JOSUA 22:18 - BIBEL JAMITA NA DENGGAN

¹⁸ Jana saonnari, na giot manghudukkon Tuhan dope hamu mangulahi? Muda dialo hamu Tuhan sadari on, muruk ma Tuhan ancogot tu sude halak na di Israel.

JOSUA 22:18 ပူးပေါင်းရင်းမြစ်များ

2 SAMUEL 24:1

Muruk muse ma Tuhan tu Israel, jana disosoi ia ma si Daud laho parohon hasusaan tu bangso i. Didok Tuhan ma tusia, “Pamasa ma jolo pamilangion di Israel dohot Juda.”

1 RAJA-RAJA 9:6

Tapi muda dihudukkon ho sanga pomparanmu Au jana nada dioloi angka uhum dohot parentangKu gabe manyomba tu angka debata na asing,

2 RAJA-RAJA 17:21

Dung disirang Tuhan Israel sian Juda, diangkat halahi ma si Jerobeam anak ni si Nebat gabe raja ni halahi. Jadi dibaen si Jerobeam ma halahi manandingkon Tuhan boti mambaen angka dosa na godang.

1 JUJUR TAON 21:1

Sai giot agoon ni Sibolis do halak Israel; jadi dijajang Sibolis i ma si Daud anso mambaen sensus.

1 JUJUR TAON 21:14

Jadi diparo Tuhan ma nyae bala tu halak Israel jabat mate pitu pulu ribu halak sian halahi.

2 JUJUR TAON 34:33

Dironcohon Raja Josia ma sudena angka gana-ganaan sihagigian na adong di angka inganan na masuk tu luat ni halak Israel. Disuru ia ma rayatnia i maribadat tu Tuhan, Debata ni ompu ni halahi. Jadi salolot di ngolu ni si Josia, sai tongtong do setia rayat i tu Tuhan.

HAMALIMON 10:6

Dung i didok si Musa ma tu si Harun dohot tu angka anakna na laing mangolu dope, i ma si Eleasar dohot si Itamar, “Ulang padiar hamu obukmunu nada nisuri, sanga manyuakkon pakeanmu songon na patidahon marsakmunu. Muda dibaen hamu songon i, angkon mate hamu, bope sude bangso Israel angkon muruhan ni Tuhan. Tapi sude halak Israel na asing i, tola do marsak manangisi sidua halak, na mate dibaen api ni Tuhan i.

BILANGAN 16:22

Tapi dipaunduk si Musa dohot si Harun ma manyomba lalu didok halahi, “Ale Debata, Ho do na mangalehen hangoluan tu sude na mangolu. Muda mardosa sahalak, sude dehe halak na bahat on muruhanMu?”

BILANGAN 32:15

Hamu halak Ruben dohot halak Gad, muda aloonmunu Tuhan i saonnari, tinggalkonon ni Tuhan i ma bangso on di halongonan, patundamunu do ro hasusaan i.”

PANGARATAION 7:4

anso ulang dipadao halahi angka dakdanakmu sian Tuhan laho marsomba tu angka debata na asing. Muruk do Tuhan tu hamu muda marsomba ho tu angka debata na asing jana manigor do pusaonNia ho.

JOSUA 22:15

Jadi lalu ma halahi mandapotkon angka halak na sian Marga Ruben, Gad dohot Manase Parhabincaran di tano Gilead.

JOSUA 22:16

Jadi songon gonti ni sude halak ni Tuhan, didok halahi ma tu halak na sian Marga Ruben, Gad dohot Manase Parhabincaran i, “Biasi baenonmunu pangalaho na jahat on maradopkon Debata ni Israel? Na mangalo Tuhan do hamu, di na nibaenmunu langgatan di hamu! Nada dipatulus hamu be angka na niparentahonNia!

JOSUA 22:20

Ingot ma! Si Akan anak ni si Zerah i pe na so ra mangihutkon parenta ni Tuhan salaho tu barang-barang sisoadahononkon. Jana aha do akibatna? Sude Israel hona uhum! Hum si Akan do na mardosa, hapengani anggo na mate nada hum ia sajo!”

JOSUA 7:1

Madung diparentahon Tuhan halak Israel bahaso na so tola buaton sada pe sian sandok na adong di Jeriko na angkon sisegohononkon. Hape nada dioloi parenta i. Adong ma sada bayo na margoar si Akan na mangalanggar parenta i, jadi gabe muruk situtu ma Tuhan tu halak Israel. (Amang ni si Akan goarna si Karmi jana ompungnia margoar si Zabdi na sian horong ni Marga Zerah na masuk tu Marga Juda.)

JOSUA 7:11

Na mardosa do halak Israel. Madung Huparentahon tu halahi laho mangoloi parjanjian antara ni halahi dohot Au hape dilaosi halahi do i! Angka barang-barang sironcohononkon pe laing adong do dibuat halahi. Ditangko jana dibunihon halahi do i di antara ni barang-barang ni halahi, jana dipaula so diboto halahi ma i!

JOSUA 7:21

Sian tonga-tonga ni angka barang na tarampas i, adong huida sada baju juba Babilonia na jeges sajo; huida muse perak hira-hira borat dua kilogram dohot sere sabatang marborat lobi satonga kilogram. Por sajo rohangku anso di au nian angka barang i, jadi gabe hubuat ma i. Hutabunihon do sudena i di bagasan tano di bandarki; perakna i ma di bagian partoru.”

1 SAMUEL 12:14

Martua ma hamu muda dipasangap hamu Tuhan i jana mangoloi hamu tuSia bope ditangihon jana dioloi hamu parentaNia, lumobi muda hot hamu dohot rajamunu i mangihut di Tuhan Debatamunu i.

1 SAMUEL 12:20

Gabe dialusi si Samuel ma, “Ulang hamu mabiar, haru pe na dung dibaen hamu hajahatan i, ulang ma hamu marbalik sian Tuhan, tapi sai tongtong ma hamu mangoloi tuSia sian sandok rohamunu.