JOHANNES 2:24 - BIBEL JAMITA NA DENGGAN

²⁴ Tapi anggo Jesus nada pos rohaNia di halahi, angke ditanda Ia do sude halahi.

JOHANNES 2:24 ပူးပေါင်းရင်းမြစ်များ

1 RAJA-RAJA 8:39

sai tangihon ma di ingananMu na di banua ginjang sesa ma dosa ni halahi jana urupi halahi. Hum Ho do na umboto roha ni jolma. Hara ni i baen ma tu ganop halak na patut disia.

1 JUJUR TAON 28:9

Jadi tu si Salomo, didok si Daud ma, “Amang, Debata na nisomba ni amangmu ma oku gabe Debatamu. Angkon oloanmu do Ia sian sonang dohot ias ni rohamu. Harana diboto Ia do sude pikiran dohot pos ni rohanta. Muda dijalahi ho Ia, gabe padumpang ma dohot Ia, tapi muda ditadingkon ho, tulakkononNia noma ho salolot-lolotna.

1 JUJUR TAON 29:17

Huboto do, na niujimu roha ni ganop halak jana dihalomohon rohamu do halak parroha na ias. Sian sada ni rohangku, di bagasan jop ni roha huhaulkon ma sudena on tu Ho. Madung tangkas huida sanga songon dia bangsoMu na marlagut dison marjop ni roha marsioban haulna be tu Ho.

JEREMIA 17:9

Nada tardodo anggo roha ni jolma umbisuk do i sian sasudena jana sun antong jahatna.

MATEUS 9:4

Diboto Jesus do na nipikiran ni halahi i gabe didok Ia ma, “Biasi he dipikiri hamu na jat di bagasan rohamunu lakna?

MARKUS 2:8

Manigor diboto Jesus do pikiran ni halahi i. Didok Ia ma tu halahi, “Biasi songon i pikiranmunu?

JOHANNES 1:42

Dung i ditaruhon si Andreas ma si Simon tu Jesus. Dipamanat Jesus ma si Simon, ning Ia ma, “Si Simon do ho, anak ni si Jona. Si Kepas noma goarmu.” (Kepas disaro Ibrani dos dohot Petrus disaro Junani astuanna: dolok batu.)

JOHANNES 16:30

Saonnari madung tangkas di hami, diboto Ho do sasudena; jana nada porlu be sapaan ni halak sanga na aha tu Ho. Jadi hara ni i, porsaya ma hami na sian Debata do haroroMu.”

JOHANNES 21:17

Patolu-nolihon laing disapai Jesus dope tusia, “O Simon anak ni si Jona. Holong do rohamu mida Au?” ning Ia. Gabe marsak ma si Petrus hara ni na nisapaan ni Jesus i ia jabat tolu noli di na nidok ni Jesus, “Holong dehe rohamu mida Au?” Tapi laing dialusi si Petrus ma, “O Tuhan diboto Ho do Tuhan sasudena. Diboto Ho do Tuhan na holong rohangku mida Ho!” Dung i didok Jesus ma tusia, “Antong parmahani ma angka biri-biringKi.

JOHANNES 4:16

“Kehe ma ho jolo mamiohon halaklahimu, dung i ro ma ho mangulahi tuson,” ninna Jesus.

JOHANNES 5:42

Hutanda do hamu. Huboto do na so dihaholongi hamu Debata di bagasan rohamunu.

JOHANNES 6:15

Dung i giot paksaon ni halahi ma Jesus gabe raja ni halahi. Tapi diboto Jesus do na di roha ni halahi i, gabe kehe ma sada Ia tu dolok-dolok i.

JOHANNES 6:64

Hape laing adong dope sian hamu na so porsaya.” (Madung diboto Jesus hian do sian mulana sanga ise-ise na so ra porsaya dohot ise na giot manghianat tuSia.)

BAENON NI ANGKA RASUL 1:24

Dung i ditangiangkon halahi ma i. Ninna halahi ma, “O Tuhan, Ho do na umboto sude roha ni jolma. Madung ditinggalkon si Judas tohonan harasulonnia. Madung mate ia. Hara ni i patuduhon ma tu hami, sanga ise do sian na dua on na nitodoMu gabe hasahatan ni karejo i manggonti si Judas.”

BAENON NI ANGKA RASUL 15:8

Jana dipatandahon Debata siida roha ni jolma i do na dung nijagitNia halahi; i ma na nipatuduhonNia di na nilehenNia Tondi Parbadia tu halahi laing songon na dung nilehenNia i tu hita muse.

PANGARATAION 31:21

jana bahat ma parmaraan na jorbut ampe tu halahi. Tapi anggo ende on tongtong ma diendehon jana dipake gabe hasaksian maradopkon halahi, harana laing tong-tong do i endehonon ni pomparan ni halahi. Salang saonnari pe, painte so Huoban halahi tu tano na Hujanjihon i, Huboto do pardangolan ni pikiran ni halahi.”

IBRANI 4:13

Umpe sada sian na nitompa i na buni, na so niida ni Debata. Talak do sudena jana patar di joloNia. Jana angkon lehenonta do tuSia partanggungjawabanta.

HALUMBAAN 2:23

Angka halak na mangihutkon ia pe angkon Hubunu do anso laing torang diboto angka parlagutan i paboa na Au do na tuk mandodo pikiran dohot roha ni jolma. BaloskononKu ma tu hamu marguru tu pambaenanmunu be.

1 SAMUEL 16:7

Tapi didok Tuhan ma tu si Samuel, “Ulang marguru ho di ginjang ni pamatang dohot di jogi ni rupana; nada i por ni rohangKu. Nada songon parsuhat ni jolma parsuhatKu. Anggo jolma siida rupa do, tapi anggo Au marnida roha do.”