JOSUA 10:40 - BIBEL JAMITA NA DENGGAN

⁴⁰ Dipatunduk si Josua sude luat i. Ditaluhon ia angka raja na di bagian pardolok, na di robean ni dolok sabola Habincaran, na di pat ni dolok sabola Hasundutan, songon i muse na di angka padang-padang sabola Selatan. Sada halak umpe dipadiar ia mangolu; sude do dibunu. Songon i do antong parenta ni Tuhan, Debata ni Israel.

JOSUA 10:40 ပူးပေါင်းရင်းမြစ်များ

1 RAJA-RAJA 15:29

Disi gabe raja si Baesa manigor dibunu ia do sude pomparan ni si Jerobeam. Hombar do i tu na nidok ni Tuhan marhite naposoNa, Panurirang Ahia na sian Silo, sandok isi ni bagas ni si Jerobeam angkon hona bunu, umpe sahalak na malua.

NEHEMIA 9:24

Tano Kanaan ditaluhon halahi, dipatunduk Ho halak na maringanan disi. Dilehen Ho do kuaso mambaen lomo ni rohana, maradopkon angka bangso Kanaan dohot angka rajana.

MASMUR 9:17

Hamatean do bagian ni halak pardosa, angka bangso na so manghabiari Debata.

HARURUAR 34:12

Jago-jago hamu, ulang jabat mambaen janji hamu dohot halak di luat na nidapotkonmunu i, anso ulang gabe jorgong halahi muse di tonga-tongamunu.

BILANGAN 13:17

Di na nisuru ni si Musa halahi kehe, ditonahon si Musa hian tu halahi, “Anso mardalan halahi tu Utara, tu Selatan ni tano Kanaan, dung i torus tu luat na martor.

PANGARATAION 1:7

Antong rorak hamu ma bandarmunu i jana kehe ma hamu tu tano ni halak Amori na mardolok-dolok i dohot tu sude luat na humaliangna i – tu Rura Jordan, tu tano na martor dohot tu tano napa na toruk, tu Luat Selatan dohot tu topi ni Laut Tonga. Kehe ma hamu tu tano Kanaan, manyalpui partoran Libanon lopus tu aek na godang Efrat.

PANGARATAION 2:34

Laing di hatiha i tarampas jana taroncohon ganop kota, jana tabunu pangisina i sudena, halaklahi, dadaboru dohot angka dakdanak. Nada adong na tapadiar mangolu.

PANGARATAION 7:24

Pasahaton ni Tuhan angka raja ni halahi tu bagasan kuasomunu. Bunuonmunu ma halahi, jana halupahonon ma halahi saulahon. Sada halak pe nada adong na tarbaen mangambati hamu; sandok halak angkon abiskononmunu.

JOSUA 10:35

Laing di ari i do dapot halahi kota i lalu dibunu sude halak na disi songon na nibaen ni halahi di Lakis.

JOSUA 10:37

lalu mambuatsa. Hona bunu ma sudena rajana dohot sandok halak na adong di kota i dohot di angka kota na asing na humaliang kota i. Dironcohon si Josua do sandok kota i laing songon na nibaennia maradopkon kota Eglon. Nada adong umpe sahalak na dipadiar mangolu disi.

JOSUA 10:39

Dibuat si Josua ma kota i dohot rajana maradu sude angka kota na asing na humaliang i. Hona bunu do sude jolma na disi. Songon na nibaen ni si Josua tu Hebron dohot Libna maradu rajana i, laing songon i do dibaen ia tu Debir dohot rajana i.

JOSUA 11:16

Dirampas si Josua ma sandok luat – luat pardolok, angka luat na di pat ni dolok, bope na di Utara songon i na di Selatan; songon i Luat Gosen sudena dohot luat padang na harsang na di Selatan ni Gosen, dohot Rura Jordan.

JOSUA 12:8

Lalu do luat on lopus tu luat pardolok, luat na di pat ni dolok di sabola Hasundutan, Rura Jordan rap dohot angka robeanna i, angka luat na di pat ni dolok sabola Habincaran dohot halongonan na di Selatan. Luat i hian ma na niinganan ni bangso Het, Amori, Kanaan, Peris, Hewi dohot Jebus.

JOSUA 18:21

Angka kota na gabe bagian ni angka ripe sian Marga Benyamin i, i ma Jeriko, Bet-Hoglah, Emek-Kesis,

JOSUA 6:17

Sude kota i dohot sandok isina angkon dironcohon sude gabe songon haul tu Tuhan. Hum si Rahab, siboru jalang i dohot koum sisolkotna sajo do na tola padiaron mangolu, dibaen madung diondihon ia mata-mata na tasuru i.

JOSUA 8:2

Angkon songon na nibaenmu tu Jeriko dohot rajana i. Tapi anggo sanoli on tola do pambuatanmunu angka barang-barangna i dohot pahan-pahananna. Marhobas ma hamu mangaroro kota i tompu sian pudi.”

JOSUA 8:27

Pahan-pahanan dohot angka barang-barang na hona rampas di kota i, dipambuati halak Israel ma i gabe di halahi songon na nidok ni Tuhan tu si Josua.

JOSUA 9:24

Dialusi halahi ma, “Hami baen pe songon i tuannami, hara ni na dung hami bege do bahaso na dung disuru ni Tuhan Debatamunu do si Musa, naposoNia i, mangalehen tu hamu sude luat on dohot mamunu sude jolma na tinggal di angka inganan na nidapotkonmunu. Jadi gabe mabiar situtu hami tu hamu; mabiar hami hona bunu, i ma dalanna umbaen na hami baen sudena on.