JOSUA 8:31 - BIBEL JAMITA NA DENGGAN

³¹ Hombar tu na nipaboa ni si Musa naposo ni Tuhan tu halak Israel i do dibaen ia langgatan i. Angke tarsurat do di buku ni si Musa songon on, “Sada langgatan na nipajongjong dohot angka batu na so jungada dibola dohot parkokas na sian bosi.” Di ginjang ni langgatan i ma angka halak Israel manghaulkon tu Tuhan, haul situtungon jana songon i muse haul haluaan.

JOSUA 8:31 ပူးပေါင်းရင်းမြစ်များ

2 RAJA-RAJA 14:6

Tapi anggo dakdanak ni angka pagawe i, nada dipabunuhon ia, angke diihutkon ia do parenta ni Tuhan na di bagasan Buku Ni si Musa i na mandok, “Ulang nimatehon ama-ama hara ni hajahatan ni angka dakdanakna, jana ulang nimatehon angka dakdanak hara ni hajahatan ni simatobangna. Sanga ise pe, hum hara ni hajahatanna sandiri do na tola nimatehon.”

2 RAJA-RAJA 22:8

Dipalalu si Safan ma na niparentahon ni raja i tu si Hilkia, lalu dicaritohon si Hilkia ma tu si Safan, na dapotnia di Bagas Ni Debata buku ni angka Tona Ni Tuhan. Dilehen si Hilkia ma buku i tu si Safan jana disise si Safan ma i.

2 JUJUR TAON 25:4

Tapi nada dibunu ia anggo angka dakdanak ni pagawe i harana diihutkon ia do parenta ni Tuhan na di Uhum Ni si Musa na mandok, “Ulang mate niuhuman simatobang hara ni hajahatan na nibaen ni angka dakdanakna, jana ulang mate niuhuman angka dakdanak hara ni hajahatan na nibaen ni angka simatobangna. Hara ni hajahatan na nibaenna sandiri do anso tola mate hona uhum sanga na ise.”

2 JUJUR TAON 35:12

Ganop keluarga na dohot ro disi maruli do sada sian pahan-pahanan na giot sihaulkonon i gabe haul mangihutkon aturan na tarsurat di Buku Uhum Ni si Musa.

ESRA 6:18

Dung i tu pangkobasion di Bagas Ni Tuhan, disusun halahi ma golongan ni angka malim songon i angka halak Levi mangihutkon paraturan na tarsurat di buku ni si Musa.

NEHEMIA 13:1

Di na manyisehon Uhum Ni si Musa i tu rayat i, dapot ma hatorangan songon on: ‘Na so tola do halak Amon dohot Moab mardomu dohot bangso ni Debata;

HARURUAR 18:12

Dung i dioban si Jetro ma sanga na piga haul situtungon dohot haul sisambolon songon somba-sombania tu Debata. Ro do si Harun rap dohot sude pamimpin ni halak Israel i tu parjamuan i lalu mangankon panganon na badia i dohot si Jetro di jolo ni Debata.

HARURUAR 24:5

Dung i disuru si Musa ma angka doli-doli jana dipasahat halahi ma haul na nitutung tu Tuhan jana disambol halahi ma angka lombu songon haul pardonganan.

MATEUS 12:26

Antong, muda dipaisir Sibolis i donganna, jana marsalisi halahi sama halahi, songon dia dehe tarbaen togu harajaanna lakna?

PANGARATAION 27:2

Sadari on taripar ma hamu di Batang aek Jordan laho masuk tu tano na giot silehenon ni Tuhan Debatamunu tu hamu, angkon pajongjongonmunu do sanga na piga batu na godang, jana hapuri hamu ma.

PANGARATAION 27:8

Di ginjang ni angka batu na dung dihapuri i angkon suratkononmunu do tangkas sandok hata na sian uhum ni Debata.’ ”

JOSUA 1:8

Parrohahon ma denggan anso sai tongtong disise buku niuhum i ganop maribadat hamu. Parsiajari ma buku i arian dohot borngin jana dalankon ma sude na tarsurat di bagasan buku i ulang parlayas. Muda dipatulus ho sudena i, sonang ma ngolumu jana maruntung.