JOSUA 4:6 - BIBEL JAMITA NA DENGGAN

⁶ Angka batu i ma na paingotkon halak Israel tu na nibaen ni Tuhan. Dilaon-laon ni ari muda sapa-sapa angka dakdanakmunu sanga aha arti ni angka batu on di hamu,

JOSUA 4:6 ပူးပေါင်းရင်းမြစ်များ

MASMUR 44:1

Hami bege sandiri do, ale Debata, holong ni roha na nibaritahon ni ompunami, taringot tu hagodangan ni karejo na nipatulusMu di hatiha na salpu di na robi.

MASMUR 71:18

Lopus matobang au tehe jana ubanon, ale Debata, ulang ma au tadingkon, lopus hubaritahon kuaso dohot godang ni sahalaMu, tu sude pomparan na giot ro.

HARURUAR 12:14

Ari on ma ari parningotan di hamu. Angkon pagodangonmunu do ari on laho marningot angka aha na dung Hubaen. Rayahon hamu ma ari on salolot-lolotna.”

HARURUAR 13:14

Muda disapai anakmu di pudian ni ari sanga aha astuan ni pesta on, angkon alusanmunu songon on, ‘Marhite hagodangan ni kuaso ni Tuhan do, na maroban hita ruar sian Mesir inganan parhatobananta i.

HARURUAR 13:9

Pesta on ma songon singot-singot di hamu tudos tu na nitambatkon di tangan sanga di bohimu. Marhite pesta on, gabe dipaingot hamu anso diapil jana diparsiajari hamu angka Uhum Ni Tuhan, harana madung diparuar Tuhan hamu sian Mesir marhite kuasoNa na godang i.

HARURUAR 31:13

paboahon tu bangso Israel, “Pagodang hamu ma Ari Sabat i, ari na dung Hutotopkon songon Ari Paradianan. Ari i ma na gabe tanda ni parjanjianKu dohot hamu ro di pinomparmunu, anso diboto hamu, Au do Tuhan na mambaen hamu gabe bangsongKu sandiri.

JESAYA 38:19

Hum jolma na mangolu do na mamuji Ho, songon na hupatupa sadari on. Dibaritahon na matobang tu dakdanakna sanga songon dia burju ni rohaMu.

JESAYA 55:13

Gonti ni sihupi tubu ma bona ni sampinur, gonti ni latong tubu ma hayu na huskus. Songon tanda na hot na paingotkon tu rohamunu, taringot tu na dung Hubaen, Au Tuhan mambaensa di hamu.”

JEHESKIEL 20:12

Husuru do halahi pasangapkon Ari Sabat songon tanda ni parjanjianKu dohot halahi, laho paingotkon halahi paboa na dung Huhapunjungkon halahi di Au, Au Tuhan mangkapunjungkonsa.

JEHESKIEL 20:20

Parbadia i ma Ari Sabat i na gabe tanda ni parjanjianKu dohot hamu, laho pasunggulkon tu rohamu paboa Au do Tuhan Debatamunu.’

BILANGAN 16:38

Madung badia barang-barang i hatiha na nipasahat di ginjang langgatan ni Tuhan. Dung i buat ma inganan ni api ni halak na hona uhum hara ni dosa ni halahi i. Angkon topaon barang-barang i gabe nipis-nipis, jana baen ma sian na dung nipis i gabe tutup ni langgatan. Gabe parningotan ma i di bangso Israel.”

BAENON NI ANGKA RASUL 2:39

Angke tu hamu do ale angka dongan, dohot tu pomparanmunu, songon i muse tu angka halak na maringanan di na dao do na nijanjihon ni Debata i – i ma sudena halak na nipiohon ni Debata Tuhanta i anso ro tuSia.”

PANGARATAION 11:19

Ajarkon ma i tu angka dakdanakmu. Sai hobar-hobari hamu ma i dompak di bagas hamu sanga pe di na mardalanan, dompak maradian hamu sanga di hatiha markarejo.

JOSUA 22:27

tapi anso gabe tanda do i di hita na dua pihak, dohot di pomparanta tu pudian ni ari, bahaso na tutu do hami on marsomba tu Tuhan di Bandar ParmiananNia i marhite na maroban haul situtungon, angka sihaulkonon dohot haul haluaan. Jadi muda songon i, nada dohonon ni pomparanmunu be bahaso na so adong sanga na aha parsambungan ni pomparannami dohot Tuhan.

JOSUA 4:21

Dung i ninna si Josua ma tu halak Israel, “Di pudian ni ari, muda disapai angka dakdanakmunu taringot tu arti ni angka batu on,

JOSUA 4:5

lalu didok ia ma, “Kehe ma hamu tu Jordan, tu jolo ni Poti Parjanjian ni Tuhan Debatamunu. Porsan hamu ma sian i sada be batu di abaramunu – sada be batu di ganop marga ni bangso Israel.