LUKAS 16:13 - BIBEL JAMITA NA DENGGAN

¹³ “Umpe adong sada halak naposo, na bisa gabe naposo ni dua tuan rap sanoli mangoloi; angke goyak do rohania tu tuannia na sada jana dihaholongi ia na sada nari, sanga pe dipasangap ia na sada hape na sada nari diapasi ia. Nada tarbaen jolma gabe pangoloi tu Debata dohot muse pangoloi tu mammon.”

LUKAS 16:13 ပူးပေါင်းရင်းမြစ်များ

MATEUS 4:10

Dialusi Jesus ma, “Morot ma ho, Sibolis! Angke tarsurat do, ‘Sombaonmu do Tuhan Debatamu, hum Ia sajo do oloanmu!’ ”

MATEUS 6:24

“Nada adong sahalak pe na tarbaen mangoloi dua tuan sanoli mangoloi. Muda dibaen ia songon i, goyak ma rohania tu na sada, holong ma rohania tu na sada nari. Sanga burju ma ia tu tuan na sada, tapi na sada nari inda diantureskon. Songon i muse do hamu. Nada tarbaen hamu markarejo tu Debata dohot markarejo tu arta sanoli mangkarejohon.

LUKAS 11:23

Sanga ise na so mandongani Au, alongKu do i, jana sanga ise na so rap dohot Au palagutkon na paserakkon do i.”

LUKAS 14:26

“Muda adong halak na ro tu Au, hape holongan do rohania mida inangnia, amangnia, dadaborunia, dakdanaknia, kahangginia, angka ibotonia dohot dirinia sandiri pe tehe, nada tarbaen halak na songon i gabe siihutkon Au.

LUKAS 16:12

Muda tardapot na so haposan hamu taringot tu barang ni halak na asing, ise ma he na ra mangalehen tu hamu nampunamunu sandiri?”

LUKAS 16:9

Dung i mandok hata ma Jesus mangulahi. Didok Ia ma, “Tangihon hamu ma jolo on: Pargunahon hamu ma mammon na geduk laho manjalahi dongan, anso dijagit hamu di inganan na hot muda dung so adong be sinadongan na di tano on.

LUKAS 9:50

Didok Jesus ma, “Ulang antahi hamu halahi, angke halak na so mangalo hamu, na mamihak tu hamu do i.”

JAKOBUS 4:4

Angka jolma na so tigor do hamu! Diboto hamu dehe, muda mardongan hamu dohot portibi on na gabe musu ni Debata do hamu?

JOSUA 24:15

Sugari sura nada ra hamu mangoloi tu Tuhan, laing sadari on ma baen hamu haputusanna, sanga na tu ise do giotmunu mangoloi: Tu angka debata na nisomba ni ompumunu najolo di Mesopotamia, sanga tu angka debata ni halak Amori na niingananmunu tanona saonnari do. Tapi anggo hami – au dohot dongan sabagasku – hum Tuhan do oloannami.”