JOSUA 23:14 - BIBEL JAMITA NA DENGGAN

¹⁴ Saonnari dumpang ma hatihana marujung ngolungku. Hamu sude – pasada-sada – diboto hamu do torang, na dung dilehen Tuhan do sandok na denggan na nijanjihonNia i. Pasada-sada na nijanjihonNia madung dipatulus Ia; umpe sada na so dipatulusSa.

JOSUA 23:14 ပူးပေါင်းရင်းမြစ်များ

PAMUNGKAAN 47:29

Di na mur donok hatihana marujung ngoluna, dipiohon ia ma si Josep anaknia i, didok ia ma hatania, “Baen ma tanganmi tu holang-kolang ni hae-haengkon jana sumpahon ma na so kuburkononmu au di tano Mesir on.

1 RAJA-RAJA 2:2

“Dapot ma hatihana marujung ngolungku. Angkon pos do rohamu jana barani.

1 RAJA-RAJA 8:56

“Pinuji ma Tuhan na dung mangalehen hasonangan tu bangsoNa songon na dung dijanjihonNia marhite si Musa naposoNa i. Sude janji i denggan do jana madung dipatulus Ia.

JOB 30:23

Huboto do, na niboanMu au tu hamatean, inganan pangaluhutan ni sude na marhangoluan.

HARURUAR 3:8

Jadi hara ni i, madung mijur Au laho palua halahi sian tangan ni halak Mesir, bope maroban halahi haruar sian luat i, tu sada luat na bidang jana na napu, tano inganan ni susu dohot aer ni loba, jana saonnari diingani halak Het, Amori, Peris, Hewi dohot Jebus.

PARJAMITA 12:5

Mabiar ma ho tu inganan na gincat jana mardalan ho angkon jamot-jamot. Obukmu pe maruba jana saratonmu patmu muda mardalan. Gabe mago ma sude hagiot dohot por ni roha. Na parayak tu ingananta na parpudi noma hita, marsiluluton ma angka jolma jana mangandungi sapanjang dalan.

PARJAMITA 9:10

Karejohon ma sude karejomu sagogomu. Angke nada adong be naron sipikiran dohot karejo. Nada adong ilmu sanga bisuk anggo di inganan ni na mate. Jana marayak tusi do ho kehe.

JEHESKIEL 20:28

Huoban ma halahi tu tano na dung Hujanjihon tu halahi. Di na niida ni halahi angka dolok na gincat dohot angka hayu na rumbun, dipelehon halahi ma haul tu sude hayu dohot dolok i. Dialap-alapi halahi ma anso muruk au marhite angka haul situtungon dohot pelean anggur ni halahi i.

BILANGAN 23:19

Nada dos Debata dohot jolma na ringgas margabus, na momo muba pikiranna. Muda dung Dijanjihon Debata, sudena pasti Dipatulussa! Muda Ia mangkuling, sude angkon tarjadi!

LUKAS 21:33

Anggo langit dohot tano on mago do i, tapi anggo hatangKi indangkon na ra mago.”

IBRANI 9:27

Madung ditotopkon Debata hian, sanoli sajo do mate jolma, dung i diadili Debata noma.

1 SAMUEL 3:19

Mur magodang ma si Samuel. Didongani Tuhan do ia jana dipatulus do tutu tarjadi sude na nidok ni si Samuel.