JOSUA 6:23 - BIBEL JAMITA NA DENGGAN

²³ Jadi kehe ma mata-mata sidua halak i jana dioban halahi ma si Rahab haruar rap dohot ama-inania, angka ibotona dohot koum sisolkotnia na deba nari. Dioban ma sude sisolkot ni si Rahab maradu angka hatobanna tu ruar tu inganan na aman di lambung parbandaran ni Israel.

JOSUA 6:23 ပူးပေါင်းရင်းမြစ်များ

PAMUNGKAAN 12:2

Hulehen pe bahat di ho pomparanmu jana gabe bangso na godang ma halahi. Hupasupasu pe ho jana tarbonggal pe goarmu Hubaen, lopus gabe pasupasu ho di halak na bahat.

PAMUNGKAAN 18:24

Sugari sura adong lima pulu halak na so marsala di kota i, laing abiskononMu dehe lakna sude kota i? Na so ra be lakna Ho mangampuni anso malua silima pulu halak i?

PAMUNGKAAN 19:29

Songon i ma di na niabiskon ni Debata angka kota na di rura na niinganan ni si Lot i, diingot Debata do si Abraham jana ditolong Ia do si Lot paluahon dirina.

BILANGAN 31:19

Jadi saonnari hamu na dung mamunu sada-sada halak jana na dung dais tu bangke angkon tinggal hamu di balian ni parbandaran pitu ari honokna. Di ari patoluhon dohot papituhon sude hamu dohot dadaboru na nitaban i, angkon paiaskon diri.

BAENON NI ANGKA RASUL 10:28

Dung i mandok hata ma ia tu halahi, “Diboto hamu do, na so tola do halak Jahudi hara ni ugamo ni halahi mardongan dohot angka bangso na asing sanga masuk tu bagas ni halahi. Tapi madung dipatidahon Debata tu au, na so tola dokkononku hodar sanga haram sanga na ise pe.

BAENON NI ANGKA RASUL 27:24

Didok surusuruan i do tu au songon on, ‘Ulang ho mabiar Paulus! Angke tulus do ho mangadop tu Kesar i. Jana hara ni denggan ni roha ni Debata maradopkon ho, gabe malua do sude donganmu sakapal hara ni ho,’ ninna.

1 KORINTUS 5:12

Anggo manguhumi halak na so Kristen, inda karejongku i. Debata sandiri ma mangadili halahi. Tapi angka anggota ni parlagutan, inda he hak ni parlagutan i sandiri do laho manguhumi angka sisongon i? Di Buku Na Badia i tarsurat do songon on, “Paorot hamu ma angka parjahat i sian tonga-tongamunu.”

EPESUS 2:12

Nada mardomu hamu dohot Kristus hatiha i, halak na asing do hamu na so tarmasuk halak Israel. Nada masuk hamu tu na manjagit janji na nibaen ni Debata dohot bangsoNia i. Nada adong sanga aha arop ni rohamunu na mangolu i di tano on jana nada marsomba tu Debata na sintong hamu.

IBRANI 11:31

Laing hara ni haporsayaan, gabe nada dohot si Rahab dadaboru jalang i mate rap dohot angka na mangalo Debata; angke denggan do dibaen ia manjagit angka pamata-matai ni halak Israel.

IBRANI 11:7

Hara ni na porsaya, gabe dijagit si Noak do barita na nilehen ni Debata tusia taringot tu angka na giot masa muse, na so haidaan dope tanda-tandana. Laing hara ni i muse ma, gabe dioloi si Noak Debata, gabe dipauli ia sada parau na paluahon ia muse rap dohot pangisi ni bagasnia. Jadi gabe dipasala ma portibi on, hape anggo si Noak sandiri didok Debata ma gabe halak na burju hara ni haporsayaannia.

JOSUA 2:16

“Kehe ma hamu tu dolok-dolok an,” ning si Rahab tu halahi, “Anso ulang dapot angka jolma na nisuru ni raja i hamu. Disi ma hamu martabuni tolu ari on lopus mulak halahi. Dung i, tola ma hamu patoruskon pardalananmunu.”

JOSUA 2:18

Angkon baenonmu do songon on. Muda ro hami mamorangi luatmunu on, tambatkon ma tali na rara on di jandela inganan parmijurannami on. Palagut ma amanta-inanta, angka ibotomu dohot sude sisolkot ni amanta di bagas on.

HAKIM-HAKIM 1:25

Jadi gabe dipatuduhon bayo i ma dalan masuk tu kota i. Jadi masuk ma halak Efraim dohot Manase tu kota i lalu dibunu halahi ma sude halak na disi, asing ni bayo i dohot keluargania.