.

BAENON NI ANGKA RASUL 3:22

Angke jungada do didok si Musa, ‘Suruhonon ni Tuhan Debatamunu do tu hamu sada panurirang sian bangsomunu sandiri songon parsuruNia di au. Angkon tangihononmunu do sude na nidok ni panurirang i tu hamu.

BAENON NI ANGKA RASUL 3:24

Sudena angka panurirang na dung jungada pabolkaskon barita na sian Debata, mamungka sian Panurirang Samuel dohot angka panurirang na asing di pudi ni si Samuel, dipaboa halahi do taringot tu na masa sisaonnari on.

BAENON NI ANGKA RASUL 7:37

Laing si Musa on do na mandok tu halak Israel, ‘Lehenon ni Debata ma tu hamu sada panurirang na nipiliNia sian tonga-tongamunu sandiri, songon panodoNia di au.’

BAENON NI ANGKA RASUL 8:35

Dung i dipungka si Pilipus ma mandok hata jana sian ayat-ayat i ma dipungka ia manjamitahon Jamita Na Denggan i tu parpangkat i, i ma taringot tu Jesus.

PANGARATAION 1:45

Dung i pio-pio ma hamu tu Tuhan mangido tolong, hape nada ra be Ia manangihon sanga mamparrohahon hamu.

PANGARATAION 18:15

Tapi suruonNia ma tu hamu sian bangsomunu sandiri sada halak panurirang songon au on jana angkon oloanmunu do panurirang i.

HALUMBAAN 19:10

Tungkap ma au di jolo ni surusuruan i giot marsomba tusia, tapi ning ia ma mandok tu au, “Ulang! Ulang pola marsomba ho tu au, Debata ma somba! Harana au pe laing naposo do songon ho jana sarupa dohot angka donganmu na marhasaksian taringot tu Jesus.” Somba ma Debata, angke anggo hasaksian taringot tu Jesus, i ma tondi hasurirangon.