JOSUA 9:14 - BIBEL JAMITA NA DENGGAN

¹⁴ Jadi dijagit halak Israel ma antong sipanganon i sian angka halak Gibeon i, hape nada mangido sipaingot halahi sian Tuhan salaho tusi.

JOSUA 9:14 ပူးပေါင်းရင်းမြစ်များ

2 SAMUEL 2:1

Dung i marsapa ma si Daud tu Tuhan, “Diparhagiot rohaMu do Tuhan kehe au tu Juda mangarajai sada kota na adong disi?” “Olo,” ninna Tuhan mangalusi. “Kota dia ma i?” ning si Daud manyapai. “Hebron,” ninna Tuhan.

2 SAMUEL 5:19

Marsapa ma si Daud tu Tuhan, “Angkon poranganku dehe ulaning halak Pilistin i? LehenonMu do hamonangan di au?” Alus ni Tuhan, “Alo ma! Hulehen pe hamonangan di ho!”

ESRA 8:21

Hupabotohon ma di topi ni Batang aek Ahawa i, bahaso angkon puaso sude jana patorukkon roha di adopan ni Debata. Hami tangiangkon do anso dipimpin Debata hami di pardalanan i, jana dijagohon Ia hami, angka dakdanaknami dohot sude sinadongannami.

HARURUAR 28:30

Pasang ma Urim dohot Tumim di tutup andora i anso tarpake si Harun i muda ro ia mangadop tu ingananKu na badia. Muda di hatiha na songon i, angkon pakeonnia tongtong tutup andora i, anso diboto ia sanga aha giot ni rohangKu di bangsongKu Israel.”

BILANGAN 27:21

Angkon marsapa do si Josua tu si Eleasar jana sapaan ni si Eleasar ma hagiotKu marhite na mamake Urim. Marhite na songon i ma si Eleasar mamimpin si Josua dohot sude bangso Israel di sude parkaro na ro tu halahi.”

JAKOBUS 1:5

Muda adong sanga ise sian hamu na hurang marroha, dipangido ia ma habisuhon sian Debata, gabe lehenon ni Debata ma disia habisuhon. Angke tu ganop halak do Debata mangalehen jana mardongan ibo ni roha.

JOSUA 9:13

Jana angka kantongan ni anggur on pe na imbaru do dompak hami isi, hape saonnari, ligi hamu ma! Ma pola maribak-ribak. Pakeannami dohot sipatu sandalnami pe ma pola masego hara ni dao ni pardalanannami.”

HAKIM-HAKIM 1:1

Dung marujung ngolu ni si Josua, marsapa ma halak Israel tu Tuhan, “Tuhan, marga dia do sian hami na parjolo angkon mamorangi halak Kanaan?”

HAKIM-HAKIM 20:18

Kehe ma halak Israel tu inganan paribadatan na di Betel, lalu disapai halahi ma tu Debata, “Horong ni marga dia do sian hami angkon na parjolo situtu kehe mamorangi halak Benyamin?” Dialusi Tuhan ma, “Marga Juda.”

HAKIM-HAKIM 20:28

jana si Pinehas anak ni si Eleasar, pahompu ni si Harun do na markarejo gabe malim. Jadi marsapa ma rayat i tu Tuhan, “Tuhan, angkon laing kehe dope hami mamorangi angka kahangginami halak Benyamin i, sanga na angkon antahonanmi do porang on?” Dialusi Tuhan ma, “Pajolo hamu ma mamorangi halahi! Ancogot lehenonKu ma hamonangan di hamu.”

1 SAMUEL 22:10

Mangido panogu-noguon do si Ahimelek tu Tuhan sanga na aha do sibaenon ni si Daud. Tamba ni i dibaen muse dope balanjo ni si Daud jana dilehen podang ni si Goliat halak Pilistin i.”