JOHANNES 19:17 - BIBEL JAMITA NA DENGGAN

¹⁷ Kehe ma Jesus, diporsan Ia sandiri ma hayu parsilangNia tu inganan na margoar “Partangkurahan”. (Di saro Ibrani didok Golgota.)

JOHANNES 19:17 ပူးပေါင်းရင်းမြစ်များ

PAMUNGKAAN 22:6

Dipaporsankon si Abraham ma soban i tu abara ni si Ishak, jana ia sandiri ma maroban piso dohot surpu panutung ni soban i. Di na udur i halahi mardalan,

1 RAJA-RAJA 21:13

Juguk ma dua halak na jahat adop si Nabot, jana dituhas halahi na dua ma si Nabot di jolo ni halak na bahat i na dung mamurai Debata dohot raja. Jadi hara ni i ma dalanna dioban ia tu balian ni kota lalu didangguri dohot batu lopus mate.

HAMALIMON 24:14

“Oban ma bayo i tu balian ni parbandaran. Ganop halak na dung umbege ibana mamurai, dipayakkon ia ma tanganna tu ulu ni bayo i manyaksihon na dung marsala bayo i. Dung i dangguran ni halak na bahat i ma ia dohot batu lopus mate.

MATEUS 10:38

Dung i, halak na so ra mamorsan silangna laho mangihutkon Au, nada tumbuk halak sisongon i di Au.

MATEUS 16:24

Dung i didok Jesus ma tu anak siseanNia i, “Muda adong halak na giot mangihutkon Au, angkon dihalupahon ia do dirina sandiri, dung i diporsan ia ma silangna dung i pe anso diihutkon Au.

MATEUS 27:37

Dilohotkon halahi ma di ginjang uluNia surat paboahon hasalaanNia. Songon on ma hatana, “Indon ma Jesus Raja ni halak Jahudi”.

MARKUS 10:21

Dipanotnoti Jesus ma bayo i hara ni holong ni rohaNia midasa. Didok Ia ma, “Hum sada nari noma pangalaho na porlu di ho. Kehe ma ho manggadis sude sinadonganmu. Lehen ma hepengna i tu angka halak na pogos, dung i gabe adong ma dapot ho arta na di banua ginjang. Dung i ro ma ho mangihutkon Au!”

MARKUS 15:26

Di ginjang ni parsilang i disuratkon do hasalaan na dituhaskon tuSia. On ma na disuratkon disi, “Raja Ni Halak Jahudi.”

MARKUS 15:32

Anggo na tutu ma Ia raja ni Israel, Kristus i, mijur ma Ia sugari sian i. Anso porsaya hami diSia!” Halak na diparsilangkon i pe rap dohot Jesus laing mangincahi do tuSia.

MARKUS 8:34

Dung i dipiohon Jesus ma halak na bahat na disi rap dohot angka anak siseanNia i. Didok Ia ma tu halahi, “Muda adong sanga ise na giot mangihutkon Au, angkon disoadahon ia do dirina. Dung i diporsan ia ma parsilangnia baru pe anso diihutkon ia Au.

LUKAS 14:27

Barang ise na so mamorsan hayu parsilangna jana mangihutkon Au nada tarbaensa gabe anak siseanKu.

LUKAS 23:26

Dung i dioban ma Jesus tu balian. Di tonga dalan marsuo ma halahi dohot sada halak na margoar si Simon, na marasal sian Kirene na topet laho tu kota. Ditangkup halahi ma ia jana dipaksa ma mamorsan hayu parsilang i dipudi ni Jesus.

LUKAS 23:33

Dung lalu tu inganan na margoar “Partangkurahan”, dipaku halahi ma Jesus tu hayu parsilang i. Diparsilangkon muse ma dohot sidua halak na jahat i, sahalak ma i di siamun ni Jesus jana na sada nari di siambirangNia.

LUKAS 23:38

Di ginjang ni parsilang ni Jesus tarsurat do angka pandohan on, “On ma Raja Ni Halak Jahudi.”

LUKAS 9:23

Dung i mandok hata ma Jesus tu halak na bahat i, ning Ia ma, “Sanga ise na giot mangihutkon Au, angkon porsoonnia do dirina, angkon porsanonnia ma hayu parsilangnia ganop ari, jana torus mangihutkon Au.

JOHANNES 19:13

Disi dibege si Latus angka pandohan i, dioban ia ma Jesus tu ruar jana juguk ma ia di juguhan paruhuman di inganan na margoar Litostrotos (astuanna: pantar batu; di hata Ibrani digoari do i Gabbata).

JOHANNES 5:2

Di Jerusalem di lambung ni “Horbangan Biri-biri,” adong do sada paridian. Di hata Ibrani digoar do i Betesda. Adong muse do lima sopo-sopo humaliang paridian i.

BAENON NI ANGKA RASUL 7:58

Disarat halahi ma ia tu balian ni kota i, jana didangguri dohot batu. Dipatiopkon halak na manyaksihon i ma pakean ni halahi tu sada doli-doli na margoar si Saulus.